मलाकी 3
3
सन्देश देणे वाल़ा आऊणा
1देखो, आऊँ आपणे दूतो खे पेजुँआ ओर तेस मांते आगे बाट सुदारनी, तेबे यहोवा जेसखे तुसे टोल़ोए, से अचाणक आपणे मन्दरो दे आई जाणा, वाचा रा से दूत, जेसरी बाट तुसे देखणे लगी, से पक्का आऊणा, सेना रे यहोवे री येई बाणी ए। 2पर तेसरे न्याय रा दिन कुण सयी सकोआ? ओर जेबे से दिशो, तेबे कुण खड़ा रयी सकोआ? कऊँकि से सन्यारो री आग ओर तोबिये रे साबणो जेड़ा मैल दूर करोआ। 3से तेस सन्यारो जेड़ा ऊणा जो चाँदिए खे तदुए तक आगी दे जल़ाओआ जदुए तक तेते रा सारा मैल फुकी नि जाओ ओर से शुद्ध नि ऊई जाओ। ओर तेस लेविया रे वंशो री बुराई दूर करनी, तेस सेयो तदुए तक शुद्ध करने जदुए तक सेयो शुद्ध सूईने ओर चाँदिए जेड़े नि ऊई जाओ। ओर तेबे तिना यहोवे खे एड़े बलिदान चढ़ाणे जिना रे बारे दे सेयो जाणोए की से सई ए। 4तेबे यहूदा प्रदेश ओर यरूशलेम शईरो रे लोक जो पेंट यहोवे खे ल्याऊणे, तिजी ते से खुश ऊणा। 5यहोवा बोलोआ, “तेबे मां न्याय करने खे तुसा रे नेड़े आऊणा, ओर जादू, व्याभिचार ओर चूठी गवाई देणे वाल़ेया रे खलाफ, जो मजदूरा खे तिना री मजदूरी नि देंदे, बिदुआ ओर अनाथा पाँदे अन्देर करने वाल़े, परदेशिया रा न्याय बिगाड़ने वाल़े ओर मेरा डर नि मानदे, तिना सबी रे खलाफ मां तेबु गवाई देणी, सेना रे परमेशरो रा येई वचन ए।”
दसुए इस्से री चोरी
6कऊँकि आऊँ परमेशर बदलदा नि, इजी बजा ते, ओ याकूबो री ल्वाद, तुसे नाश नि ऊए। 7आपणे बुजुर्गा रे दिना ते तुसे मेरी बिधिया ते आटदे आई रे ओर तिना रा पालण नि करदे। तुसे मेरी तरफा खे फिरो, तेबे मां बी तुसा रिया तरफा खे फिरना, सेना रे यहोवे रा येई वचन ए, पर तुसे पूछोए कि आसे कुणजी गल्ला ते फिरूँ? 8आऊँ तुसा ते बोलूँआ, “माणूं परमेशरो खे तोखा नि देयो।” पर तुसे पूछोए, “आसे तूँ किंयाँ लूटेया?” आऊँ बोलूँआ, “तुसे माखे से दसुआ इस्सा ओर चढ़त नि देंदे जो तुसा खे देणा चाईयो था।” 9तुसे जो बी करोए तिजी सबी दे स्राप पड़ीगा दा ए, कऊँकि तेस देशो दे तुसे लोक माखे तोखा देणे लगी रे। 10सारे दशमांश मेरे मन्दरो रे पण्डारो दे लई आओ। तेबे तेती बऊत खाणे-पीणे रिया चीजा ऊणिया। ईंयाँ तुसे माखे परखो, सेना रा यहोवा ईंयाँ बोलोआ, “तेबे तुसा देखणा कि मां स्वर्गो रे द्वार खोली देणे। मां इतणिया आशीषा बरसाणिया कि तुसा गे राखणे खे जगा नि ऊणी।” 11मां तुसा रा नाश करने वाल़े एड़े थिड़कणे कि तिना तुसा री जमीना री फसल बर्बाद नि करनी ओर तुसा री अंगूरा री बेला रे फल काच्चे नि छूटणे, सेना रे परमेशरो रा येई वचन ए। 12तेबे सारी जातिया तुसा खे तन्य बोलणा, कऊँकि तुसा रा देशो बऊत सुन्दर ऊणा, सेना रे परमेशरो रा येई वचन ए। 13परमेशर बोलोआ, “तुसे मेरे खलाफ टीठ गल्ला करी राखिया, पर तुसे पूछोए कि आसे तेरे खलाफ क्या करी राखेया? 14तुसे बोली राखेया कि परमेशरो री सेवा करना बेकार ए। आसे जो तेसरे बताए रे काम पूरे करी राखे ओर सेना रे परमेशरो रे डरो रे मारे शोगो रा पईरावा पईनी की चली रे, इजी ते क्या फायदा ऊआ? 15पर यहोवा तो कमण्डी लोका खे ई आशीर्वाद देओआ! आ, बुरे काम करने वाल़े ई तो अमीर बणोए! परमेशर तो तिना खे सजा पनि देंदा जो तिना री परीक्षा लणा पसन्द करोए। आसे तो येई सोचूँए।”
यादगारिया री कताब
16तेबे परमेशरो रा डर मानणे वाल़ेया आपू बीचे गल्ला कित्तिया ओर परमेशर त्यान देई की तिना री सुणो था ओर जो परमेशरो रा डर मानो था ओर तेसरे नाओं रा आदर करो थे, तिना री यादा रिया तँईं तेस सामणे एक कताब लिखी जाओ थी। 17सेना रा यहोवा ईंयाँ बोलोआ, “जेस दिने मां न्याय करना, से मेरिया तँईं खास तअन ऊणा। मां सेयो तेड़े ई छाडी देणे जेड़े एक बाओ आपणे आज्ञा ना मानणे वाल़े माठे खे छाडी देओआ। 18तेबे तुसा फेर तर्मी ओर दुष्टा बीचे, मतलब जो परमेशरो री सेवा करोआ ओर जो तेसरी सेवा नि करदा, तिना दुँईं बीचे पेत जाणी लणा।”
Currently Selected:
मलाकी 3: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
