लेवी बिधान 8
8
हारूण ओर तेसरे पाऊआ रा अभिषेक
1तेबे यहोवे मूसे खे बोलेया, 2“तूँ हारूण ओर तेसरे पाऊआ रे टाल्ले, अभिषेको रा तेल ओर पापबलिया रे बाच्छू ओर दोनो खाडू ओर बिना सजेड़े री रोटिया री टोकरिया खे 3मिलणे वाल़े तम्बूए रे द्धारो पाँदे सारी मण्डल़िया खे कट्ठा कर।”
4यहोवे री एसा आज्ञा रे मुताबिक मूसे मण्डल़ी मिलणे वाल़े तम्बूए रे दरवाजे पाँदे कट्ठी कित्ती। 5तेबे मूसे मण्डल़िया खे बोलेया, “जो काम करने री आज्ञा यहोवे देई राखी से यो ए।”
6फेर मूसे हारूण ओर तेसरे पाऊ आपू नेड़े ल्याई की पाणिए साथे नुल़ाए। 7तेबे मूसे तिना खे टाल्ले पन्याए ओर पटका लपेटी की चोगा पन्याई ता ओर एपोद लगाई की एपोदो री कढ़ाई कित्ते रे पटके साथे एपोद बानी की गूड़ी ता। 8ओर तिने छातिया पाँदे पईनणे वाल़े झिलम लगाई की तिदे ऊरीम ओर तुम्मीर राखी ते। 9तेबे तिने तिना रे सिरो पाँदे पगड़ी बानी की पगड़िया रे सामणे री तरफा खे सूईने री पत्ती लगाई की पवित्र मुकुट लगाया, जिंयाँ यहोवे मूसे खे आज्ञा दित्ती थी।
10तेबे मूसे अभिषेको रा तेल लई की मिलणे वाल़ा तम्बू ओर जो कुछ तिदे था तिना सबी रा अभिषेक करी की सेयो पवित्र कित्ते। 11ओर तेते तेलो बीचा ते कुछ तिने बेदिया पाँदे सात बार छिड़केया, ईंयाँ सारे समानो समेत बेदिया रा ओर पावे समेत अऊदिया रा अभिषेक करी की सेयो पवित्र कित्ते। 12फेर तिने अभिषेको रे तेलो बीचा ते कुछ लई की हारूणो रे सिरो पाँदे लटी की तेसरा अभिषेक करी की से पवित्र कित्तेया। 13फेर मूसे हारूणो रे पाऊआ खे नेड़े ल्याई की, तिना खे चोगे पन्याई की, पटका बानी की तिना रे सिरो पाँदे टोपी राखी ती, जिंयाँ यहोवे मूसे खे आज्ञा दित्ती थी।
14फेर से पापबलिया रे बाच्छूए खे सामणे लईगा ओर हारूण ओर तेसरे पाऊए आपणे-आपणे आथ पापबलिया रे बाच्छूए पाँदे राखे। 15मूसे एक बाच्छू बलि करी की तेसरा खून लई की गूठिया साथे बेदिया रे चऊँ सींगा पाँदे लगाई की बेदी पवित्र कित्ती ओर बाकि बचेया रा खून बेदिया रे पावे पाँदे लटी ता, ईंयाँ तिजी खे प्राश्चित करी की से पवित्र करी ती।#8:15 इब्रानी 9:21 16ओर मूसे आंजा पाँदली सारी चर्बी, कल़ेजे पाँदली झिल्ली ओर चर्बिया समेत दोनो गुर्दे लई की बेदिया पाँदे फूके। 17पर बाच्छूए री खाल ओर तेसरा मास ओर तेसरिया आंजा तिने डेरे ते बारे लई जाई कि आगी रे फूकिया, जिंयाँ यहोवे मूसे खे आज्ञा दित्ती थी।
18फेर मूसा होमबलिया रे खाडूए खे नेड़े लईगा, तेबे हारूण ओर तेसरे पाऊए आपणे-आपणे आथ खाडूए रे सिरो पाँदे राखे। 19तेबे मूसे एक खाडू बलि कित्तेया, ओर तेसरा खून बेदिया रे चऊँ कनारे छिड़केया।#8:19 इब्रानी 9:21 20तेबे मूसे खाडूए रे टुकड़े-टुकड़े करी ते, ओर तेसरा सिर ओर चर्बिया साथे टुकड़े फूकी ते। 21तेबे मूसे खाडूए री आंजा ओर पैर पाणिए साथे तोये, ओर पूरा खाडू बेदिया पाँदे फूकेया ओर से सुख देणे वाल़ी खुशबू यहोवे खे आगी रे चढ़ाई री बलि ऊणी, जिंयाँ यहोवे मूसे खे आज्ञा दित्ती थी।
22फेर मूसा दूजे खाडूए खे सामणे ल्याया, जो पुरोईता रे संस्कारो रा खाडू था, तेबे हारूण ओर तेसरे पाऊए आपणे-आपणे आथ खाडूए पाँदे राखे। 23तेबे मूसे एक खाडू बलि कित्तेया फेर तेसरे खूनो बीचा ते कुछ लई की हारूणो रे दाँणे कानो रे सिरे पाँदे, तेसरे दाँणे आथ ओर दाँणे पैरो रे गूठे रे लगाया। 24ओर से हारूणो रे पाऊआ खे सामणे ल्याया ओर खूनो बीचा ते कुछ एकी-एकी रे दाँणे कानो रे सिरे पाँदे, दाँणे आथ ओर दाँणे पैरो रे गूठेया रे लगाया ओर मूसे बाकि खून बेदिया रे चऊँ कनारे छिड़केया। 25तिजी ते बाद तिने सारी चर्बी, मोटी पूँछ ओर आंजा पाँदली सारी चर्बी जो कल़ेजे पाँदली झिल्लिया समेत दोनो गुर्देया पाँदे रओई ओर दाँणी खुटी, यो सब लई की लग राखे; 26ओर बिना सजेड़े रिया रोटिया री टोकरी, जो यहोवे रे सामणे थी राखी री, तिजी बीचा ते एक रोटी, तेलो साथे मिले रे मैदे रा एक फुलका ओर एक पापड़ी लई की चर्बी ओर दाँणी खुटिया पाँदे राखी ती; 27ओर तिने यो सब चीजा हारूण ओर तेसरे पाऊआ रे आथो पाँदे राखी तिया ओर ईलाणे री पेंटा रिया तँईं, यहोवे रे सामणे इलाईया। 28तेबे मूसे फेर सेयो तिना रे आथो ते लई की सुखदायक खुशबू देणे खे सेयो बेदिया री होमबलिया पाँदे राखी की यहोवे खे आगी रे चढ़ाई की बलि कित्ते। 29मूसे पुरोईता री ठराई री बलिया बीचा ते खाडूए री छाती जो तिना रा इस्सा था तिजी खे लई की ईलाणे री पेंट यहोवे रे सामणे ईलाई; जेड़ी यहोवे मूसे खे आज्ञा दित्ती थी।
30तेबे मूसे कुछ अभिषेको रा तेल ओर बेदिया पाँदला खून लई की हारूण ओर तेसरे टाल्लेया पाँदे ओर तेसरे पाऊआ पाँदे ओर तिना रे टाल्लेया पाँदे बी छिड़केया; ईंयाँ तिने हारूण ओर तेसरे पाऊ ओर तिना सबी रे टाल्ले पवित्र कित्ते।
31तेबे मूसे हारूण ओर तेसरे पाऊआ खे बोलेया, “मासो खे मिलणे वाल़े तम्बूए रे द्धारो पाँदे पकाओ ओर तेसा रोटिया खे जो ठराई री टोकरिया रे ए, तेथी खाओ, जेड़ी मैं आज्ञा देई राखी कि हारूण ओर तेसरे पाऊ तिजी खे खाओ। 32तिजी ते बाद मास ओर रोटिया बीचा ते जो बाकि रई जाओगा से आगी रे फूकी देणा। 33सात दिना तक मिलणे वाल़े तम्बूए रे द्धारो ते बारे नि जाणा, जदुओ तक तुसा रे ठराए रे दिन पूरे नि ऊई जाओ कऊँकि तेस ठराए रे सात दिना तक तुसा रा संस्कार करदे रणा। 34जिंयाँ आज कित्तेया, तिंयाँ ई करने री आज्ञा यहोवे देई राखी, जेते कि तुसा रा प्राश्चित करेया जाओ। 35इजी री खातर तुसे मिलणे वाल़े तम्बूए रे द्धारो पाँदे सात दिना तक, दिन-रात रूके रे रणा ओर यहोवे री आज्ञा मानणी, जे तुसे तिजी खे नबाई नि सको तेबे तुसे मरी जाणे, एसा गल्ला री आज्ञा यहोवे माखे देई राखी।”
36तेबे यहोवे री इना ई सबी आज्ञा रे मुताबिक, जो तिने मूसे रे जरीये दित्तिया थिया हारूण ओर तेसरे पाऊए कित्तेया।
Currently Selected:
लेवी बिधान 8: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
