लेवी बिधान 17
17
बलिदानो री जगा
1यहोवे मूसे खे बोलेया, 2“हारूण ओर तेसरे पाऊआ खे ओर सबी इस्राएलिया खे बोल कि यहोवे ये आज्ञा देई राखी, 3इस्राएलो रे कराने बीचा ते कोई माणूं एड़ा ओ जो बल़द या मिन्टूआ या बाकरिया खे, चाए डेरे रे चाए डेरे ते बारे फाटी की 4मिलणे वाल़े तम्बूए रे द्धारो पाँदे, यहोवे रे रणे री जगा रे सामणे यहोवे खे चढ़ाणे रिया खातर नि लई जाओ, तो तेस माणूंए खे खून करने रा दोष लगणा ओर से माणूं जो खून करने वाल़ा ठईरना, से आपणे लोका बीचा ते नाश करेया जाणा। 5एते बिदिया री ये बजअ ए कि इस्राएली आपणे बलिदान जिना खे सेयो खुले मैदानो रे फाटोए, सेयो तिना खे मिलणे वाल़े तम्बूए रे द्धारो पाँदे पुरोईतो गे, यहोवे रिया तँईं लई जाई की यहोवे खेई मेलबलि करी की बलिदान करेया करो; 6ओर पुरोईत खूनो खे मिलणे वाल़े तम्बूए रे द्धारो पाँदे यहोवे री बेदिया पाँदे छिड़को ओर चर्बिया खे तेसरे सुख देणे वाल़ी खुशबू रिया तँईं फूको। 7सेयो जो बाकरेया री मूर्तिया खे पूजणे वाल़े व्याभिचार करोए, सेयो फेर आपणे बलिया रे डांगरा खे तिना रिया तँईं बलिदान नि करो। तुसा री पीढ़िया खे ये सदा री रवाज ऊणी।”
8यहोवे मूसे खे ये बी बोलेया, “तूँ तिना खे बोल कि इस्राएलो रे करानेया रे लोका बीचा ते या तिना बीचे रणे वाल़े परदेशिया बीचा ते जो होमबलि या मेलबलि चढ़ाओ, 9ओर तिजी खे मिलणे वाल़े तम्बूए रे द्धारो पाँदे यहोवे खे चढ़ाणे रिया तँईं नि लई आओ, तो एड़ा माणूं आपणे लोका बीचा ते नाश करेया जाणा।”
जानवरा खे मारने ओर खाणे रे नियम
10ओर इस्राएलो रे करानेया रे लोका बीचा ते या तिना बीचे रणे वाल़े परदेशिया बीचा ते कोई माणूं कऊँ नि ओ जो केड़ा बी खून खाओ, तो मां तेस खून खाणे वाल़े ते मूँ मोड़ी कि से तेसरे लोका बीचा ते नाश करी देणा। 11कऊँकि शरीरो रा प्राण खूनो रे रओआ ओर से मैं तुसा लोका खे बेदिया पाँदे चढ़ाणे खे देई राखेया कि तुसा रे प्राणो खे प्राश्चित करेया जाओ; कऊँकि प्राणो रिया तँईं खूनो साथे ई प्राश्चित ओआ।#17:11 इब्रानी 9:22 12इजी बजअ ते आऊँ इस्राएलिया खे बोलूँआ कि तुसा बीचा ते कोई बी माणूं खून नि खाओ ओर जो परदेशी तुसा बीचे रओआ से बी खून कदी नि खाओ।
13इस्राएलिया बीचा ते या तिना बीचे रणे वाल़े परदेशिया बीचा ते कोई माणूं कऊँ नि ओ जो शिकार करी की खाणे जोगा डांगर या पंछी पकड़ो, से तेसरा खून निकयाल़ी की माट्टिया साथे टकी देओ। 14कऊँकि हर एक शरीरो रा प्राण जो अए से तेसरा खून ईए जो तेसरे प्राणो साथे एक ए; इजी री खातर आऊँ इस्राएलिया खे बोलूँआ कि केसी बी प्राणिये रा खून तुसे नि खाणा, कऊँकि सबी प्राणिया रा प्राण तिना रा खून ईए; जो कोई तिजी खे खाओ से नाश करेया जाणा।#17:14 प्रेरित 15:20-29 15ओर चाए से आपणे प्रदेशो रा ओ चाए परदेशी ओ, जो कोई केसी लोथा रा या काये रे डांगरा रा मास खाओगा, से आपणे टाल्ले तोई की पाणिए साथे नाह्यी लो ओर साँजा तक अशुद्ध रओ, तेबे से शुद्ध ऊणा। 16पर जे से तिना खे नि तोओ ओर ना ई नाओगा, तो तिना खे आपणे पापो री सजा मिलणी।
Currently Selected:
लेवी बिधान 17: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
