योना 4
4
योने रा गुस्सा ओर परमेशरो री दया
1ये गल्ल योने खे बऊत ई बुरी लगी ओर तेसखे रोष आया। 2इजी री खातर तिने यहोवे ते एसा गल्ला रे बारे दे शकाईत कित्ती; “ओ यहोवा, क्या मैं कअरो ते निकल़ने ते पईले नि बोलेया था कि तां एड़ा ई करना? इजी बजा ते आऊँ तर्शीशो खे नठीगा! आऊँ जाणूं था कि तुँ दया करने वाल़ा ओर करूणा करने वाल़ा परमेशर ए, देरा ते रोष करने वाल़ा ओर प्यार करने वाल़ा परमेशर ए। ओर दु:ख देणे ते खुश नि ऊँदा। 3तो एबे ओ यहोवा, मेरे प्राण लई लो, कऊँकि माखे जिऊँदे रणे ते मरना ठीक ए।” 4यहोवे बोलेया, “तेरा जो रोष पड़की रा, क्या से ठीक ए?” 5ये सुणी की योना तेस शईरो ते निकल़ी की, तेस शईरो रे पूर्बो रिया तरफा खे बैठी गा ओर तेती छत बणाई की तिजी रिया छांयी दे बैठी की ये देखणे लगेया कि शईरो खे क्या ऊणा?
6तेबे परमेशर यहोवा बड़े पत्तेया वाल़ी बेल लगाई ओर से योने रे नेड़े लगाईती, कि से तेसरे सिरो खे छांए देयो, ओर तेसखे तेसरे कष्टा ते बचाओ। ओर योना तेसा बड़े पत्तेया वाल़ी बेला रिया बजा ते बऊत खुश ऊआ। 7जेबे प्याग ऊणे लगी, तेबे यहोवे एक कीड़ा पेजेया, जिने से बड़े पत्तेया वाल़ी बेल एड़ी बाडी कि से सूकी गी। 8जेबे सूरज निकल़ेया, तेबे परमेशरे अवा चलायी की गर्म लू चलायी। सूरजो री गर्मी योने रे सिरो पाँदे पड़ने लगी री थी। इजी ते से बऊत ई कमजोर ऊईगा। से मरना चाओ था। इजी री खातर तिने बोलेया, “माखे जिऊँदे रणे ते मरना ठीक ए।”
9परमेशरे योने खे बोलेया, “तेरा रोष जो एसा बड़े पत्तेया वाल़ी बेला रिया बजा ते पड़की रा, क्या से ठीक ए?” तिने बोलेया, “आ, मेरा जो रोष पड़की रा से अच्छा ईए, बल्कि रोषो रे मारे मरना बी अच्छा ए।” 10तेबे यहोवे बोलेया, “जेसा बड़े पत्तेया वाल़ी बेला खे तैं कोई मईणत नि कित्ती, ना से बढ़ाई, जो एक ई राती दे ऊई ओर एक ई राती दे नाश बी ऊई, तेते पाँदे ताखे तरस आया। 11सुण, ये बड़ा शईर नीनवे, जिदे 120,000 ते जादा लोक ए, जो आपणे खरे-बुरे रा पेत नि जाणदे। एते ते अलावा बेकसूर डांगर बी ए। तेबे क्या माखे एस बड़े शईरो रिया तँईं दु:खी नि ऊणा चाईयो?”
Currently Selected:
योना 4: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
