योएल 3
3
परमेशरो सबी देशा रा न्याय करना
1यहोवा ये बोलोआ, “सुणो, जिना दिना दे ओर जेस बखतो दे मां यहूदा ओर यरूशलेमो रे रणे वाल़े गुलामिया ते वापस ली आऊणे, 2तेस बखते मां सारे देशो रे लोक कट्ठे करी की यहोशापातो#3:2 यहोशापातो यहोवा न्याय करोआ री तराईया दे लई जाणे ओर तेती तिना साथे आपणी प्रजा, मतलब आपणा निज इस्सा इस्राएलो रे बारे दे जो तिने दूजी जातिये मेरा देश इस्राएल आपू बीचे बांडी ला था: इजी री खातर मां तेती तिना जातिया रा न्याय करना। 3तिने मेरे लोका रिया तँईं पर्चिया पाईया। तिने वेश्या खे पाणे रिया तँईं आपणे माठे गुलाम बनाणे खे बेचीते। तिने शराबो रिया तँईं खे बेटिया बेची तिया।”
4ओ सोर, ओर सिदोन शईरो रे लोको ओर ओ पलिश्तीन प्रदेशो रे लोको, मैं तुसा रा कोई नुकशाण नि करी राखेया! इजी री खातर जे तुसे मांते बदला लणे री कोशिश करने लगी रे ओ, तो मां तुसा ते तुसा रे कामा रा बदला लणा। 5कऊँकि तुसे मेरे मन्दरो ते सूईना-चाँदी ओर कई कीमती चीजा लूटी लिया ए ओर सेयो आपणे मन्दरो दे लई जाई की राखी तिया दिया ए। 6यहूदा ओर यरूशलेमो रे लोक तिना रे दुश्मणे यूनानिया खे जो यावानो रे वंशो रे थे इजी री खातर बेचे, ताकि सेयो आपणे देशो ते दूर कित्ते जाओ। 7इजी री खातर सुणो, पर एबे मां सेयो बदला लणे खे पड़काणे। मां सेयो तेते जगा ते वापस ल्याऊणे जेती तुसे सेयो बेचे थे। ओर मां तुसा साथे सेई करना जो तुसे तिना साथे कित्तेया था। 8मां तुसा रे माठे-बेटिया मतलब आऊणे वाल़ी पीढ़ी यहूदिया रे आथो दे बिकवाई देणे ओर तिना सेयो शबाई जातिया रे लोका रे आथो दे बेची देणे, कऊँकि परमेशरे ये बोली राखेया। 9सबी देशा रे लोका दे ये प्रचार करो, युद्धो री त्यारी करो, आपणे योद्धा खे त्यार करो। सारे योद्धा नेड़े आई की लड़ने खे आगे बढ़ो। 10आपणे-आपणे अल़ो रे फाल़े खे कूटी की तलवारा ओर आपणी-आपणी दाचिया खे कूटी की बड़छे बणाओ, जो कमजोर ओ से बी बोलो, आऊँ वीर ए।
11ओ चऊँ कनारले देशा रे लोको, फटाफट आओ ओर कट्ठे ऊई जाओ। ओ यहोवा, तूँ बी आपणे शूरवीरा खे तेती लई जा। 12सबी देशा रे लोक त्यार ऊई की आगे बढ़ी की आओ ओर यहोशापातो री तराईया दे लड़ने खे आई जाओ, कऊँकि तेती मां चऊँ कनारली जातिया रा न्याय करने खे बैठणा। 13सेयो बडाईया खे त्यार फसला जेड़े ए; इजी री खातर तिना पाँदे आथ चलाओ, जेड़े एक जिम्मीदार फसला खे बाडणे खे आपणी दाची चलाओआ। सेयो अंगूरा जेड़े ए जिना खे गड्डेया दे ऊच्चा टेर लगाई की राखी राखेया ए, जेती तिना खे केसेया जाओआ। कऊँकि सेयो बऊत दुष्ट ए, तिना खे एबु सख्त सजा देयो, जेड़े एक जिम्मीदार अंगूरा खे रसकुण्डो दे तदुए तक केसदा रओआ जदुए तक कि रस निकल़ना बन्द नि ऊई जाओ। 14तेसा यहोशापातो री तराईया दे बऊत सारे लोक ए। कऊँकि तेते तराईया दे यहोवे रा दिन नेड़े ए। 15सूरज ओर चाँदो आपणा-आपणा प्रयासा नि देणा ओर ना तारे चमकणे। 16परमेशर यहोवा सिय्योनो ते गरजणा ओर यरूशलेमो दे गरजणा सुणना जेते री बजा ते सर्ग ओर तरती काँबी जाणे। पर यहोवा आपणी प्रजा खे शरण देणे री जगा ओर इस्राएलिया खे मजबूत गढ़ ठईरना।
परमेशरो रे लोका खे आशीष
17तेबे तुसा जाणी लणा कि आऊँ तुसा रा परमेशर यहोवा, आऊँ आपणे पवित्र पाह्ड़ सिय्योनो पाँदे वास करूँआ। यरूशलेम सदा पवित्र रणा, ओर परदेशी सिपाई तेसखे फेर कदी बी जीती नि सकणे। 18तेस बखते पाह्ड़ो ते अंगूरा रा रस टपकणा। पाह्ड़िया ते दूद बईणा। यहूदा प्रदेशो रे सारे नाल़े पाणिए साथे परी जाणे ओर यहोवे रे मन्दरो बीचा ते एक सूबल़ निकल़नी, एस शित्तीम जगा खे पाणी देणा जेती बबूलो रे डाल़ जम्मोए। 19मिस्र देश ओर एदोम देशो रे लोके यहूदा रे लोका री अत्या कित्ती, तिने तिना रे देशो दे बेकसुर लोका रा खून बाह्ई राखेया, एबे मिस्र देश ऊजड़ ओर एदोम देश उजड़ेया दा रेगिस्तान ऊई जाणा। 20पर यहूदा सदा ओर यरूशलेम हमेशा खे बणेया दा रणा। 21जिना देशा रे लोके इस्राएलो रे बेकसूर लोका री अत्या करी राखी, तिना ते मां बदला लणा, मां तिना रे खूनो रा पाप माफ नि करना। कऊँकि परमेशर यहोवा सिय्योन रे पाह्ड़ो पाँदे वास करोआ।
Currently Selected:
योएल 3: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
