होशे 9
9
यहोवे रा इस्राएलिया खे सजा देणा
1ओ इस्राएल, तूँ दूजे देशा रे लोका जेड़ा खुशिया नि मना! कऊँकि तूँ आपणे परमेशरो रे प्यारो खे छाडी की वेश्या जेड़ा बणेया। ईंयाँ तैं वेश्या रा जा काम कित्तेया। तैं नज्जो रे सबी खल्याणा दे वेश्या री कमाई खुशिया साथे लई। 2पर छोड़ ई ताखे खुल़ाणे खे खल्याणो दे कोई नज्ज या अंगूरा रा रस नि ऊणा। एथो तक कि कोई नवां शराब पनि ऊणा। 3इस्राएलो रे लोक यहोवे रे देशो दे नि रयी सकणे, पर एप्रैम मिस्रो दे वापस ऊई जाणा ओर तिना अश्शूरो दे सेयो अशुद्ध चीजा खाणिया पड़निया जो तिना खे नि खाणिया चाईयो थिया। 4तुसे इस्राएली लोक यहोवे खे शराबो रा अर्घ नि चढ़ाई सकणे, ना ई तेसखे बलिदान ल्याई सकणे। तुसा रे कोई बी दूजे बलिदान तेसखे खुश नि करी सकदे; सेयो तेसखे पसन्द नि ऊणे, जेड़े शोगो दे लोक जेस खाणे खे छूँओ ए, ओर जो कोई बी तेस खाणे खे खाओगा सेयो सब अशुद्ध ऊई जाणे। तिना खे खाणा आपू खे खाणे री इजाजत ऊणी, पर तिना खे ये मन्दरो दे ल्याऊणे री इजाजत नि ऊणी। 5ठराए रे त्योआरो रे दिन ओर परमेशरो रे खास दिना दे तुसा क्या करना?
6देखो, तुसा बीचा ते कुछ लोक नाश ऊणे ते बची जाणे। पर तुसे मिस्रो दे मरी जाणे। तुसा रिया लाशा तिना मेम्फिस जगा दे दबाई देणियां। तुसा रे चाँदिए रिया अच्छी चीजा पाँदे चीं जमीं जाणी। तुसा रे तम्बूआ दे कांडेया कब्जा करी लणा। 7से दिन आऊणे वाल़ा ए जेबे परमेशरो तुसा खे सजा देणी। से दिन जेबे तेस तुसा रा न्याय करना, नेड़े आ। आऊँ चाऊँआ कि इस्राएलो खे पता चलो कि तुसे बऊत पाप करी राखे। ओर तुसे मांते बऊत नफरत करोए। इजी री खातर तुसे सोचोए कि भविष्यबक्ता मूर्ख ए। तुसे सोचोए कि जेस माणूंए रे जरीये यहोवा बोलोआ से पागल ए। 8परमेशरे आऊँ आपणे लोका एप्रैमो खे चतौणी देणे खे एक नबीए रे रूपो दे पेजी राखेया। फेर बी आऊँ जेती बी जाऊँआ, तेती तुसे माखे एकी एड़िए रे जाल़ो दे पंछिए जेड़े फसाणे री कोशिश करोए। एथो तक कि परमेशरो रे मन्दरो दे बी लोक नबीए रे दुश्मण ए। 9इस्राएली लोक बऊत ई बुराईया वाल़े काम करोए, जेड़े कि गिबा शईरो दे तिने जो खतरनाक पाप कित्ते थे। परमेशरो तिना रे जरीये कित्ते दे बुरे काम नि पुलणा। तेस पक्का तिना खे तिना रे पापा री सजा देणी। यहोवा आपणे लोका खे चतौणी देओआ।
इस्राएलो रा पाप ओर तेसरा प्रतिफल
10यहोवा बोलोआ, “जेबे मैं पईली बार इस्राएली लोका री मताद करने खे काम शुरू कित्तेया, तो माखे एड़ा लगेया जेड़े कि माखे रेगिस्तानो दे अंगूर मिली गे ओ। तुसा रे बुजुर्ग हर साल दाऊगल़ेया रे डाल़ो दे जम्मणे वाल़े पईले दाऊगल़े अंगूरा जेड़े थे। पर जेबे सेयो बालपोर पाह्ड़ो पाँदे आए, तो तिने तेसा बालो री मूर्तिया री पूजा कित्ती, ओर सेयो तेसा मूर्तिया जेड़े ई घृणित ऊईगे जेतेते सेयो प्यार करो थे। 11एप्रैमो रा वैभव पंछिये जेड़ा उडी जाणा, ना तो केसी रा जन्म ऊणा, ना केसी रे गर्भ रणा ओर ना कोई जवाणस गर्भवती ऊणी। 12चाए तुसा रे बच्चे बड़े बी ऊई जाओ तेबे बी मां सेयो तुसा ते छुड़ाई लणे। हाय! से दिन बऊत बुरा ऊणा जेबे मां तुसा लोका खे कल्ले छाडी की चली जाणा।” 13मैं एप्रैम बांका ओर भरा पूरा देखेया, जो सोर शईरो जेड़ा ए, पर एबे इस्राएलो रे लोका खे आपणे बच्चेया खे दुश्मणा रे जरीये मरवाणे रिया तँईं लई जाणे खे मजबूर ऊणा पड़ना।
14ओ यहोवा, आऊँ तेरी प्रजा खे क्या मांगू? मां एड़ी कोख मांगणी जो बच्चेया खे पैदा नि करो ओर एड़ी छाती मांगणी जो दूद नि देयो। 15तिना री सारी बुराई गिलगालो दे ए, मैं तिना साथे तेथी नफरत कित्ती। तिना रे बुरे कामो रिया बजा ते मां सेयो आपणे कअरो ते निकयाल़ी देणे ओर तिना साथे फेर प्यार नि राखणा, कऊँकि तिना रे सारे परदान बगावत करने वाल़े ए। 16एप्रैम एकी बेकार बेली जेड़ा ए। इजी रिया जड़ी सूकी गिया रिया ए। मानी लो कि एप्रैमो रे लोका रे बच्चे ए। तो मां सेयो काई देणे तिना ते सेयो प्यार करोए। 17कऊँकि तिने तेसरी गल्ल नि सुणी, इजी री खातर मेरे परमेशरो सेयो छाडी देणे; सेयो दूजी जातिया बीचे पटकदे रणे।
Currently Selected:
होशे 9: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
