होशे 5
5
यहोवे इस्राएल ओर यहूदा रे लोका रा न्याय करना
1यहोवा बोलोआ, “ओ पुरोईतो, ये गल्ल सुणो! ओ इस्राएलो रे लोको, तुसे त्यान देई की सुणो! ओ राजे रे कराने रे लोको, तुसा खे बी सुणना चाईयो! कऊँकि आऊँ तुसा रा न्याय करने लगी रा! तुसा रा मूर्तिपूजा करना मिस्पा शईरो दे एकी जाल़ो जेड़ा ए; ये ताबोर पाह्ड़ो पाँदे लोका खे लगाए दे जाल़ो जेड़ा ए। 2तिने बिगड़े रेया बड़ी पारी अत्या करी राखी, इजी री खातर मां तुसा सबी खे सजा देणी।” 3आऊँ एप्रैमो रे लोका रे बारे दे सब कुछ जाणूंआ। इस्राएल जो व्याभिचार करने लगी रा, से मांते नि छिपी रा। एबे सेयो दूजे देवतेया ते मिली गये दे ए। तिने आपणे आपू खे अशुद्ध बणाई ला रा ए। 4तिना रे काम तिना खे आपणे परमेशरो री तरफा खे फिरने नि देंदे, कऊँकि तिना दे व्याभिचार करने वाल़ी आत्मा रओई ओर सेयो यहोवे खे नि जाणदे।
5इस्राएलो रा कमण्ड तेसरे ई खलाफ गवाई देयोआ ओर इस्राएल ओर एप्रैमो आपणे पापो रिया बजा ते ठोकर खाणी ओर यहूदा प्रदेशो बी तिना साथे ठोकर खाणी। 6सेयो आपणी पेडा-बाकरिया ओर गायी-बल़दा खे लई की परमेशरो खे टोल़ने चलणे, पर तिना खे से नि मिलणा, कऊँकि से तिना ते दूर ऊई गा दा ए। 7तिने यहोवे साथे विश्वासघात करी राखेया ए। तिना रे बच्चे तिना रे नि ए। इजी री खातर जिंयाँ ई नवें चाँदो रा त्योआर आऊणा, तेस सेयो ओर तिना रा देश नाश करी देणा। 8गिबा शईरो दे नरसिंगा ओर रामा शईरो दे तुरही बजाओ! बेतावेन शईरो रे लोका खे चतौणी देयो; ओ बिन्यामीन गोत्रो रे सिपाईयो, लड़ाईया दे आगे चलो। 9न्याय रे दिने एप्रैम ऊजड़ ऊई जाणा, जेसा गल्ला रा ऊणा जरूरी ए, मैं तिजी रा ई सन्देस इस्राएलो रे सबी गोत्रा खे देई राखेया। 10यहूदा प्रदेशो रे परदान तिना जेड़े ऊई रे जो बन्ना बढ़ाई लओए, मां तिना पाँदे आपणा रोष पाणिए जेड़ा बरसाणा।
11एप्रैमो रे लोका पाँदे अन्देर करी राखेया, से मुकद्दमा अरी गा रा, कऊँकि से मन लगाई की तेसा आज्ञा पाँदे चलेया। 12मां एप्रैम एड़ा नाश करना जेड़े कोई कीड़ा केसी टाल्ले रे टुकड़े खे खराब करी देयोआ। यहूदा मां तेड़ा नाश करी देणा जेड़े सड़ने रिया बजा ते लकड़िया रे टुकड़े खराब ऊई जाओए। 13एप्रैमो रे लोक जाणो थे कि सेयो ठीक नि ए। यहूदा रे लोक जाणो थे कि तिना रे काओए। एप्रैमो रे परदाना खे परोसा था कि अश्शूरो तिना री मताद करनी। तिने अश्शूरो रे महान राजे ते मताद मांगी राखी। पर से तुसा खे ठीक करने जोगा नि ए। से तुसा रे काओ ठीक नि करी सकदा। 14मां एप्रैम ओर यहूदा रे लोका पाँदे जवान शेरो जेड़े अमला करना। मां आपू तिना रे टुकड़े-टुकड़े करी देणे ओर फेर छाडी देणे। जेबे मां सेयो रगड़ी की निणे तेबे तिना खे कोई बी मांते छुड़ाई नि सकणे। 15मां फेर आपणियां जगा पाँदे आई जाणा जदुए तक कि सेयो आपणे पाप नि मानी लंदे ओर मेरा दर्शण नि मांगी लओ। ओर जेबे सेयो मुसीबता दे पड़ने, तेबे तिना आऊँ मन लगाई की टोल़ना।
Currently Selected:
होशे 5: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
