हबक्कूक 1
1
1ये से सन्देस ए जो नबी हबक्कूके एकी दर्शणो रे जरीये देखेया था।
हबक्कूको री शकाईत
2मैं बोलेया, “ओ यहोवा, मां कदुओ तक तांते प्रार्थना करदे रणा ओर तां नि सुणना? आऊँ तांते मतादा रिया तँईं बिनती करूँआ ओर बोलूँआ कि लोक हर जगा लड़ाई चगड़ा करने लगी रे, पर तूँ आसा खे नि बचांदा। 3तूँ माखे अनर्थ काम कऊँ दखाएया? क्या बजा ए कि तूँ उत्पाद देखदा ई रएया? मां सामणे लूट-पाट ओर उपद्रव ऊँदे रओए ओर चगड़ा ऊँदा रओआ ओर बईस बढ़दी जाओई। 4इजी री खातर बिधान कमजोर ऊईगा रा ओर न्याय कदी बी दिशदा नि ए। दुष्ट लोक तर्मिया खे केरी लओए, इजी री खातर बिधान एबे निष्पक्ष नि रईगा दा ए।”
परमेशर ज्वाब देओआ
5तुसे सब लोक दूजे देशा खे त्यानो साथे देखो। जो कुछ ऊणे लगी रा तिजी खे देखी की तुसे बऊत हैरान ऊई जाणे। जदुए तक तुसे जिऊँदे ए, मां एक बऊत ई अचम्बे रा काम करना। जे कोई तुसा खे बताओ बी तो तुसा परोसा नि करना। 6देखो, आऊँ कसदिया खे उभारने वाल़ा ए, सेयो गुस्से वाल़े ओर जल्दबाजी करने वाल़ी जाति ए, जो ओरी री रणे री जगा रे अधिकारी ऊणे खे पूरी तरतिया दे फैली गे रे। 7सेयो खतरनाक ओर डराऊणे ए, सेयो आपू ई आपणे न्याय री बडयाई ओर तारीफा री बजा ए। 8तिना रे कोड़े चीतेया ते बी जादा तेज चलणे वाल़े ए ओर साँजा खे शिकार करने वाल़े भेड़िये ते बी जादा गुस्से वाल़े ए, तिना रे सवार दूर-दूर उटकदे ऊए आओए। आ, सेयो दूरो ते आओए ओर शिकारो पाँदे चाफ बाणे वाल़े उकाबो जेड़ी चाफ बाओए। 9सेयो सारे के सारे दूजेया खे नाश करने रिया तँईं त्यार ऊई की बैठी रे। तिना री बड़ी सेना रेगिस्तानो ते आऊणे वाल़ी अवा जेड़ी आगे बढ़ोई। सेयो कैदिया खे बालूए रिया कणियां जेड़े कट्ठा करोए। 10सेयो राजेया रा मजाक उडाओए ओर परदाना रा मजाक करोए, सेयो सबी मजबूत किलेया पाँदे आसोए, कऊँकि सेयो किलाबंदी बानी की तिना खे जीती लओए। 11तेबे सेयो अवा जेड़े एकदम निकल़ी जाओए ओर आगे चली जाओए सेयो दोषी ए। सेयो आपणी तागती रे देवते री पूजा करोए।
हबक्कूको रा फेर दशा बताणा
12ओ परमेशर यहोवा, ओ मेरे पवित्र परमेशर, क्या तूँ शुरूए ते ई नि ए? इजी बजा ते आसे लोक नि मरने। ओ यहोवा, तैं सेयो न्याय रिया तँईं ठराई राखे, ओर ओ चट्टान, तैं यो बकणे रिया तँईं बठयाल़ी राखे। 13तेरी आखी एड़िया शुद्ध ए कि तूँ बुराईया खे देखी नि सकदा ओर उत्पादो खे देखी की चुप नि रयी सकदा, तेबे तूँ विश्वासघातिया खे कऊँ देखदा रएया ओर जेबे दुष्ट निर्दोषो खे निगल़ी जाओआ, तेबे तूँ कऊँ चुप रएया? 14तूँ माणूंआ खे समुद्रो री मछलिया जेड़ा ओर लूरने वाल़े जन्तुआ जेड़ा बणाएया, जिना पाँदे कोई राज करने वाल़ा नि ए? 15दुष्ट माणूं तिना सबी खे ऊका साथे पकड़ी की चकी लओआ, से तिना खे आपणे जाल़ो दे फसाई लओआ, से आपणे तेस जाल़ो दे कट्ठा करी लओआ, ओर ईंयाँ से खुश ओर मगन ओआ। 16सेयो आपणे तिना जाल़ा री पूजा करोए, जिना रे जरीये तिने आसे पकड़े थे, ओर तिना बढ़ेया जाल़ा रे आगे बलि चढ़ाणी ओर तिना रे सामणे तूप बाल़ना। तिना बोलणा, “तिना जाल़ा रिया बजा ते आसे अमीर बणी रे ओर मईंगा खाणा खाणे लाईक बणीगे दे। 17क्या तां तिना खे एड़ा करने देंदे रणा? क्या तिना आपणे जाल़ो दे जितणी बार चाओ मछलिया परदे रणा? क्या तिना दूजे देशा खे नाश करदे रणा ओर रूकणा नि?”
Currently Selected:
हबक्कूक 1: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
