उत्पत्ति 48
48
याकूबो रे जरीये यूसुफो रे पाऊआ खे आशीर्वाद
1इना गल्ला ते बाद किने यूसुफो खे बोलेया, “तेरा बाओ बमार ए।” तेबे से मनश्शे ओर एप्रैम नाओं रे आपणे दुँईं पाऊआ खे साथे लई की तेसगे गया। 2किने याकूबो गे बताईता कि तेरा पाऊ यूसुफ तांगे आऊणे लगी रा, तेबे इस्राएल आपू खे सम्बाल़ी की माँजे पाँदे बैठीगा।
3ओर याकूबे यूसुफो खे बोलेया, “सर्वशक्तिमान परमेशरे कनान प्रदेशो रे लूज शईरो रे नेड़े माखे दर्शण देई की आशीष दित्ती, 4ओर बोलेया, ‘सुण, मां तूँ फल़वंत करना ओर तेरा वंश बढ़ाणा ओर तूँ राज्य-राज्य री मण्डल़िया रा मूल़ बनाणा ओर तांते बाद तेरे वंशो खे ये देश देई देणा, जेते कि ये सदा खे तिना री आपणी जमीन बणी री रओ। 5ओर एबे तेरे दोनो पाऊ, जो मिस्र प्रदेशो रे मेरे आऊणे ते पईले पैदा ऊए, सेयो मेरे ई ठईरने; मतलब रूबेन ओर शिमोन मेरे ए, तिंयाँ ई एप्रैम ओर मनश्शे बी मेरे ठईरने। 6ओर तिना ते बाद जो तेरी ल्वाद पैदा ओ, से तेरे तो ठईरने, पर बटवारे रे बखते सेयो आपणे पाईया रे कुलो रेई गिणे जाणे।’ ” 7आऊँ पद्दानो ते आऊणे लगी रा था, तेबे एप्रात पऊँचणे ते थोड़ी ई दूर पईले राहेल कनान प्रदेशो रे, बाटा रे, मां सामणे मरी गी ओर मैं तेसा खे एप्रात मतलब जेतेखे बेतलेहम बी बोलोए, तेसी बाटा रेई माट्टी दित्ती।
8तेबे इस्राएलो खे यूसुफो रे पाऊ दिशे ओर तिने पूछेया, “ये कुण ए?”
9यूसुफे आपणे बाओ खे बोलेया, “ये मेरे पाऊ ए, जो परमेशरे माखे एती दित्ते।” इस्राएले#48:9 याकूब बोलेया, “इना खे मांगे ली आओ, कि आऊँ इना खे आशीर्वाद देऊँ।” 10इस्राएलो रिया आखी स्याणा ऊणे रिया बजअ ते तुँदल़िया ऊईगिया थिया, एथो तक कि तेसखे कम दिशो था। तेबे यूसुफ तिना खे तेसगे लईगा ओर तिने सेयो गल़े लगाए।
11तेबे इस्राएले यूसुफो खे बोलेया, “माखे उम्मीद नि थी कि मां तेरा मूँ फेर देखणा पर देख, परमेशरे माखे तेरा वंश बी दखाया।” 12तेबे यूसुफे सेयो आपणे बाओ रे जानूआ बीचा ते टाई की ओर आपणे मुंए रे पारे जमीना पाँदे चूकी की माथा तेकेया। 13तेबे यूसुफे सेयो दोनो लई की, मतलब एप्रैमो खे आपणे दाँणे आथो ते, कि से इस्राएलो रे खूँजे आथो रे पड़ो ओर मनश्शे खे आपणे खूँजे आथो ते, कि से इस्राएलो रे दाँणे आथो रे पड़ो, तिना खे तेसगे लईगा। 14तेबे इस्राएले आपणा दाँणा आथ बढ़ाई की एप्रैमो रे सिरो पाँदे जो छोटा था ओर आपणा खूँजा आथ बढ़ाई की मनश्शे रे सिरो पाँदे राखी ता; तिने तो जाणी बूजी की एड़ा कित्तेया, नई तो जेठा मनश्शे ई था। 15फेर तिने यूसुफो खे आशीर्वाद देई की बोलेया, “परमेशर जेस सामणे मेरे बुजुर्ग अब्राहम ओर इसहाक चलो थे, सेई परमेशर मेरे जन्मो ते लई की आजके दिनो तक मेरा ग्वाला बणी रा;#48:15 इब्रानी 11:21 16ओर सेई दूत माखे सारी बुराईया ते छुड़ांदा आई रा, सेई एबे इना माठेया खे आशीष देओ ओर ये मेरे ओर मेरे बुजुर्ग अब्राहम ओर इसहाको रे ठईरो ओर तरतिया पाँदे बऊत जादा बढ़ो।”#48:16 इब्रानी 11:21
17जेबे यूसुफे देखेया कि मेरे बाओ आपणा दाँणा आथ एप्रैमो रे सिरो पाँदे राखी राखेया, तेबे तेसखे ये गल्ल बुरी लगी; इजी खे तिने आपणे बाओ रा आथ एते इच्छा ते पकड़ी ला कि एप्रैमो रे सिरो ते चकी की मनश्शे रे सिरो पाँदे राखी देओ। 18ओर यूसुफे आपणे बाओ खे बोलेया, “ओ मेरे बाओ, एड़ा नि; कऊँकि जेठा येई ए; आपणा दाँणा आथ एसरे सिरो पाँदे राख।” 19पर तेसरे बाओए बोलेया, “ना, सुण, ओ मेरे पाऊ, आँऊ एसा गल्ला खे ठीक टंगो दे जाणूंआ बल्कि एसते बी माणूंआ री एक मण्डल़ी पैदा ऊणी ओर ये बी महान् ऊई जाणा, तेबे बी एसरा छोटा पाई एसते जादा महान् ऊई जाणा ओर तेसरे वंशो ते बऊत जातिया निकल़निया।” 20फेर तिने तेस ई दिने ये बोली की तिना खे आशीर्वाद दित्तेया, “इस्राएली लोका तेरा नाओं लई की एड़ा आशीर्वाद देया करना, ‘परमेशर ताखे एप्रैम ओर मनश्शे जेड़ा बणाई देओ,’ ” ओर तिने मनश्शे ते पईले एप्रैमो रा नाओं लया।
21तेबे इस्राएले यूसुफो खे बोलेया, “देख, आँऊ तो मरने वाल़ा ए पर परमेशरो तुसा लोका री मताद करनी ओर तुसे तुसा रे पितरा रे प्रदेशो दे फेर पऊँचाई देणे। 22ओर आँऊ ताखे तेरे पाईया ते जादा जमीना रा एक इस्सा देऊँआ, जो मैं एमोरिया रे आथो ते आपणी तलवार ओर धनुषो रे बलबूते पाँदे लई राखेया।”#48:22 यूह. 4:5
Currently Selected:
उत्पत्ति 48: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
