उत्पत्ति 43
43
बिन्यामीनो खे लई की मिस्र प्रदेशो खे जाणा
1कनान प्रदेशो रे अकाल़ ओर बी खतरनाक ऊँदा गया। 2जेबे से नज्ज जो सेयो मिस्रो ते ल्याये थे, खत्म ऊईगा, तेबे तिना रे बाओए तिना खे बोलेया, “फेर जाई की आसा खे थोड़िया जिया खाणे रिया चीजा मोले लई आओ।”
3तेबे यहूदे आपणे बाओ याकूबो खे बोलेया, “तिने माणूंए आसा खे चेतावणी देई की बोली राखेया, ‘जे तुसा रा पाई तुसा साथे नि आया तो मां सामणे नि आऊणा।’ 4इजी री खातर जे तूँ म्हारे पाईए खे आसा साथे पेजेगा, तेबे तो आसे जाई की तेरिया खातर खाणे रिया चीजा मोले ली आऊँगे; 5पर जे तैं से नि पेजेया, तो आसा नि जाणा, कऊँकि मिस्र प्रदेशो रे अधिकारिए बोली राखेया, ‘जे तुसा रा पाई तुसा साथे नि ओ, तो तुसे मां सामणे नि आएओ’ ”
6तेबे इस्राएले बोलेया, “तुसे तेस माणूंए खे ये बताई की कि म्हारा एक ओर पाई ए, मां साथे बुरा बर्ताव कऊँ कित्तेया?”
7तिने बोलेया, “जेबे तिने माणूंए आसा ते म्हारी ओर म्हारे टब्बरो री दशा रे बारे दे ईंयाँ पूछेया, ‘क्या तुसा रा बाओ एबुए तक जिऊँदा ए? क्या तुसा रे कोई ओर पाई बी ए?’ तेबे आसे इना सवाला रे मुताबिक तेसगे बताया; फेर आसा खे क्या पता था कि तेस बोलणा, ‘आपणे पाईए खे एती ली आओ।’ ”
8फेर यहूदे आपणे बाओ याकूबो खे बोलेया, “एस पाऊए खे मां पाँदे परोसा करी की मां साथे पेजी दे, कि आसे मिस्र प्रदेशो रे जाई सकूँ; ताकि आसे, तूँ ओर म्हारे बाल-बच्चे मरने नि, बल्कि जिऊँदे रई सकिए। 9आँऊ तेसरा जिम्मेबार ए, मेरे ई आथो ते तूँ तेसखे वापस लया। जे आऊँ तेसखे तांगे पऊँचाई की तेरे सामणे खड़ा नि करी देऊँ, तेबे तो आऊँ सदा खे तेरा पापी ऊणा। 10जे आसे देर नि करदे तो एबुए तक दूजी बार वापस आई जाणे थे।”
11तेबे तिना रे बाओ इस्राएले तिना खे बोलेया, “जे सच्ची एड़ी गल्ल तो एड़ा करो कि एस प्रदेशो रिया खास-खास चीजा बीचा ते थोड़िया-थोड़िया आपणेया बोरेया रे परी की तेस माणूंए खे पेंट लई जाओ; जिंयाँ थोड़ा जा बलसान ओर थोड़ा जा सईत ओर कुछ खुशबू वाल़िया चीजा, गन्दरस, पिस्ते ओर बदाम। 12फेर आपू साथे दुगणा पैसा लई जाओ ओर जो पैसा तुसा रे बोरेया रे मुरे रे राखी की वापस करिता था, से बी लंदे जाओ, क्या पता ये पूला ते ऊआ ओ। 13आपणे पाईए खे बी साथे लई की तेस माणूंए गे फेर चली जाओ, 14सर्वशक्तिमान परमेशर तेस माणूंए खे तुसा पाँदे दयालु बणाओ, जेते कि से तुसा रे दूजे पाईए खे ओर बिन्यामीनो खे बी आऊणे देओ ओर जे आऊँ निर्वंश ऊईगा तो ऊणे देओ।” 15तेबे तिने माणूंए से पेंट, ओर दुगणा पैसा ओर बिन्यामीन बी साथे लया ओर चली पड़े ओर मिस्र प्रदेशो रे पऊँची की यूसुफो सामणे खड़े ऊईगे।
यूसुफो रे कअरे तेसरे पाईया रा आऊणा
16तिना साथे बिन्यामीनो खे देखी की यूसुफे आपणे कअरो रे अधिकारिए खे बोलेया, “इना माणूंआ खे कअरे पऊँचाई दे ओर जानवर काई की रोटी त्यार करो; कऊँकि इना लोका त्याड़िया मां साथे रोटी खाणी।” 17तेबे से अधिकारी मर्द यूसुफो रे कईणे रे मुताबिक तिना मर्दा खे यूसुफो रे कअरे लईगा।
18जेबे सेयो यूसुफो रे कअरे पऊँचाई ते तेबे सेयो आपू बीचे डरी की बोलणे लगे, “जो पैसा पईली बार म्हारे बोरेया रे वापस करी ता था, तिजी रिया बजअ ते आसे पीतरे बुलाई राखे; जेते कि से माणूं आसा पाँदे टूटी की पड़ो ओर आसा खे वशो रे करी की आपणा दास बणाओ ओर म्हारे गह्देया खे बी छुड़ाई लओ।” 19तेबे सेयो यूसुफो रे कअरो रे अधिकारिए रे नेड़े जाई की कअरो रे दरवाजे पाँदे जाई की ईंयाँ बोलणे लगे, 20“ओ म्हारे यहोवा, जेबे आसे पईली बार नज्ज मोले लणे आए थे, 21तेबे आसे सरांयी रे पऊँची की आपणे बोरे खोले, तो आसे देखेया कि एकी-एकी जणे रा सारा-सारा पैसा तेसरे बोरे रे मुरे रे राखी राखेया; इजी री खातर आसे से पैसा फेर वापस ली आई रे। 22ओर दूजा पैसा बी खाणे रिया चीजा मोले लणे खे ल्याई राखे; आसे नि जाणदे कि म्हारा पैसा म्हारेया बोरेया रे किने राखी ता था।”
23तिने बोलेया, “तुसे ठीक-ठाक रओ, डरो नि, तुसा रा परमेशर, जो तुसा रे बाओ रा बी परमेशर ए, तिने ई तुसा खे तुसा रे बोरेया रे पैसा दित्तेया ऊणा, तुसा रा पैसा तो माखे मिलीगा था।” तेबे तिने शिमोन निकयाल़ी की तिना साथे करिता। 24तेबे तिने अधिकारिए तिना माणूंआ खे यूसुफो रे कअरे लई जाई की तिना खे पाणी दित्तेया, तेबे तिने आपणे पैर तोये; फेर तिने तिना रे गह्देया खे चारा दित्तेया। 25तेबे ये सुणी की कि आज आसा खे एथी रोटी खाणी पड़नी, तिने यूसुफो रे आऊणे रे बखतो तक, मतलब त्याड़िया तक से पेंट कट्ठी करी ली। 26जेबे यूसुफ कअरे आया, तेबे तिने से पेंट, जो तिना रे आथो रे थी, तेसरे सामणे कअरे लईगे ओर जमीना पाँदे चूकी की तेसगे माथा तेकेया।
27तिने तिना रा सुखसाँद पूछेया ओर बोलेया, “क्या तुसा रा स्याणा बाओ, जेसरे बारे दे तुसे बताया था ठीक ए? क्या से यबुओ तक जिऊँदा ए?”
28तिने बोलेया, “आ, तेरा दास आसा रा बाओ ठीक ए ओर एबुओ तक जिऊँदा ए।” तेबे तिने सिर चुकाई की फेर माथा तेकेया।
29तेबे तिने आखी चकी की आपणे सके पाई बिन्यामीनो खे देखी की पूछेया, “क्या तुसा रा छोटा पाई जेसरे बारे दे तुसे मांगे बताया था, येई ए?” यूसुफे बोलेया, “ओ मेरे पाऊ, परमेशर तां पाँदे दया करो।” 30तेबे आपणे पाईए रे प्यारो ते मन परने रिया बजअ ते ओर ये सोची की कि आऊँ केई जाई की रोऊँ, यूसुफ तेबुई आपणी कोठरिया रे गया ओर तेती रोणे लगेया। 31फेर आपणा मूँ तोई की निकल़ी की आईगा ओर आपू खे शांत करी की बोलेया, “रोटी पाओ।” 32तेबे बाँडणे वाल़ेया यूसुफो खे तो लग ओर पाईया खे बी लग ओर जो मिस्री तेस साथे खाओ थे, तिना खे बी लग, रोटी परोसी; कऊँकि मिस्री इब्रिया साथे रोटी नि खाई सकदे, बल्कि मिस्री एड़ा करना नफरत समजो थे। 33यूसुफो रे पाई तेस सामणे, बड़े-बड़े पईले ओर छोटे-छोटे पीछे आपणी-आपणी उम्रा रे मुताबिक, बठयाल़े; ये देखी की सेयो हैरान ऊई की एकी-दूजे खे देखणे लगे। 34तेबे यूसुफ आपू सामणे ते खाणे रिया चीजा चकी-चकी की तिना गे पेजणे लगेया ओर बिन्यामीनो खे आपणे पाईया ते पाँज गुणा जादा खाणे खे मिलेया ओर तिने तेस साथे रजी की खाया-पिया।
Currently Selected:
उत्पत्ति 43: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
