उत्पत्ति 34
34
दीना खे प्रष्ट करना
1एकी दिने लिआ री बेटी दीना, जो याकूबो ते पैदा ऊई थी, कनान प्रदेशो रे शकेम शईरो रिया बेटिया साथे जेती से रओ थी मिलणे खे गई। 2तेबे तेस प्रदेशो रे हिब्बी लोका रे परदान हमोरो रे पाऊए शकेमे से देखी ओर से तेसा खे लईगा ओर तेसा साथे गल़त काम करी की से प्रष्ट करी ती। 3पर तेसरा मन याकूबो री बेटी दीना साथे लगी गा, इजी खे से तेसा रा प्यार जीतणे रिया तँईं तेसा बेटिया साथे प्यारो रिया गल्ला करने लगेया।
4तेबे शकेमे आपणे बाओ हमोरो खे बोलेया, “मेरा एसा बेटिया साथे ब्या कराई दे कि ये मेरी लाड़ी बणी जाओ।” 5जेबे याकूबे सुणेया कि शकेमे मेरी बेटी दीना प्रष्ट करी ती री, तेस बखते तेसरे पाऊ डांगरा साथे मैदानो रे थे, इजी खे से तिना रे आऊणे तक चुप रया। 6तेबे शकेमो रा बाओ हमोर एसा घटणा रे बारे दे जो ऊई थी याकूबो साथे गल्ल करने खे तेसगे आया। 7याकूबो रे पाऊए जेबे ये सुणेया तो सेयो मैदानो ते बऊत ई दु:खी ओर गुस्से रे ऊई की आए; कऊँकि शकेमे याकूबो री बेटिया री इज्जत माट्टिया रे मलाई की इस्राएलो रे कराने साथे मूर्खता रा एड़ा काम करी राखेया था, जो तेसखे एड़ा करना ठीक नि था।
8पर हमोरे तिना सबी खे बोलेया, “मेरा पाऊ शकेम तुसा री बेटी दीना खे दिलो ते चाओआ, इजी खे तेसा रा ब्या मेरे पाऊए साथे कराई देओ ताकि से तेसरी लाड़ी ऊई जाओ। 9ओर आसा साथे ब्या करेया करो; आपणी बेटिया आसा खे देया करो ओर म्हारी बेटिया खे तुसे लया करो। 10ओर आसा साथे बसे रे रओ; ओर ये देश तुसा सामणे पड़ी रा, इदे रई की लणा-देणा करो ओर इजी री जमीन आपू खे लई लो।”
11ओर शकेमे बी दीना रे बाओ याकूब ओर तेसा रे पाईया खे बोलेया, “जे तुसा लोका री मां पाँदे दया ओ, तो जो कुछ तुसे माखे बोलोगे, से मां तुसा खे देणा। 12तुसे मांते चाए कितणी बी कीमत या बदला माँगो, तेबे बी मां तुसा रे बोलणे रे मुताबिक देणा; पर तेसा बेटिया खे मेरी लाड़ी ऊणे खे माखे देई देओ।”
13तेबे ये सोची की कि शकेमे म्हारी बईण दीना प्रष्ट करी राखी, याकूबो रे माठेया, शकेम ओर तेसरे बाओ हमोरो खे छल़ो साथे ये जबाब दित्तेया, 14“आसे एड़ा काम नि करी सकदे कि केसी बिना खतना कित्ते रे मर्दो खे आपणी बईण देईए, कऊँकि इजी ते म्हारी बेज्जती ऊणी। 15याकूबो रे माठेया तिना खे ये बी बोलेया कि जे आसा जेड़ा तुसा बीचा ते हर एकी मर्दो रा खतना कित्तेया जाओ तेबे तो आसा तुसा री ये गल्ल मानी लणी। 16तेबे आसा आपणी बेटिया तुसा खे ब्यायी देणियां ओर तुसा री बेटिया आसा ब्यायी लणियां ओर तुसा साथे बसे रे बी रणे ओर आसे दोनो एक ई कराने रे माणूं ऊई जाणे। 17पर जे तुसे म्हारी गल्ल ना मानी की आपणा खतना नि कराओगे, तो आसा आपणी बईणा खे लई की एथा ते चली जाणा।”
18तिना री ये गल्ला सुणी की हमोर ओर तेसरा पाऊ शकेम खुश ऊईगे। 19ओर से जवान जो याकूबो री बेटिया खे बऊत चाओ था, तिने एस कामो खे करने रे देर नि कित्ती, कऊँकि से तो आपणे बाओ रे सारे कराने रे जादा जाणेया-मानेया रा मर्द था। 20तेबे हमोर ओर तेसरा पाऊ शकेम आपणे शईरो रे फाटको रे नेड़े जाई की शईरो रे रणे वाल़े लोका खे ईंयाँ समजयाणे लगे, 21“सेयो माणूं तो आसा साथे मिली-जुली की रणा चाओए, इजी खे तिना खे एते प्रदेशो रे रई की लेण-देण करने देओ; देखो, ये देश तिना खे बी बऊत ए। तेबे आसा तिना लोका रिया बेटिया ब्याई लणियां ओर आपणी बेटिया रा ब्या तिना साथे करेया करना। 22सेयो लोक एसा गल्ला पाँदे आसा साथे रणे ओर एक ई कराने रे माणूं ऊणे खे खुश ए कि तिना जेड़ा म्हारे सबी मर्दा रा बी खतना करेया जाओ। 23तिना रिया पेडा-बाकरिया, ओर गाय-बल़द बल्कि तिना रे सारे जानवर ओर तअन-दौल़त म्हारी ऊई जाणी। बस, आसा इतणा करना कि जे आसे लोक तिना री गल्ल मानी लऊँगे, तो सेयो आसा साथे रणे।” 24तेबे जितणे मर्द शकेम शईरो रे फाटको ते निकल़ो थे, तिने सबी हमोर ओर तेसरे पाऊए री गल्ल मानी ली ओर हर एकी मर्दो रा खतना कित्तेया। 25तीजे दिने जेबे सेयो लोक पीड़ा साथे पड़ी रे थे, तेबे एड़ा ऊआ कि शिमोन ओर लेवी नाओं रे याकूबो रे दो पाऊए, जो दीना रे पाई थे, आपणी-आपणी तलवारी साथे तेते शईरो रे बिना डरे कूसी की सब मर्द काईते। 26हमोर ओर तेसरा पाऊ शकेम तिने तलवारी साथे काईते ओर दीना खे शकेमो रे कअरो ते निकयाल़ी की लईगे। 27याकूबो रे माठेया तिना खे काणे ते बाद बी शईर इजी खे लूटी ला, कऊँकि तेती तिना री बईण प्रष्ट कित्ती थी। 28तिने पेडा-बाकरिया, गाय-बल़द ओर गह्दे ओर शईर ओर मैदानो रे जितणा तअन था, से बी लूटी ला। 29तिजी सबी खे, ओर तिना रे बाल-बच्चे ओर जवाणसा खे बी जबरदस्ती लईगे, बल्कि कअरो-कअरो रे जो कुछ था, से बी तिने लूटी ला।
30तेबे याकूबे आपणे पाऊ शिमोन ओर लेविये खे बोलेया, “तुसे जो एस प्रदेशो रे रणे वाल़े कनानी ओर परिज्जी लोका रे मनो रे माखे जो नफरत पैदा कराई राखी, इजी ते तुसे आऊँ मुसीबता रे पाईता, कऊँकि मां साथे तो थोड़े ई लोक ए, इजी खे एबे तिना कट्ठे ऊई की मां पाँदे अमला करना ओर आऊँ काई देणा; तेबे आँऊ आपणे कराने समेत नाश ऊई जाणा।”
31शिमोन ओर लेविए बोलेया, “क्या सेयो म्हारी बईणा साथे वेश्या जेड़ा बर्ताव करो?”
Currently Selected:
उत्पत्ति 34: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
