उत्पत्ति 30
30
1जेबे राहेले देखेया कि याकूबो रिया खातर मांते कोई ल्वाद नि ऊई, तेबे से आपणी बईणा ते जल़ने लगी। एकी दिने तेसे याकूबो खे बोलेया, “माखे बी ल्वाद दे, नई तो मां मरी जाणा।”
2तेबे याकूबे राहेला खे बऊत जादा गुस्से रे बोलेया, “क्या आँऊ परमेशर ए? तेरी कोख तो तिने ई बंद करी राखी।”
3तेबे राहेले बोलेया, “अच्छा, मेरी दासी बिल्हा एती ए; तेसा गेई जा, ऊई सकोआ कि तेसा रे जरीये मेरे बच्चे ऊई जाओ ओर आऊँ माए बणी जाणी।” 4तेबे राहेले याकूबो खे आपणी दासी बिल्हा दित्ती कि से तेसरी लाड़ी ओ ओर से तेसा गे गया। 5ओर बिल्हा गर्भवती ऊई ओर याकूबो ते तेसा रे एक पाऊ पैदा ऊआ। 6तेबे राहेले बोलेया, “परमेशरे मेरा न्याय कित्तेया ओर मेरी सुणी की माखे एक पाऊ दित्तेया।” इजी री खातर राहेले तेसरा नाओं दान#30:6 दानो रा मतलब ए तिने न्याय कित्तेया राखेया। दानो रा मतलब ए तिने न्याय कित्तेया। 7राहेला री दासी बिल्हा फेर गर्भवती ऊई ओर याकूबो ते एक ओर पाऊ पैदा ऊआ।
8तेबे राहेले बोलेया, “मैं आपणी बईणा साथे बड़ी तागती साथे कुश्ती कित्ती ओर एबे आऊँ जीती गी।” इजी खे तेसे तेसरा नाओं नप्ताली#30:8 नप्ताली रा मतलब ए जीत पाणी राखेया।
9जेबे लिये देखेया कि एबे आऊँ बच्चे पैदा नि करी सकदी, तेबे तेसे आपणी दासी जिल्पा लई की याकूबो री लाड़ी ऊणे खे देईती। 10ओर लिआ री दासी जिल्पा रे बी याकूबो ते एक पाऊ पैदा ऊआ।
11तेबे लिये बोलेया, “वाह रे मेरी किस्मत।” तेबे तेसे तेसरा नाओं गाद#30:11 गादो रा मतलब ए अच्छी किस्मत राखेया। गादो रा मतलब ए अच्छी किस्मत। 12फेर लिआ री दासी जिल्पा रे याकूबो ते एक ओर पाऊ पैदा ऊआ। 13तेबे लिये बोलेया, “आऊँ कितणी किस्मता वाल़ी ए! जरूर जवाणसा माखे तन्य बोलणा।” तेबेई तो तेसे तेसरा नाओं आशेर#30:13 आशेरो रा मतलब ए खुशी राखेया। आशेरो रा मतलब ए आऊँ खुश ए। 14कणका री बडाईया रे बखते रूबेनो खे मैदानो रे दूदाफल़ मिले ओर से तिना खे आपणी माया लिआ गे लईगा, तेबे राहेले लिआ खे बोलेया, “आपणे पाऊए रे दूदाफल़ा बीचा ते कुछ माखे दे।”
15लिये तेसा खे बोलेया, “तैं जो मेरा लाड़ा लई ला रा से क्या काफी नि था कि एबे क्या तूँ मेरे पाऊए रे दूदाफल़ बी लणा चाओई?” राहेले बोलेया, “अच्छा, तेरे पाऊए रे दूदाफल़ा रे बदले से आज राथिए खे तांगे सऊणा।” 16साँजके बखते जेबे याकूब मैदानो ते आऊणे लगी रा था, तेबे लिआ तेसखे मिलणे खे निकल़ी ओर तेसे बोलेया, “ताखे मांगे ई आऊणा पड़ना, कऊँकि मैं आपणे पाऊए रे दूदाफल़ देई की तूँ सच्चो खेई खरीदी राखेया।” तेबे से तेसा राती तेसा साथे ई सुतेया। 17तेबे परमेशरे लिआ री सुणी ओर से गर्भवती ऊई ओर तेसा रे याकूबो ते पाँजुआ पाऊ पैदा ऊआ।
18तेबे लिये बोलेया, “मैं जो आपणे लाड़े खे आपणी दासी दित्ती, तेबेई तो परमेशरे माखे मेरा ईनाम देई राखेया।” इजी खे तेसे तेसरा नाओं इस्साकार#30:18 इस्साकारो रा मतलब ए ईनाम राखेया। 19लिआ फेर गर्भवती ऊई ओर याकूबो ते तेसा रे छठा पाऊ पैदा ऊआ।
20तेबे लिये बोलेया, “परमेशरे माखे अच्छा तोफा देई राखेया, एबकी बार मेरा लाड़ा मां साथे बणेया रा रणा, कऊँकि मांते तेसरे छे पाऊ पैदा ऊई चुके रे।” तेबेई तो तेसे तेसरा नाओं जबूलून#30:20 जबूलून जबूलूनो रा मतलब ए इज्जत करोगा राखेया। जबूलूनो रा मतलब ए इज्जत करोगा। 21तिजी ते बाद तेसा रे एक बेटी बी पैदा ऊई ओर तेसे तेसा रा नाओं दीना#30:21 दीना दीना रा मतलब ए आखरी रे राखेया। दीना रा मतलब ए आखरी रे। 22परमेशरे राहेला री तरफा खे बी दया दखाई ओर तेसा री सुणी की तेसा री कोख खोली। 23तेबे से गर्भवती ऊई ओर तेसा रे एक पाऊ पैदा ऊआ; तेबे तेसे बोलेया, “परमेशरे मेरी बेज्जती दूर करी राखी।” 24इजी खे तेसे तेसरा नाओं ये बोली की यूसुफ राखेया, “परमेशरे माखे एक पाऊ ओर बी देणा।”
याकूबो रा लाबानो साथे समजौता
25जेबे राहेला ते यूसुफ पैदा ऊआ, तेबे याकूबे लाबानो खे बोलेया, “एबे माखे बिदा कर ताकि आऊँ आपणे देश ओर आपणी जगा खे जाऊँ। 26मेरी लाड़िया ओर मेरे बाल-बच्चे जिना री खातर मैं तेरी सेवा करी राखी, तिना खे माखे दे कि आऊँ चली जाऊँ; तूँ तो जाणेया कि मैं तेरी केड़ी सेवा करी राखी।”
27पर लाबाने तेसखे बोलेया, “जे तूँ मांते खुश आ तो एथी रई जा; कऊँकि मैं जाणी ला रा कि यहोवे तेरी बजअ ते माखे आशीष देई राखी।” 28फेर लाबाने याकूबो खे बोलेया, “तूँ माखे ठीक बता कि आऊँ ताखे क्या देऊँ ओर मां से देणा।”
29तेबे याकूबे लाबानो खे बोलेया, “तूँ जाणेया कि मैं तेरी केड़ी सेवा करी राखी ओर तेरे डांगर मांगे केड़े रये। 30मेरे आऊणे ते पईले सेयो कितणे थे ओर एबे कितणे ऊईगे रे; ओर यहोवे मेरे आऊणे ते बाद ताखे आशीष दित्ती। पर मां आपणे कअरो रा काम कदी करना?” 31तिने फेर बोलेया, “आँऊ ताखे क्या देऊँ?” याकूबे बोलेया, “तूँ माखे कुछ नि दे; जे तूँ मेरिया तँईं एक काम करे तो मां फेर तेरिया पेडा-बाकरिया चराणिया ओर तिना री देखपाल़ करनी। 32मां आज तेरे सारेया मिन्टूआ बीचा ते ऊई की निकल़ना ओर जो पेड या बाकरी चित्तीवाल़ी या चिटकाबरी ओ ओर जो पेड काल़ी ओ ओर जो बाकरी चिटकाबरी ओर चित्तीवाल़ी ओ, से मां लग करी देणियां ओर मेरी मजदूरिया रे सेयो ई ठईरनियां। 33ओर जेबे आगे मेरी मजदूरिया री गल्ल तां सामणे ओ, तेबे मेरी ईमानदारिया मेरी गवाई देणी; कि बाकरिया रे मिन्टूआ बीचा ते जो ना चित्तीवाल़ी ना चिटकाबरी ओ ओर पेडा रे मिन्टूआ बीचा ते जो ना कोई काल़ी ओ, जे मांगे निकल़ो तो चोरिया री ठईरनियां।”
34तेबे लाबाने बोलेया, “तेरे बोलणे रे मुताबिक ओ।” 35तेबे तिने तेस ई दिने सारे तारिया वाल़े ओर चिटकाबरे बाकरे ओर सारिया चित्तीवाल़िया ओर चिटकाबरिया बाकरिया, जिना रे कुछ उजल़ापण था सेयो ओर सब काल़े मिन्टू बी लग करी की आपणे पाऊआ रे आथो दे सम्बाल़िते। 36फेर तिने आपणे ओर याकूबो बीचे तिंऊँ दिना री बाटा रा फर्क ठराया; ओर याकूब लाबानो री ओरी पेडा-बाकरिया खे चराणे लगेया। 37तेबे याकूबे पापुलर, बदाम ओर एरंडो रिया डाल़िया रे अरे-अरे डण्डे की तिना रे छिलके कई जगा ते छीले ओर सेयो एड़े तारिया वाल़े बणाईते कि तिना डण्डेया री सफेदी दिखणे लगी। 38ओर तेबे तिने छीले रे डण्डे पेडा-बाकरिया सामणे तिना रे पाणी पीणे री खुरलिया रे खड़े करीते ओर जेबे सेयो पाणी पीणे आईया तेबे गाबण ऊईगिया। 39पेडा-बाकरिया डण्डेया सामणे गाबण ऊईया थिया, इजी खे तिना रे तारीवाल़े, चित्तीवाल़े ओर चिटकाबरे बच्चे जम्मे। 40तेबे याकूबे मिन्टू लग-लग कित्ते पर लाबानो री बाकरिया रे मूँ चित्तीवाल़े ओर सब काल़े बच्चेया री तरफा खे करीते ओर आपणे चूण्ड तिना ते लग राखे ओर लाबानो री पेडा बाकरिया साथे मिलणे नि दित्ते। 41ओर जेबे-जेबे तागतबर पेडा गाबण ओ थिया, तेबे-तेबे याकूब तिना डण्डेया खे खुरलिया रे तिना सामणे राखी देओ था, ताकि सेयो तिना डण्डेया खे देखी की गाबण ऊई जाओ। 42पर जेबे कमजोर पेडा-बाकरिया गाबण ओ थिया, तेबे से तिना खे तिना रे आगे नि राखो था। इजी ते कमजोर-कमजोर लाबानो री रईया ओर अट्टिया-कट्टिया याकूबो रिया ऊईगिया। 43ईंयाँ याकूब बऊत जादा अमीर ऊईगा ओर तेसरे बऊत सारिया पेडा-बाकरिया, दास-दासिया, ऊँट ओर गह्दे ऊईगे।
Currently Selected:
उत्पत्ति 30: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
