उत्पत्ति 20
20
अब्राहम ओर अबीमेलेक
1फेर अब्राहम तेथा ते चली की कनानो रे दक्खण देश नेगेबो री सुनसाण जगा रे आई की कादेश ओर शूरो रे बीचे ठईरेया ओर गरार शईरो रे परदेशिया जेड़ा रणे लगेया। 2तेती अब्राहमे आपणी लाड़ी सारा रे बारे दे बोलया, “ये मेरी बईण ए।” तेबे गरारो रे राजे अबीमेलेके आपणे लोक पेजी की सारा बुलाई ती।
3पर राती परमेशरे अबीमेलेको गे सुफने रे आई की बोलेया, “सुण, जो जवाणस तैं राखी ली री, तेसा रिया बजअ ते तूँ मरे रे जेड़ा ए, कऊँकि से सवागण ए।”
4पर अबीमेलेक तेसा गे नि जाई रा था, तो तिने बोलेया, “ओ यहोवा, क्या तां मेरा ओर मेरे निर्दोष लोका रा बी नाश करना? 5क्या अब्राहमे आपू ई मांते एड़ा नि बोलेया, ‘से मेरी बईण ए,’ ओर तेसे जवाणसे बी आपू बोलेया, ‘से मेरा पाई ए’? आँऊ तो आपणे मनो रिया सच्चाईया ते निर्दोष ए।”
6फेर परमेशरे तेसखे सुफने रे बोलेया, “आ, आँऊ बी जाणूंआ कि आपणे मनो रिया सच्चाईया ते तैं एड़ा कित्तेया ओर इजी खे मैं तूँ पाप करने ते रोकी की बी राखेया। इजी बजअ ते मैं तांते से छूणे नि दित्ती। 7एबे तूँ तेस मर्दो रिया जवाणसा खे वापस पेजी दे, कऊँकि से एक नबी ए ओर जेबे तेस तेरिया तँईं प्रार्थना करनी तेबे तूँ जिऊँदा रणा। पर जे तूँ तेसा खे वापस नि पेजोगा तो पक्का जाणी लो कि तूँ ओर तेरे जितणे बी लोक ए, सेयो सब मरी जाणे।” 8दूजे दिने तड़के ई अबीमेलेके उठी की आपणे सबी काम करने वाल़ेया खे बुलाई की यो सारिया गल्ला सुणाईयां ओर सेयो लोक बऊत डरी गे।
9अबीमेलेके अब्राहमो खे बुलाई की बोलेया, “तैं आसा साथे ये क्या कित्तेया? ओर आसे तेरा क्या बिगाड़ी राखेया था कि तैं मां पाँदे ओर मेरे राज्य पाँदे इतणा बड़ा पाप पाईता? तैं मां साथे से काम करी राखेया जो ताखे नि करना चाईयो था।” 10फेर अबीमेलेके अब्राहमो ते पूछेया, “तैं क्या समजी की एड़ा काम कित्तेया?”
11अब्राहमे जबाब दित्तेया, “मैं ये सोचेया था कि जरूर एते जगा रे परमेशरो रा कोई डर नि ऊणा ओर ईंयाँ इना लोका मेरी लाड़िया रिया बजअ ते आऊँ काई देणा। 12ओर ईंयाँ बी रिश्ते रे सच्ची ये मेरी बईण लगोई। से मेरे बाओ री बेटी तो अए, पर मेरिया माया री बेटी निए। तेबे से मेरी लाड़ी ऊईगी। 13ओर जेबे परमेशरे माखे आपणे बाओ रा कअर छाडी की निकल़ने री आज्ञा दित्ती थी, तेबे मैं तेसा खे बोलेया कि इतणी कृपा ताखे मां पाँदे करनी पड़नी कि आसे दोनो जेती-जेती जाऊँ तेती-तेती तैं मेरे बारे दे बोलणा, ये मेरा पाई ए।”
14तेबे अबीमेलेके पेडा-बाकरिया, गाय-बल़द ओर दास-दासिया लई की अब्राहमो खे दित्ते ओर तेसरी लाड़ी सारा बी तेसखे वापस देईती।
15ओर अबीमेलेके बोलेया, “देख, सारा देश तां सामणे ए, जेती ताखे अच्छा लगो तेती रओ।”
16ओर सारा ते तिने बोलेया, “देख, मैं तेरे पाईए खे चाँदिए रे एक ह्जार टुकड़े देई राखे। देख, तेरे सारे साथिया सामणे सेई तेरी आखी रा पर्दा बणना ओर सबी रे सामणे तूँ ठीक ऊणी।”
17तेबे अब्राहमे परमेशरो ते प्रार्थना कित्ती ओर यहोवे अबीमेलेक ओर तेसरी लाड़ी ओर दासिया ठीक कित्तिया ओर तिना रे बच्चे जमणे लगे। 18कऊँकि यहोवे अब्राहमो री लाड़ी सारा रिया बजअ ते अबीमेलेको रे सारे कअरो रिया जवाणसा रिया कोखा पूरी तरअ ते बच्चे पैदा करने खे बंद करी राखिया थिया।
Currently Selected:
उत्पत्ति 20: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
