यहेजकेल 46
46
परदान ओर त्योआर
1परमेशर यहोवा ईंयाँ बोलोआ, “पीतरले आँगणो रा पूर्बो कनारला बड़ा द्वार कामो रे छे दिना तक बन्द रओ, पर रामो रे दिने खुला रओ ओर नये चाँदो रे त्योआरो रे दिने बी खुला रओ। 2इस्राएलो रा परदान बारा ते बड़े द्वारो रे ब्रंडे ते आँगणो दे आऊणा चाईयो, ओर बड़े द्वारो रे नेड़े खड़ा ऊणा चाईयो। फेर पुरोईता तेस डांगरो री बलि देणी चाईयो, जेसखे परदान बेदिया पाँदे पूरी तरआ ते जल़ाणे खे ल्याया था, ओर मां साथे मेल-मिलाप राखणे रिया तँईं तेसरी मेलबलिया री पेंट बी। परदानो खे द्वारो पाँदे मेरी पूजा करनी चाईयो, ओर तेबे से बारे जाओ ओर बड़ा द्वार साँज ऊणे ते पईले बन्द नि करना। 3इस्राएली लोक रामो रे दिने ओर नये चाँदो रे दिने तेस बड़े द्वारो रे द्वारो पाँदे यहोवे सामणे माथा तेकेया करो। 4रामो रे दिने जो होमबलि इस्राएलो रे परदान यहोवे खे चढ़ाओ, से पेडा रे छे निर्दोष बच्चे ओर एक निर्दोष खाडू ऊणा चाईयो। 5नज्जो री बलि ये ऊणी चाईयो: मतलब खाडूओ साथे दस किलो आटा ओर पेडा रे बच्चेया साथे आपणे चकणे रे मुताबिक नज्ज ओर हर दस किलो आटे साथे तीन लीटर जैतूनो रा तेल। 6नये चाँदो रे दिने राजा एक निर्दोष बाच्छू ओर पेडा रे छे बच्चे ओर एक खाडू चढ़ाओ; यो सब निर्दोष ऊणे चाईयो। 7तेसखे बाच्छू ओर खाडू दुँईं साथे नज्जो री बलिया खे दस-दस किलो आटा चढ़ाणा। पेडा रे बच्चेया साथे से जितणा नज्ज चढ़ाणा चाओ, तितणा देई सकोआ। तेसखे हर दस किलो आटे साथे लगभग तीन लीटर जैतूनो रा तेल बी चढ़ाणा चाईयो। 8जेबे परदान पीतरे जाओ तेबे से बड़े द्वारो रे ब्रंडे ते ऊई की जाओ ओर तेसा बाटा देई निकल़ी जाओ। 9जेबे आम लोक ठराए रे बखतो दे यहोवे सामणे माथा टेकणे आओ, तेबे जो उत्तरी बड़े द्वारो ते ऊई की माथा टेकणे खे पीतरे आओगा, से दक्खण बड़े द्वारो ते निकल़ो ओर जो दक्खण बड़े द्वारो दे ऊई की पीतरे आओ, से उत्तरी बड़े द्वारो ते बारे निकल़ो, मतलब जो जेस बड़े द्वारो ते आओ, से तेस बड़े द्वारो ते वापस नि ओ, आपणे सामणे ई निकल़ी जाओ। 10जेबे सेयो लोक पीतरे आओ तेबे परदान तिना बीचे ऊई की आओ ओर जेबे सेयो निकल़ो, तेबे सेयो एक साथे निकल़ो। 11जेबे त्योआर ओर बाकी ठराए रे बखतो रे आगी दे बलि चढ़ाणी, तेबे तेते साथे नज्जो री बलि चढ़ाणे री ये बिधि ए: हर बाच्छू ओर खाडूए साथे दस किलो नज्ज, ओर पेडा रे बच्चेया साथे आपणी इच्छा रे मुताबिक नज्ज ओर हर दस किलो आटे साथे लगभग तीन लीटर जैतूनो रा तेल। 12तेबे जेबे राजा होमबलि या मेलबलिया खे आपणी इच्छा बलि करी की यहोवे री खातर त्यार करो, तेबे पूर्बो कनारला बड़े द्वार तिना खे खोलेया जाओ ओर सेयो आपणा होमबलि ओर मेलबलि तिंयाँ ई त्यार करो जिंयाँ से रामो रे दिने त्यार करोआ, तेबे से निकल़ो ओर तेसरे निकल़ने ते बाद बड़े द्वार बन्द करी देणा।” 13तेबे यहोवे बोलेया, “हर प्यागा तैं यहोवे रिया तँईं होमबलिया रे रूपो दे एक सालो रा एक निर्दोष पेडा रा बच्चा चढ़ाणा चाईयो। 14हर प्यागा खे एस साथे एक नज्जो री बलि त्यार करना, मतलब दो किलो आटा ओर तिदे मलाणे खे एक लीटर जैतूनो रे तेल लणा। तैं ये सदा बिधिया रे मुताबिक यहोवे खे नज्जो री बलि करी की चढ़ाया करना। 15पेडा रा बच्चा, नज्जो री बलि ओर तेल, हर प्यागा खे सदा होमबलि करी की चढ़ाया करना।”
परदान ओर जमीना रा इस्सा
16परमेशर यहोवा ईंयाँ बोलोआ, “जे राजा आपणे केसी पाऊए खे कुछ देयो, तो से तेसरा इस्सा ऊई की तेसरे पोतेया खे बी मिलो; इस्से रे नियमो रे मुताबिक से तिना रा बी आपणा इस्सा ठईरो। 17पर जे से आपणे इस्से बीचा ते आपणे केसी नौकरो खे कुछ देयो, तो छुट्टिया रे सालो तक तो से तेसरा बणेया रा रओ, पर तेते बाद परदानो खे वापस करेया जाओ ओर तेसरा आपणा इस्सा ई तेसरे पाऊआ खे मिलो। 18प्रजा रा एड़ा कोई इस्सा परदान नि लओ, जो अन्देर करी की तिना री आपणी जमीना ते छुड़ाई राखेया ओ; आपणे पाऊआ खे से आपणी ई जमीना बीचा ते इस्सा देयो; एड़ा नि ओ कि मेरी प्रजा रे लोक आपणी-आपणी जमीना ते तित्तर-बित्तर ऊई जाओ।”
मन्दरो रे रसोई कअर
19तेबे से माणूं माखे बड़े द्वारो ते एक ओर द्वारो ते ऊई की पुरोईता री उत्तरो कनारो री पवित्र कमरे रे लईगा; तेती पच्छमा कनारो रे कूणे रे एक जगा थी। 20तेबे तिने माखे बोलेया, “ये जगा ए जिदे पुरोईत लोक दोषबलि ओर पापबलिया रा मास पकाओ ओर नज्जो री बलिया खे पकाओ, एड़ा नि ओ कि तिना खे बारले आँगणो रे लई जाई की आम लोक पवित्र ठईरो।” 21तेते ते बाद तिने आऊँ मन्दरो रे बारले आँगणो दे लई जाई की आँगणो रे चऊँ कूणेया दे कूमाया ओर आँगणो रे हर एक कूणे दे एक-एक बन्द कनारा बणी रा था, 22मतलब आँगणो रे चऊँ कूणेया दे साठ फूट लाम्बे ओर पैंताल़ी फूट चौड़े बन्द कनारे थे; चऊँ कूणे रे बन्द कनारे रा एक ई नाप था। 23पीतरे चऊँ कनारे कांद थी ओर कांदा निठे पकाणे खे चूले बणी रे थे। 24तेबे तिने माणूंए माखे बोलेया, “पकाणे रे कअर, जेती मन्दरो री सेवा-टईल करने वाल़े लोक लेवी. ए। जो बलिदाना खे पकाओ, सेयो यो ईए।#46:24 यहे. 44:10-14 ”
Currently Selected:
यहेजकेल 46: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
