यहेजकेल 42
42
पुरोईता रिया तँईं कमरे
1तेबे दशणे वाल़ा माणूं माखे बारले आँगणो दे मन्दरो रे उत्तरो रिया तरफा खे लईगा ओर माखे तिना दूई कमरेया गे ल्याया जो मन्दरो रे आँगणो सामणे ओर तेतेरी उत्तरो रिया तरफा खे थे। 2ये भवन, जेतेरा द्वार उत्तरो रिया तरफा खे खुलो था, 175 फुट लाम्बा ओर साडे सतासी फुट चौड़ा था। 3कमरेया रा एक इस्सा पीतरले आँगणो रे सामणे पैंती फुट चौड़ा था। कमरेया रा दूजा कनारा आँगणो रिया बाटा कनारो खे था। दुनी तरफा रे कमरे तीऊँ-तीऊँ मञ्जला रे बणाई राखे थे ओर एकी दूजे रे आमणे-सामणे खड़ी रे थे। 4कमरेया रे बीचे खाली जगा दे साडे सतारा फुट चौड़ी बाट थी। ये पूरी जगा दे 175 फुटा तँईं खे फैलेया दा था, ओर सारे द्वार उत्तरा रिया तरफा खे थे। 5पाँदलिया कमरे छोटिया थिया, मतलब छाज्जेया री बजा ते सेयो थालली ओर बीचली कमरे ते छोटिया थिया। 6कऊँकि सेयो कमरे तीऊँ मञ्जला रे थे ओर आँगणो सामणे तिना रे खम्बे नि थे; इजी बजा ते पाँदलिया कमरे थालली ओर बीचली कमरे ते छोटिया थिया। 7एक बारली कांद थी जो कमरेया खे बारले आँगणो ते लग करो थी; ये साडे सतासी फुट लाम्बी थी। 8एसे कांदे कमरेया रे बारले इस्से री लम्बाई बढ़ाईती दी ए, जो सिर्फ साडे सतासी फुटा तक फैली रा था, जबकि पितरला इस्सा मतलब मन्दरो रिया तरफा रे कमरे 175 फुटा तक फैली रे थे। 9इना कमरे ते थाले पूर्बो रिया तरफा खे बाट थी, जेती लोक बारले आँगणो ते इना दे जाओ थे। 10मन्दरो रिया दक्खणा रिया तरफा खे पितरले आँगणो रे सामणे दो कमरे थे जो मन्दरो रे बारले आँगणो बीचे थे। ये कमरे उत्तरा रिया तरफा रे कमरेया जेड़े ई बणी रे थे। 11तिना रे सामणे री बाट उत्तरी कमरे री बाटा जेड़ी थी, तिना री लम्बाई-चौड़ाई एक बराबर थी, पीतरे आऊणे ओर बारे निकल़ने रा टंग तिना रे द्वारो जेड़ा था। 12दक्खण कमरे रे द्वारो रे मुताबिक बाटा रे सिरे पाँदे द्वार था, मतलब पूर्बो रिया तरफा री कांदा सामणे, जेथा ते लोक तिना दे जाओ थे। 13तेबे दशणे वाल़े माणूंए माखे बोलेया, “यो उत्तरी ओर दक्खणी कमरे जो आँगणो सामणे ए, सेयो ई पवित्र कमरे ए, जिना दे यहोवे रे नेड़े जाणे वाल़े पुरोईता बऊत पवित्र चीजा खाया करनिया, सेयो बऊत पवित्र चीजा, नज्जो री बलि, पापबलि ओर दोषबलि, तेथी राखणियां; कऊँकि से जगा पवित्र ए। 14जेबे पुरोईत मन्दरो रे पीतरे आईगे दे ओ ओर सेयो बारे जाणा चाओ, तो पवित्र जगा ते बारले आँगणो दे ईंयाँ ई नि निकल़ेया करने, मतलब तिना पईले यहोवे री सेवा-टईल करने वाल़े टाल्ले पवित्र जगा दे राखी देणे; कऊँकि सेयो कमरे पवित्र ए। तेबे तिना रोजके टाल्ले पईनी की आम लोका री जगा दे जाणा।”
मन्दरो री बारली लम्बाई-चौड़ाई
15जेबे दशणे वाल़ा माणूं मन्दरो रे पीतरले सारे कमरे नापी चुकेया, तेबे माखे पूर्ब दिशा रे बड़े द्वारो री बाटा ते बारे लई जाई की बारली जगा चऊँ कनारो ते नापणे लगेया। 16दशणे वाल़े माणूंए पूर्बो रिया तरफा खे नापणे रे बैंजो साथे नापेया, जो 875 फूटो रे बराबर था। 17तिने माणूंए आपणे नापणे रा डण्डा लई की उत्तर दिशा रा इस्सा नापेया ओर से 875 फुट लाम्बा निकल़ेया। 18तिने माणूंए आपणे नापणे रा डण्डा लई की दक्खणा रिया तरफा खे नापणे जो 875 फुट लाम्बा था। 19बादो ते तिने माणूंए आपणे नापणे रा डण्डा लई की पच्छमा कनारो खे मुड़ी की नापेया। जो 875 फुट लाम्बा था। 20ईंयाँ तिने दशणे वाल़े माणूंए नापेया ओर से जगा चऊँ कनारा ते बराबर थी मतलब नापणे रे डण्डे रे मुताबिक 875 फुट थी। एतेरे चऊँ कनारे एक कांद थी जो पवित्र जगा ओर आम जगा खे लग करो थी।
Currently Selected:
यहेजकेल 42: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
