निर्गमन 38
38
होमबलिया री बेदी बनाणी
1तेबे बसलेल ओर तेस साथे काम करने वाल़ेया होमबलिया खे बबूलो री लकड़िया री बेदी बी बणाई, तिजी री लम्बाई ओर चौड़ाई पाँज-पाँज आथ ओर ऊचाई तीन आथ थी; ईंयाँ से चौरस बणी।
2ओर तिने तिजी रे चारो कूणेया पाँदे चार सींग एकी ई टुकड़े रे बिना जोड़ो रे बणाए ओर सेयो पीतल़ी साथे मढ़वाए। 3ओर तिने बेदिया रा सारा समान पीतल़ी रा बणाया, मतलब तिजी री आँडिया, फरूए, खून छिड़कणे रे कटोरे, मास निकाल़ने खे कांडे ओर स्वा चकणे खे गिट्ठिया बणाईया। 4ओर बेदिया रे थालले इस्से रे तिजी रे चऊँ कनारे तिने पीतल़ी री जाल़िया री एक छानणी बणाई, से बेदिया बीचे लगी री थी। 5ओर तिने पीतल़ी री छानणिया रे चारो कूणेया खे चार कड़े बणाए, ताकि तिना रे डण्डे लगाई की तिजी खे चकी सको।
6तेबे बसलेल ओर तेस साथे काम करने वाल़ेया बबूलो री लकड़िया रे डण्डे बणाए ओर सेयो पीतल़ी साथे मढ़वाए। 7फेर तिने डण्डे बेदिया रे कड़ेया रे बेदिया खे चकणे खे पाईते। तिने बेदी तख़्तेया साथे जोड़ी की खोखली बणाई।
पीतल़ी री अऊदी
8बसलेल ओर तेस साथे काम करने वाल़ेया अऊदी ओर तिजी रा पावा दोनो पीतल़ी रे बणाए, ये मिलणे वाल़े तम्बूए रे द्धारो पाँदे सेवा करने वाल़िया जवाणसा री दित्ती री पेंटे की पीतल़ी रे शीशे की बणाए।
रणे री जगा रा आँगण बनाणा
9तेबे तिने आँगण बणाया; तेते आँगणो री दक्खणा री तरफा खे 100 आथ लाम्बे लीलणो रे टाल्ले रे पड़दे बणाए; 10तिना खे 20 खम्बे ओर इना रे पीतल़ी रे 20 पावे बणे; पर खम्बेया रे कड़े ओर तिना खे जोड़ने वाल़ी पत्तिया चाँदिए रिया थिया। 11ओर उत्तरो रिया तरफा खे बी 100 आथ लाम्बे पड़दे बणे ओर तिना खे 20 खम्बे ओर इना रे पीतल़ी रे 20 पावे बणे; पर खम्बेया रे कड़े ओर तिना खे जोड़ने वाल़ी पत्तिया चाँदिए रिया थिया। 12ओर पश्चिमो रिया तरफा खे सारे पड़दे मलाई की 50 आथो रे थे तिना खे दस खम्बे ओर दस तिना रे पावे थे; पर खम्बेया रे कड़े ओर तिना खे जोड़ने वाल़ी पत्तिया चाँदिए री थिया। 13ओर आँगणो री पूर्वो रिया तरफा खे बी 50 आथ लाम्बे पड़दे थे। 14आँगणो रे द्धारो रे एकी तरफा खे पंद्रा आथो रे पड़दे बणे; तिजी रे तीन खम्बे ओर तीन पावे थे। 15ओर आँगणो रे द्धारो री दूजी तरफा खे बी पंद्रा आथो रे पड़दे बणे थे ओर तिना खे तीन खम्बे ओर तीन पावे थे। 16आँगणो रे चऊँ कनारले सारे पड़दे अच्छे ते बूणे रे लीलणो रे कपड़े रे बणे रे थे। 17ओर खम्बेया रे पावे पीतल़ी रे थे पर खम्बे पाँदे टांगणे रे ऊक ओर तिना खे जोड़ने वाल़िया पत्तिया चाँदिए री बणिया ओर तिना रे सिरे चाँदिए साथे मढ़े, ईंयाँ आँगणो रे सारे खम्बे चाँदिए री पत्तिया साथे जोड़ी राखे थे। 18आँगणो रे द्धारो रा पड़दा नीले, बैंगणी ओर लाल रंगो रे तागेया साथे बेल-बूटे री कढ़ाई कित्तेया रा लीलणो रे टाल्लेया रा बणेया रा था ओर तिना री लम्बाई 20 आथ, ऊचाई आँगणो रे पड़देया री चौड़ाईया जेड़ी पाँज आथ बणी री थी। 19ओर तिना खे चार खम्बे ओर चऊँ खम्बेया रे चार ई पावे पीतल़ी रे बणे थे, तिना खम्बेया पाँदे टांगणे रे ऊक ओर तिजी खे जोड़ने वाल़िया पत्तिया चाँदिए रिया बणिया ओर तिना रे सिरे चाँदिए साथे मढ़े रे थे। 20मिलणे वाल़े तम्बूए रे ओर आँगणो रे चऊँ कनारले सारे खूँडे पीतल़ी रे बणी रे थे।
पवित्र जगा रे इस्तेमाल ऊणे वाल़े समानो रा ब्यौरा
21मिलणे वाल़ा तम्बू जिदे गवाईया री चिट्ठिया रा सन्दूक राखी राखेया तेतेखे बनाणे री जगा रा समान जो लेविया री सेवकाईया खे बणेया ओर जेतेरी गिणती हारूण पुरोईतो रे पाऊ ईतामारो रे जरीये मूसे रे कईणे ते ऊई थी, तिजी रा जिकर ये ए।
22जेस-जेस चीजा खे बनाणे री आज्ञा यहोवे मूसे खे दित्ती थी, से यहूदा रे गोत्रो वाल़े बसलेले, जो हूरो रा पोता ओर ऊरीए रा पाऊ था, बणाई तिया। 23तेस साथे दानो रे गोत्रो रा, अहीसामाको रा पाऊ ओहोलीआब था, जो बढ़िया कारीगर ओर कढ़ाई करने वाल़ा ओर नीले, बैंगणी ओर लाल रंगो रे तागेया ते लीलणो रे टाल्लेया रे कढ़ाई करने वाल़ा अच्छा कारीगर था।
24पवित्र जगा रे सारे कामो रे जो दित्ती री पेंटा रा सूईना लगेया, से पवित्र जगा रे शेकेल रे साबो ते 995 किलो ओर 730 शेकेल था। 25ओर मण्डल़िया रे गिणे रे लोका री दित्ती री पेंटा री चाँदी 3 ह्जार 500 किलो ओर पवित्र जगा रे शेकेल रे साबो ते 1 ह्जार 775 शेकेल थी। 26मतलब जितणे 20 साला रे ओर तिजी ते जादा उम्रा रे गिणे थे, सेयो 6 लाख 3 ह्जार 550 मर्द थे ओर एक-एक जणे रिया तरफा ते पवित्र जगा रे शेकेल रे मुताबिक आदा शेकेल, जो एक बेका मतलब 6 ग्राम ओआ मिलेया।
27ओर से 3 ह्जार 500 किलो चाँदी पवित्र जगा रे बीचले तख़्ते खे ओर पड़दे रे पावे बनाणे रे लगी गी, 3 ह्जार 500 किलो चाँदिए ते 100 पावे बणे, एक-एक पावा 35 किलो रा बणेया। 28ओर 1 ह्जार 775 शेकेल जो बची गा तिजी साथे खम्बे रे कड़े बणाए, फेर खम्बेया रे सिरे मढ़े ओर तिना रे डण्डे बी बणाए। 29ओर पेंटा रा पीतल़ 2 ह्जार 450 किलो ओर 2 ह्जार 400 शेकेल था।
30तिजी साथे मिलणे वाल़े तम्बूए रे पावे, पीतल़ी री बेदी, पीतल़ी री छानणी ओर बेदिया रा सारा समान बणाया; 31ओर आँगणो रे चऊँ कनारले पावे ओर तिजी रे द्धारो रे पावे, मिलणे वाल़े तम्बू ओर आँगणो रे चऊँ कनारले खूँडे बी बणाए।
Currently Selected:
निर्गमन 38: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
