निर्गमन 34
34
पात्थरो री दो नवींया तख़्तिया
1तेबे यहोवे मूसे खे बोलेया, “पईलकिया तख़्तिया जेड़िया दो ओर तख़्तिया कअड़ी लो; तेबे जो वचन तिना पईलकिया तख़्तिया पाँदे लिखी राखे थे, जो तैं तोड़ी तिया, सेयो ई वचन मां तिना तख़्तिया पाँदे बी लिखणे। 2प्यागा त्यार रएया ओर सीनै पाह्ड़ो पाँदे चढ़ी की तिजी री चूँडिया पाँदे मां सामणे खड़े ऊणा। 3तां साथे ओर कोई नि चढ़ना चाईयो, बल्कि पूरे पाह्ड़ो पाँदे कोई बी माणूं दिखणा नि चाईयो ओर ना ई पेड-बाकरी ओर ना ई गाय-बल़दा रे चूण्ड पाह्ड़ो रे नेड़े-तेड़े चरदे ऊए दिखणे चाईयो।”
4तेबे मूसे पईलकिया तख़्तिया जेड़िया दो ओर तख़्तिया कअड़िया ओर प्यागा तड़के उठी की आपणे आथो रे सेयो दोनो तख़्तिया लई की यहोवे रिया आज्ञा रे मुताबिक सीनै पाह्ड़ो पाँदे चढ़ीगा।
5तेबे यहोवे बादल़ो रे उतरी कि मूसे साथे तेती खड़े ऊई कि आपणे ई नाओं री महिमा प्रकट कित्ती। 6ओर यहोवा तेसरे सामणे ऊई की ये प्रचार करदा ऊआ चलेया, “आँऊ परमेशर यहोवा, दयालु ओर अनुग्रह करने वाल़ा, रोष करने रे सब्रखोर ओर बऊत ई करूणामयी ओर सच्चा परमेशर ए, 7ह्जारा पीढ़िया तक लगातार करूणा करने वाल़ा, बुरे काम, पाप ओर पाप माफ करने वाल़ा ए, फेर बी दोषी किंयाँ बी मां निर्दोष नि ठराणे, बल्कि तिना रे पितरो रे पापो री सजा तिना रे माठेया खे ओर तिना रे पोतेया ओर पड़पोतेया खे बी देणे वाल़ा ए।”
8मूसे फटाफट जमीना पाँदे चूकी की माथा तेकेया। 9ओर तिने बोलेया, “ओ यहोवा, जे तेरी दया-दृष्टि मां पाँदे ओ तो यहोवा, आसा लोका बीचे ऊई की चल, यो लोक टीठ तो अए, तेबे बी म्हारे पाप ओर बुरे काम माफ कर ओर आसा खे आपणे लोक मानी की ग्रहण कर।”
वाचा खे दुराया जाणा
10तेबे यहोवे बोलेया, “देख, आऊँ तुसा साथे एक वाचा बानूँआ ओर मां तेरे सबी लोका सामणे एड़े अचम्बे रे काम करने, जेड़े तरतिया पाँदे ओर सबी जातिया रे देशा बीचे कदी नि ऊए ओर सेयो सारे देशो रे लोक जिना बीचे तूँ रएया, तिना यहोवे रे काम देखणे, कऊँकि जो आऊँ तुसा लोका साथे करने वाल़ा ए, से डर पैदा करने वाल़ा काम ए। 11देखो, आऊँ तुसा रे आगा ते एमोरी, कनानी, हित्ती, परिज्जी, हिब्बी ओर यबूसी लोका खे निकयाल़ूँआ पर आज आऊँ जो आज्ञा तुसा खे देऊँआ, से तुसे लोका मानणी। 12इजी री खातर सम्बल़ी की रएया कि जेते देशो रे तूँ जाणे वाल़ा ए, तेथो रे रणे वाल़ेया साथे वाचा नि बानणी, केथी एड़ा नि ओ कि से ताखे फन्दा ठईरो। 13इजी खे तिना री मूर्तिया री बेदिया टाल़ी देणियां ओर तिना री अशेरा नाओं रिया मूर्तिया बाडी देणियां; 14कऊँकि तुसा खे केसी ओरी खे परमेशर करी की मानणा ओर तेसगे माथा टेकणे री आज्ञा निए, कऊँकि यहोवा जेसरा नाओं जलनशील ए, से जल़ने वाल़ा परमेशर ए, 15एड़ा नि ओ कि तूँ तेस देशो रे रणे वाल़ेया साथे वाचा बानो ओर सेयो आपणे देवतेया पीछे ऊणे रा व्याभिचार करो ओर तिना खे बलिदान बी करो ओर कोई ताखे निऊँदा देओ ओर तूँ बी बलि कित्ते रे डांगरो रा प्रसाद खाओ, 16ओर तूँ तिना रिया बेटिया खे ब्याई की आपणे माठेया खे ल्याओ ओर तिना रिया बेटिया जो आपू आपणे देवतेया पीछे चलणे रा व्याभिचार करोईया, तेरे माठेया ते बी आपणे देवतेया पीछे चलणे रा व्याभिचार कराओ।
17“तुसे देवतेया रिया मूर्तिया कअड़ी की नि बनाणियां।
18“बिना सजेड़े रिया रोटिया रा त्योआर मनाणा। सात दिना तक जिंयाँ मैं आज्ञा दित्ती थी आबीब मीन्ने रे सई बखतो पाँदे बिना सजेड़े री रोटी खाया करनी, कऊँकि ये तेस बखतो री याद ए जेबे तूँ मिस्र देशो ते आबीब मीन्ने रे निकल़ी की आया था। 19हर एक जेठा बच्चा मेरा ए ओर क्या गायी रा बाच्छू, क्या मिन्टू, तेरे डांगरा बीचे जो नर जेठा बच्चा ओ, सेयो सब मेरे ए। 20गह्दिया रे पईले बच्चे रे बदले मिन्टू देई की से छुड़ाई लणा, पर जे तूँ तेसखे छुड़ाणा नि चाए, तो तेसरी क्याड़ी तोड़ी देणी। पर आपणे सारे जेठे माठे बदला देई की छुड़ाई लणे। माखे कोई खाली आथे आपणा मूँ नि दखाओ।
21“छे दिना तक तो काम करना, पर सातुए दिने राम करना; ईंयाँ अल़ बाणे ओर बाडणे रे बखते बी राम करना।
22“ओर कणका री पईली फसला रे बखते तैं अफ़्तेया रा त्योआर मानणा ओर सालो रे आखरी रे बी फसल कट्ठी करने रा त्योआर मानणा।
23“सालो रे तीन बार तेरे सब मर्द इस्राएलो रे परमेशर यहोवा यहोवे खे आपणा मूँ दखाओ। 24तेबे मां देशो री जातिया तेरे सामणे ते निकयाल़ी की, तेरे बन्ने बढ़ाणे ओर जेबे तूँ आपणे परमेशर यहोवे खे सालो रे तीन बार आपणा मूँ दखाणे आओ, तेबे केसी बी तेरी जमीना रा लाल़च नि करना।
25“मेरे बलिया रे डांगरो रा खून सजेड़ी रोटिया साथे नि चढ़ाणा ओर ना फसह रे त्योआरो रे बलिदानो बीचा ते कुछ प्यागा तक राखणा 26तैं आपणी जमीना री पईली फसला रा पईला पाअग आपणे परमेशर यहोवे रे भवनो रे ली आऊणा। बाकरिया रा बच्चा तेसरी माया रे दूदो रे नि पकाणा।”
27तेबे यहोवे मूसे खे बोलेया, “इना वचना खे लिखी लो, कऊँकि इना वचना रेई मुताबिक आँऊ तां साथे ओर इस्राएलिया साथे वाचा बानूँआ।”
28मूसा तो तेती यहोवे साथे बिना रोटी-पाणी खाए-पिये चाल़ी दिन ओर चाल़ी राती रया ओर तेबे तिने तिना पात्थरो रिया तख़्तिया पाँदे वाचा रे वचन मतलब दस आज्ञा लिखी तिया। 29जेबे मूसा गवाईया रिया दोनो तख़्तिया आथो रे लई की सीनै रे पाह्ड़ो ते उतरी की आऊणे लगी रा था, तेबे यहोवे साथे गल्ला करने रिया बजअ ते तेसरे मुंए पाँदा ते चमकीली किरणा निकल़ने लगी रिया थिया, पर से नि जाणो था कि तेसरे मुंए पाँदा ते चमकीली किरणा निकल़ने लगी रिया। 30जेबे हारूण ओर सबी इस्राएलिये मूसा देखेया कि तेसरे मुंए पाँदा ते किरणा निकल़ने लगी रिया, तेबे सेयो तेसगे जाणे ते डरीगे। 31पर जेबे मूसे सेयो आपू गे बुलाए तो हारूण इस्राएली मण्डल़िया रे सारे परदाना साथे तेसगे आया ओर मूसा तिना साथे गल्ला करने लगेया। 32इजी ते बाद सब इस्राएली नेड़े आए ओर जितणिया आज्ञा यहोवे सीनै रे पाह्ड़ो पाँदे मूसे साथे गल्ला करने रे बखते दित्तिया थिया, सेयो सब तिने तिना खे बताईया।
33जदुओ तक मूसा तिना साथे गल्ला नि करी चुकेया, तदुओ तक तिने आपणे मुंए पाँदे कुण्डा पाया रा राखेया। 34ओर जेबे-जेबे मूसा पीतरे यहोवे साथे गल्ला करने खे यहोवे सामणे जाओ था, तेबे-तेबे मूसा तेस कुण्डे खे बारे निकल़ने रे बखतो तक उतारी की राखो था ओर तेबे बारे आयी की जो-जो आज्ञा तेसखे मिलो थिया, तिना खे इस्राएली लोका खे बताई देओ था। 35इस्राएली लोके देखेया की मूसे रे मुंए ते चमकीली किरणा निकल़दिया रओ थिया तेबे मूसा जदुओ तक यहोवे साथे गल्ला करने खे पीतरे नि जाओ था, तदुओ तक तेस कुण्डे खे पाई की राखो था।
Currently Selected:
निर्गमन 34: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
