निर्गमन 32
32
सूईने रा बाच्छू
1जेबे लोका खे लगेया कि मूसे खे पाह्ड़ो ते उतरने खे देर ऊईगी री, तेबे सेयो हारूणो गे कट्ठे ऊई की बोलणे लगे, “चल, एबे आसा खे देवता बणा, जो आसा रे आगे-आगे चलो; कऊँकि से माणूं मूसा जो आसा खे मिस्र देशो ते निकयाल़ी की ल्याया, आसे नि जाणदे कि एसखे क्या ऊआ?”
2हारूणे तिना खे बोलेया, “तुसा री जवाणसा ओर माठे-बेटिया रे कानो रे सूईने रिया जो बाल़िया ए तिना खे खोली की मांगे ल्याओ।” 3तेबे सबी लोके आपणे कानो ते सूईने रिया बाल़िया खोलिया ओर हारूणो गे ली आये। 4ओर हारूणे सेयो सूईने रे गईणे तिना रे आथो ते लई ले ओर साँचे रे पाई की सूईना टाल़ी की एक बाच्छूए री मूर्ति कअड़ी की बणाई। तेबे सेयो बोलणे लगे, “ओ इस्राएलो रे लोको येईए तेरा परमेशर जो ताखे मिस्र देशो ते छुड़ाई की ली आयी रा।” 5ये देखी की हारूणे तेसरे आगे एक बेदी बणाई ओर ये प्रचार कित्तेया, “काल यहोवे खे त्योआर मनाणा।” 6ओर दूजे दिने लोके प्यागा उठी की होमबलि चढ़ाई ओर मेलबलि ली आये; तेबे तिजी ते बाद तिने बैठी की खाया पिया ओर उठी की व्याभिचारो री अरकता करने लगे।
7तेबे यहोवे मूसे खे बोलेया, “थाले उतरी जा, कऊँकि तेरिया प्रजा रे लोक, जिना खे तूँ मिस्र देशो ते निकयाल़ी की ली आयी रा सेयो बिगड़ी गे रे; 8जेते बाटा रे चलणे री आज्ञा मैं तिना खे दित्ती थी तेसा खे फटाफट छाडी की तिने एक बाच्छूए री मूर्ति कअड़ी की बणाई ली, तेबे तेसा गे माथा तेकेया ओर तिजी खे बलिदान चढ़ाई की ये बोली राखेया, ओ इस्राएलियो तुसा रा परमेशर जो तुसा खे मिस्र देशो ते छुड़ाई की ली आयी रा से येईए।” 9तेबे यहोवे मूसे खे बोलेया, “आँऊ इना लोका खे जाणी गा रा ए, ओर सुण, सेयो टीठ ए 10मेरा रोष तिना पाँदे पड़की रा, जेते की मां सेयो फूकी देणे एबे तूँ माखे नि रोक; तिजी ते बाद मां तांते एक बड़ी जातिया रा देश बनवाणा।”
11पर मूसा आपणे परमेशर यहोवे खे ये बोली की मनाणे लगेया, “ओ यहोवा, तेरा रोष आपणियां प्रजा पाँदे कऊँ पड़की रा जिना खे तूँ बड़ी सामर्थ ओर तागतबर आथो रे जरीये मिस्र देशो ते निकयाल़ी की ली आयी रा?” 12एड़ा नि ऊणे दे कि मिस्री लोक ईंयाँ बोली सको कि से तिना खे बुरे इरादे ते पाह्ड़ो रे काई की तरतिया पाँदा ते खत्म करने री इच्छा ते निकयाल़ी की लईगा? तूँ आपणे पड़के रे रोषो खे शांत कर ओर आपणियां प्रजा रे लोका खे एड़ा नुकशाण पऊँचाणे ते मन बदली लओ। 13आपणे दास अब्राहम, इसहाक ओर याकूबो खे याद कर, जिना ते तैं आपणी ई कसम खाई की ये बोलेया था, “मां तुसा रा वंश सर्गो रे तारेया जेड़ा बऊत करना ओर ये सारा देश जेतेरे बारे दे मैं तेरे वंशो खे देणे रा वादा करी राखेया कि सेयो तेतेरे अक्कदार सदा बणे रे रओ।” 14तेबे यहोवे आपणी प्रजा इस्राएलिया रा नुकशाण करने खे जो तिने करने खे बोलेया था मन बदली ता। 15तेबे मूसा फिरी की वाचा रिया लिखी री दुँईं तख़्तिया खे आथो रे लई की पाह्ड़ो ते उतरी गा। तिना तख़्तिया रे दुँईं कनारे लिखी राखेया था। 16ओर सेयो तख़्तिया परमेशरो रिया बणाई रिया थिया ओर तिना पाँदे परमेशरे आपणे आथे की लिखेया रा था।
17जेबे यहोशूए खे लोका रा आल्ला सुणेया तेबे तिने मूसे खे बोलेया, “डेरे ते लड़ाईया री जी आवाज सुणने लगी री।”
18तेबे मूसे बोलेया, “ये जो आवाज सुणने लगी री से ना तो जीतणे वाल़ेया री ए ओर ना आरने वाल़ेया री, पर माखे तो गाणे री आवाज सुणने लगी री।” 19जेबे मूसा डेरे रे नेड़े आया तो तिने से बाच्छूए री मूर्ति देखी ओर तिना रा नाचणा देखेया तेबे मूसे रा रोष पड़की गा ओर तिने वाचा री तख़्तिया आपणे आथो साथे पाह्ड़ो रे थाले पटकी-पटकी की तोड़ी तिया। 20तेबे तिने तिना रे बणाए रे बाच्छूए री मूर्ति लई की आगी बीचे पाई की फूकी ती; फेर तिजी खे पीसी की चूरा-चूरा बणाईता ओर पाणिए पाँदे सेटी ता ओर इस्राएली लोका खे से पल़्याई ता।
21तेबे मूसा हारूणो ते पूछणे लगेया, “तिने लोके तां साथे क्या कित्तेया कि तैं सेयो इतणे बड़े पापो रे फसाई ते?”
22हारूणे जबाब दित्तेया, “मेरे यहोवे रा रोष नि पड़को; तूँ तो तिना लोका खे जाणेया कि सेयो बुराईया रे मन लगाई राखोए।” 23ओर तेबे तिने माखे बोलेया, “आसा खे देवता बणा जो आसा रे आगे-आगे चलो; कऊँकि से माणूं मूसा जो आसा खे मिस्र देशो ते निकयाल़ी की ल्याया, आसे नि जाणदे कि एसखे क्या ऊआ?” 24तेबे मैं तिना खे बोलेया, “जेस-जेस गे सूईने रे गईणे ए सेयो तिना खे खोली की ल्याओ ओर जेबे तिने माखे दित्ते, मैं सेयो आगी बीचे पाई ते, तेबे से बाच्छूए री मूर्ति निकल़ी गी।” 25मूसे देखेया था कि हारूणे तिना लोका खे आपणी मनमानी करने दित्ती थी ओर सेयो लोक एड़े मजबूर करी ते थे कि सेयो आपणे विरोदिया बीचे मजाक बणीगे। 26फेर मूसे सबी रे डेरे रे सामणे खड़े ऊई की तिना खे बोलेया, “जो कोई यहोवे रिया तरफा खे ओ से मांगे आओ;” तेबे सारे लेवीय तेसगे कट्ठे ऊईगे। 27तेबे तिने तिना लोका खे बोलेया, “इस्राएलिया रा परमेशर यहोवा ईंयाँ बोलोआ कि आपणी-आपणी जाँघा पाँदे तलवार लटकाई की डेरे रे एकी कूणे ते दूजे कूणे तक कूमी-कूमी की आपणे-आपणे पाईया खे, आपणे साथिया खे ओर आपणे पड़ोसिया खे मारी देओ।” 28मूसे रे एड़ा बोलदे ई लेविये से कित्तेया ओर तेस दिने 3 ह्जारा रे तकरीबन लोक मारी ते।
29तेबे मूसे बोलेया, “आजका दिन तुसे यहोवे रिया तँईं लग करी राखे कऊँकि तुसे आपणे पाऊआ ओर पाईया रे खलाफ बी ऊईगे इजी बजअ ते आज यहोवा तुसा खे आशीष देओ।” 30दूजे दिने मूसे लोका खे बोलेया, “तुसे बड़ा ई पारी पाप करी राखेया। पर एबे मां यहोवे गे चढ़ी जाणा, ऊई सकोआ कि आऊँ तुसा रे पापो रा प्राश्चित करी सकूँ।” 31तेबे मूसा यहोवे गे जाई की बोलणे लगेया, “हाय, हाय, इने लोके बड़ा ई पारी पाप करी राखेया! इने आपू खे सूईने रा देवता बणाई ला रा। 32तेबे बी एबे तूँ तिना रा पाप माफ कर, नई तो आपणी लिखी री कताबा बीचा ते मेरा नाओं कटी दे।”
33यहोवे मूसे खे बोलेया, “जिने मेरे खलाफ पाप करी राखेया तेसरा नाओं ई मां आपणी कताबा ते कटी देणा। 34एबे तो तूँ जाई की तिना लोका खे तेते जगा रे लई जा जेतेरे बारे दे मैं ताखे बताया था; देख, मेरा दूत तांते आगे-आगे चलणा। पर जेस दिने मां दण्ड देणे लगणा तेस दिने तिना खे एते पापो री सजा बी देणी।” 35इजी खे यहोवे तिना लोका पाँदे बऊत बड़ी महामारी पाई, कऊँकि हारूणो री बणाई री बाच्छूए री मूर्तिया री सेवा तिने ई कित्ती थी।
Currently Selected:
निर्गमन 32: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
