निर्गमन 25
25
पवित्र जगा रिया तँईं पेंट
1यहोवे मूसे खे बोलेया, 2“इस्राएली लोका खे ये बोलणा कि मेरिया तँईं पेंट ल्याओ; जितणे बी आपणियां इच्छा रे मुताबिक देणा चाओए तिना सबी ते मेरी पेंट लणी। 3ओर जिना चीजा री पेंट तिना ते लणी से यो ए मतलब सूईना, चाँदी, पीतल़, 4नीले, बैंगणी ओर लाल रंगो रे टाल्ले, पतल़ा लीलणो रा टाल्ला, बाकरिया रे बाल़ 5लाल रंगो रे रंगी री खाडूए री खाल, बाकरेया री खाल, बबूल नाओं रे डाल़ो री लकड़ी, 6दिऊए बाल़ने खे जैतूनो रा तेल, अभिषेको रे तेलो खे खुशबूदार द्रव्य ओर खुशबूदार तूप, 7सुलैमानी पात्थर ओर मणिया खे जो बड़ा पुरोईत आपणी छातिया पाँदे पईनोआ से झिलम ओर एपोदो पाँदे जड़ने। 8फेर तिजी ते बाद सेयो माखे एक पवित्र रणे री जगा बणाओ कि आऊँ तिना बीचे रऊँ। 9जो कुछ आऊँ तुसा खे दखाऊँआ मतलब रणे री जगा ओर तिजी री सारी चीजा रा नमूना, तिजी रेई मुताबिक तुसे से बनाणा।”
वाचा रा सन्दूक
10लोका खे एड़ा बोलो कि बबूल नाओं रे डाल़ो रिया लकड़िया रा एक सन्दूक बणाया, तिजी री लम्बाई टाई आथ, चौड़ाई डेढ़ आथ ओर ऊचाई डेढी आथो री थी। 11ओर तिदे पीतरा-बारा ते शुद्ध सूईने री परत चढ़ाणी ओर सन्दूको पाँदे चऊँ कनारेया ते सूईने री पट्टी लगाणी। 12ओर तैं तिजी रे चऊँ पावेया पाँदे सूईने रे चार कड़े बणवाई की दो कड़े एकी कनारे ओर दो कड़े दूजे कनारे लगाणे। 13तेबे बबूलो रिया लकड़िया रे डण्डे बनवाणे ओर सेयो बी सूईने साथे मढ़ने। 14ओर डण्डे सन्दूको रे दुँईं कनारेया रे कड़ेया रे पाणे ताकि तिना रे साअरे साथे सन्दूक चकेया जाओ। 15सेयो डण्डे सन्दूको रे कड़ेया रे लगे रे रओ ओर तिजी ते लग नि करने। 16फेर जो आज्ञा रिया पात्थरो रिया तख़्तिया मां ताखे देणियां से तिजी ई गवाईया रे सन्दूको दे राखणिया।
17फेर शुद्ध सूईने रा एक दया रा आसण बनाणा तिजी री लम्बाई टाई आथ ओर चौड़ाई डेढ़ आथ ओ। 18ओर सूईना कअड़ी की दो करूब बणाई की दया रे आसणो रे दुँईं कनारेया रे लगाणे। 19एक करूब एकी कनारे पाँदे ओर दूजा करूब दूजे कनारे पाँदे लगाणा मतलब एकी ई टुकड़ेया ते तिना करूबा खे दया रे आसणो रे दुँईं कनारेया पाँदे लगवाई की बनाणा। 20ओर तिना करूबा रे पंख पाँदा ते एड़े फैले रे बणो कि दया रा आसण तिना साथे टखेया रा रओ ओर तिना रे मूँ आमणे-सामणे ओर दया रे आसणो रे कनारो खे रओ 21ओर दया रा आसण सन्दूको पाँदे लगाणा ओर जो आज्ञा रिया पात्थरो रिया तख़्तिया मां ताखे देणियां से गवाईया रे सन्दूको रे पीतरे राखणिया। 22ओर मां तेस पाँदे रई की ताखे मिलेया करना ओर इस्राएलिया खे जितणी आज्ञा मां ताखे देणियां ऊगिया तिना सबी रे बारे दे मां दया रे आसणो पाँदे ओर तिना करूबा बीचा ते जो आज्ञा रिया पात्थरो रिया तख़्तिया रे गवाईया रे सन्दूको पाँदे ऊणे, तां साथे गल्ला करेया करूँगा।
पवित्र मेज
23“फेर बबूलो रिया लकड़िया रा एक मेज बनाणा तिजी री लम्बाई दो आथ चौड़ाई एक आथ ओर ऊचाई डेढ़ आथो री ओ। 24से शुद्ध सूईने साथे मढ़वाई की तिजी रे चऊँ कनारे सूईने री पट्टी बनवाणी। 25ओर तिजी रे चऊँ कनारे चार आऊँगल़ चौड़ी एक चौखट बनवाणी ओर इजी चौखटा रे चऊँ कनारे सूईने री एक पट्टी बनवाणी 26ओर मेजो खे सूईने रे चार कड़े कअड़ी की तिना चऊँ कूणेया रे लगाणे, जो तिजी रे चऊँ पावेया रे ऊणे। 27सेयो कड़े चौखटा गे लगाणे ताकि तिना कड़ेया रे डण्डे पाई की मेज सानिया रे चखी जाओ। 28ओर बबूलो री लकड़िया रे डण्डे बणाई की सूईने साथे मढ़ने ओर मेज तिना तेई चकेया करना। 29ओर तेसरी परात ओर तूपदान, चमचे, लटणे रे कटोरे सब शुद्ध सूईने रे बनाणे। 30ओर मेजो पाँदे मेरे आगे पेंटा री रोटिया रोज राखेया करनिया।”
सूईने री फट्टी
31“फेर शुद्ध सूईने री एक दिऊए राखणे री फट्टी बनाणी। सूईना कअड़ी की से दिऊए राखणे री फट्टी पावे ओर डण्डिया पाँदे तिजी रे फूला रिया डाल़िया, गाठ ओर फूल सब एक ई टुकड़े रे बणो 32ओर तिजी रे कनारेया ते छे डाल़िया निकल़ी री ओ। तीन डाल़िया तो दिऊए राखणे री फट्टिया रे एकी कनारे ते ओर तीन डाल़िया दूजे कनारे ते निकल़ी रिया ओ। 33एकी-एकी डाल़िया रे बदामो रे फूला जेड़े तीन-तीन फूल राखणे रिया कऊलिया, एक-एक गाठ ओर एक-एक फूल ओ, दिऊए राखणे री फट्टिया ते निकल़ी री इना छे डाल़िया रे एड़ा ई सब कुछ ओ। 34ओर फट्टिया री डण्डिया पाँदे बदामो रे फूलो जेड़ी गाठ ओर फूलो समेत चार फूल राखणे रिया कऊलिया जेड़िया बणी री ओ; 35ओर दिऊए राखणे री फट्टिया ते निकल़ी रिया छे डाल़िया बीचा ते दो-दो डाल़िया निठे एक-एक गाठ फट्टिया साथे एक ई टुकड़े ते बणे रे ओ। 36तिजी री गाठ ओर डाल़िया, सब दिऊए राखणे री फट्टिया समेत शुद्ध सूईना टल़ाई की पूरी दिऊए राखणे री फट्टी एकी टुकड़े कअड़ी की बनवाणी। 37तेबे सात दिऊए बनाणे ओर सेयो दिऊए, दिऊए राखणे री फट्टिया पाँदे बाल़े जाओ कि सेयो दिऊए राखणे री फट्टिया रे सामणे प्रयासा देओ। 38ओर तिजी रे चिमटे ओर आग चकणे रे पांडे सब शुद्ध सूईने रे ओ। 39दिऊए राखणे री फट्टी सब इना सारी चीजा समेत पैंती किलो शुद्ध सूईने रा बणो। 40चौकस रई की यो सब चीजा तेस नमूने जेड़िया बनाणियां, जो मैं ताखे एते पाह्ड़ो रे दखाई राखिया।”
Currently Selected:
निर्गमन 25: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
