निर्गमन 19
19
सीनै रे पाह्ड़ो पाँदे यहोवे रा दर्शण देणा
1इस्राएली लोक मिस्र देशो ते निकल़ने रे तीजे मीन्ने रे पईले दिने सीनै पाह्ड़ो री सुनसाण जगा रे आए। 2जेबे इस्राएली रपीदीमो ते निकल़ी की सीनै पाह्ड़ो री सुनसाण जगा खे आए, तेबे तेथी तिने सुनसाण जगा रे सीनै पाह्ड़ो रे सामणे डेरे लगाए।
3तेबे मूसा पाह्ड़ो पाँदे परमेशर यहोवे गे गल्ला करने खे चढ़ीगा ओर परमेशर यहोवा तेसखे पाह्ड़ो ते आका पाई की बोलेया, “याकूबो रे कराने खे मेरा ये वचन सुणा ओर जो गल्ला इस्राएलिया खे बोलणिया सेयो ये ए, 4‘तुसे आपू देखी राखेया कि मैं मिस्रो रे लोका साथे क्या-क्या कित्तेया, तुसा खे मानो उकाब पंछिये रे पंखो पाँदे चढ़ाई की आपू गे ली आया। 5एबे जे तुसे त्यानो साथे मेरी गल्ल सुणोगे ओर मेरी वाचा खे मानेया करोगे, तो तुसे सबी जातिया बीचे मेरी आपणी जायदात ठईरने, कऊँकि सारी तरती तो मेरी ए। 6मेरी नजरा रे तुसे एक पुरोईता रा समाज ओर पवित्र लोक ठईरने। जो गल्ला तां इस्राएलिया खे बोलणिया सेयो यो ईए।’ ” 7तेबे मूसे थाले आई की लोका रे स्याणे बुलाए ओर यो सब गल्ला तिना रे जरीये लोका तक पऊँचाणे खे समजयाई तिया, जिना खे बोलणे री आज्ञा यहोवे तेसखे दित्ती थी।
8सबी लोके मिली की उत्तर दित्तेया, “जो कुछ यहोवे बोली राखेया से सब आसा करना।” तेबे लोका रिया यो गल्ला मूसे यहोवे गे सुणाईयां।
9तेबे यहोवे मूसे खे बोलेया, “सुण, आऊँ गईरे न्हेरे बादल़ो रे ऊई की तांगे आऊँगा ताकि जेबे आऊँ तां साथे गल्ला करुँ, तेबे सेयो लोक सुणो ओर सदा तां पाँदे विश्वास करो।” तेबे मूसे लोका रिया गल्ला यहोवे गे सुणाईया। 10तेबे यहोवे फेर मूसे खे बोलेया, “तूँ लोका गे जा ओर सेयो आज ओर काल आपणे आपू खे परमेशरो रिया तँईं पवित्र करो ओर सेयो आपणे टाल्ले तोई लो 11ओर सेयो तीजे दिनो खे त्यार ऊई जाओ, कऊँकि तीजे दिने मां सबी लोका रे सामणे सीनै पाह्ड़ो पाँदे उतरी की आऊणा। 12इजी खे तैं लोका रिया तँईं चऊँ कनारे बाड़ा बानी लणा ओर तिना खे बोलणा, ‘तुसे चौकस रएयो कि पाह्ड़ो पाँदे नि चढ़ेयो ओर तिजी रे बन्ने खे पनि छूँएओ कऊँकि जो कोई माणूं पाह्ड़ो खे छूँओगा, से पक्का कायी देणा। 13जेबे कोई पाह्ड़ो खे छूँओ तेबे तेसखे कोई आथ नि लगाओ, पर से पात्थर या तीरो साथे काया जाओ; से चाए डांगर ओ, चाए माणूं से जिऊँदा नि बचो।’ जेबे रड़सिंगा बजाणे री आवाज बऊत देरा तक सुणो, तेबे लोक पाह्ड़ो गे आई सकोए।”
14तेबे मूसे पाह्ड़ो ते उतरी की लोका गे आई की सेयो परमेशरो खे पवित्र कराए; फेर तिने आपणे टाल्ले तोई ले। 15ओर तिने लोका खे बोलेया, “तीजे दिनो तक त्यारी करदे रओ ओर लाड़िया गे नि जाणा।”
16जेबे तीजा दिन आया तेबे प्याग ऊँदे ई बादल़ गरजणे लगे ओर बिजल़ी चमकणे लगी ओर पाह्ड़ो पाँदे काल़े बादल़ छाई गे ओर रड़सिंगे री आवाज बऊत जोरे साथे ऊई ओर डेरे रे जितणे बी लोक थे सब डरो रे मारे थरथराईगे।
17तेबे मूसा लोका खे परमेशरो साथे मिलाणे रिया तँईं डेरे ते निकयाल़ी की लईगा ओर सेयो पाह्ड़ो निठे खड़े ऊईगे। 18ओर यहोवा जो आगी रे ऊई की सीनै पाह्ड़ो पाँदे उतरी रा था, इजी बजअ ते सारा पाह्ड़ तुएँ साथे परी गा ओर तिजी रा तुआँ पट्ठिया जेड़ा उठणे लगी रा था ओर सारा पाह्ड़ बऊत थरथराणे लगी रा था। 19ओर जेबे रड़सिंगे री आवाज बढ़दी ओर बऊत जादा ऊईगी, तेबे मूसे बोलेया ओर परमेशरे तेसरी आवाज सुणी कि जबाब दित्तेया।
20तेबे यहोवा सीनै पाह्ड़ो री चूँडिया पाँदे उतरेया ओर मूसा पाह्ड़ो री चूँडिया पाँदे ऊबे शादेया। तेबे मूसा ऊबे चढ़ीगा। 21तेबे यहोवे मूसे खे बोलेया, “थाले उतरी की लोका खे चतौणी दे, केथी एड़ा नि ओ कि सेयो बाड़ा तोड़ी कि मां यहोवे खे देखणे खे पीतरे आओ ओर तिना बीचा ते बऊत नाश ऊई जाओ 22ओर पुरोईत बी जो यहोवे रे नेड़े आया करोए सेयो बी आपणे आपू खे परमेशरो रिया तँईं पवित्र ओर शुद्ध करो, केथी एड़ा नि ओ कि आँऊ यहोवा तिना खे बऊत पारी सजा देऊँ।”
23पर मूसे यहोवे खे बोलेया, “सेयो लोक सीनै पाह्ड़ो पाँदे नि चढ़ी सकदे; कऊँकि तैं तो आपू ई बोली की आसे समजयाई राखे कि पाह्ड़ो रे चऊँ कनारे बाड़ा बानी की तिजी खे पवित्र राखो।”
24यहोवे तेसखे बोलेया, “एबे तूँ ऊँदे जा ओर हारूणो साथे तूँ ऊबे आओ, पर पुरोईत ओर, ओर माणूं बाड़ा तोड़ी की मांगे नि आओ, केथी एड़ा नि ओ कि आँऊ यहोवा तिना खे बऊत पारी सजा देऊँ।” 25तेबे यो गल्ला मूसे लोका गे उतरी की सुणाईयां।
Currently Selected:
निर्गमन 19: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
