निर्गमन 14
14
इस्राएलिया रा लाल समुद्र पार करना
1यहोवे मूसे खे बोलेया, 2“इस्राएलिया खे आज्ञा दे कि सेयो वापस ऊई की मिग्दोल शईर ओर समुद्रो बीचे पीहहीरोत शईरो रे सामणे, बालसपोनो रे सामणे आपणे डेरे खड़े करो, तुसे समुद्रो रे कनारे पाँदे आपणे डेरे खड़े करो। 3तेबे फिरौनो इस्राएलिया रे बारे दे सोचणा कि सेयो अणजाण देशो रे पटकी की कबराई गे रे ओर सुनसाण जगा रे फसी गे रे। 4तेबे मां फिरौनो रा मन काठा करी देणा ओर तेस तिना रा पीछा करना, तेबे फिरौन ओर तेसरी सारी सेना रे जरीये मेरी महिमा ऊणी ओर मिस्र देशो रे लोका जाणी लणा कि आऊँ ई एक सच्चा यहोवा ए।” तेबे तिने तेड़ा ई कित्तेया।
5जेबे मिस्रो रे राजे खे ये समाचार मिलेया कि सेयो निकल़ी गे रे, तेबे फिरौन ओर तेसरे काम करने वाल़ेया रा मन बदली की तिना रे खलाफ ऊईगा ओर सेयो एकी दूजे ते बोलणे लगे, “आसे ये क्या कित्तेया कि इस्राएलिया खे आपणी गुलामिया ते छुटकारा देई की सेयो जाणे दित्ते?” 6तेबे तिने आपणा रथ त्यार करवाया ओर आपणी सेना साथे लई। 7तिने ओरी रथा साथे 600 मिस्रो रे अच्छे ते अच्छे रथ लये ओर तिना सबी पाँदे सरदार बठयाल़ी की चली पड़ेया। 8ओर यहोवे मिस्रो रे राजा फिरौनो रा मन काठा करी ता। इजी रिया तँईं तिने इस्राएलिया रा पीछा कित्तेया; पर इस्राएली इम्मती साथे निकल़ी की जाणे लगी रे थे। 9पर फिरौनो रे सारे कोड़े, रथ ओर सवारा समेत मिस्री सेना इस्राएली लोका रा पीछा करी की तिना गे पीहहीरोतो गे पऊँची गे, जिने बालसपोनो रे सामणे समुद्रो रे कनारे आपणा डेरा लगाई राखेया था।
10जेबे इस्राएली लोके देखेया कि फिरौन नेड़े आईगा ओर तेस पीछे मिस्री लोक म्हारा पीछा करने खे आऊणे लगी रे; तेबे सेयो बऊत जादा डरी गे ओर तड़फदे ऊए की यहोवे ते मतादा रिया तँईं अर्ज करने लगे। 11फेर सेयो मूसे खे बोलणे लगे, “क्या मिस्रो रे कब्रा री कमी थी, जो तूँ आसा खे तेथा ते मरने खे सुनसाण जगा रे ली आयी रा? तूँ आसा खे मिस्रो ते निकयाल़ी की कऊँ ली आया? 12क्या आसे मिस्रो रे तांते येई गल्ल नि करदे रये कि आसा खे रणी दे ताकि आसे मिस्रिया री सेवा करुँ? आसा खे सुनसाण जगा रे मरने ते मिस्रिया री सेवा करनी अच्छी थी।”
13तेबे मूसे लोका खे बोलेया, “डरो नि, खड़े रओ ओर से उद्धारो रा काम देखो, जो यहोवे तुसा खे आज करना, कऊँकि जिना मिस्रिया खे तुसे आज देखणे लगी रे, सेयो फेर कदी नि देखणे। 14यहोवा आपू ई तुसा रिया तँईं लड़ना, इजी री खातर तुसे चुपचाप रओ।”
15तेबे परमेशरे मूसे खे बोलेया, “तूँ कऊँ मेरे सामणे रोणे लगी रा? इस्राएलिया खे आज्ञा दे कि आपणा चीखणा-चिल्लाणा बन्द करो ओर एथा ते आपणा डेरा चकी की चली पड़ो। 16ओर तूँ आपणे आथो रे सोठी चकी की समुद्रो री तरफा खे बढ़ा ताकि तिजी रे दो पाअग ऊई जाओ ओर इस्राएली लोक समुद्रो बीचे ऊई की सूकिया जमीना पाँदे चली सको। 17ओर सुण, आऊँ आपू मिस्रिया रा मन टीठ करूँआ ओर सेयो तिना रा पीछा करने खे समुद्रो रे कूसी जाणे, तेबे फिरौन, तेसरी सेना, तेसरे रथ ओर सवारा रे जरीये मेरी महिमा ऊणी। 18ओर जेबे फिरौन, तेसरे रथ ओर तेसरे सवारा रे जरीये मेरी महिमा ऊणी, तेबे मिस्रिया जाणी लणा कि आऊँ ई यहोवा ए।”
19तेबे परमेशरो रा दूत जो इस्राएली सेना ते आगे-आगे चलेया करो था से जाई की तिना पीछे खड़ा ऊईगा ओर तिंयाँ ई बादल़ो रा खम्बा तिना रे आगे ते अटी की तिना पीछे जाई की ठईरी गा। 20ईंयाँ से मिस्री सेना ओर इस्राएली सेना बीचे आईगा ओर से बादल़ पुरिया राती एकी तरफा खे न्हेरा ओर दूजिया तरफा खे प्रयासा देंदा रया; इजी खे सेयो पुरिया राती एकी-दूजे गे नि जाई सके।
21तेबे मूसे आपणा आथ समुद्रो पाँदे बढ़ाया ओर यहोवे पूरी रात प्रचण्ड पूर्वी अवा चलाई ओर समुद्रो रे दो पाअग करी की पाणी एड़ा टाईता, जेते की तिजी बीचे सूकी जमीन ऊईगी। 22तेबे इस्राएली लोक समुद्रो बीचे सुकी जमीना दे चले ओर पाणी तिना रे दाँणे ओर खूँजी तरफा खे दवाला जेड़ा बणी की खड़ी रा था।
23तेबे मिस्री, मतलब फिरौनो रे सारे कोड़े, रथ ओर सवार तिना रा पीछा करदे ऊए समुद्रो बीचे चली गे।
24ओर राती रे आखरी पईरो रे यहोवे आगी ओर बादल़ो रे खम्बे बीचा ते मिस्रिया री सेना खे देखी की सेयो डराईते। 25ओर तिने तिना रे रथो रे पहिये निकयाल़ी ते, जेते की तिना रा चलणा कठण ऊईगा; तेबे मिस्री आपू बीचे बोलणे लगे, “आओ, आसे इस्राएलिया सामणे ते नठी जाऊँए, कऊँकि यहोवा तिना रिया तँईं आसा मिस्रिया रे खलाफ लड़ने लगी रा।”
26तेबे यहोवे मूसे खे बोलेया, “आपणा आथ समुद्रो पाँदे बढ़ा, ताकि पाणी मिस्रिया पाँदे, तिना रे रथो पाँदे ओर सवारा पाँदे फेर बह्यीणे लगो।”
27तेबे मूसे आपणा आथ समुद्रो पाँदे बढ़ाया ओर प्याग ऊँदे-ऊँदे ई समुद्र जिंयाँ का तिंयाँ आईगा ओर मिस्री उल्टे नठणे लगे, पर यहोवे सेयो समुद्रो बीचे ई हड़ाई ते। 28ओर पाणिए रे पलटणे ते जितणे रथ ओर सवार इस्राएलिया पीछे आए थे, सेयो सब बल्कि मिस्रो#14:28 मिस्रो फिरौन री सारी सेना तिदे डूबी गी ओर तिना बीचा ते एक पनि बचेया। 29पर इस्राएली समुद्रो बीचे सूकिया जमीना दे ऊई की चली गे ओर पाणी तिना रे दाँणे ओर खूँजे कनारे दवाला जेड़ा खड़ेया रा रया।
30ईंयाँ यहोवे तेस दिने इस्राएली मिस्रिया रे वशो ते छुड़ाए ओर इस्राएलिये मिस्री समुद्रो रे कनारे मरे रे देखे। 31ओर जेबे इस्राएलिये मिस्रिया रे खलाफ यहोवे री महान सामर्था रा काम देखेया; तेबे तिने यहोवे रा डर मानेया ओर यहोवा ओर तेसरे दास मूसे पाँदे विश्वास कित्तेया।
Currently Selected:
निर्गमन 14: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
