बिधान 5
5
दस आज्ञा
(निर्गमन 20:1-17)
1मूसे सारे इस्राएली लोका खे बुलाई की बोलेया, “ओ इस्राएली लोको, जो-जो बिदिया ओर नियम आऊँ आज तुसा खे सुणाऊँआ तिना खे सुणो, ताकि तिना खे सीखी की मानणे रे चौकस रओ। 2म्हारे परमेशर यहोवा तो होरेब#5:2 होरेब मतलब सीनै पाह्ड़ पाह्ड़ो पाँदे आसा साथे वाचा बानी। 3ये वाचा परमेशरे म्हारे पितरा तेई नि, पर आसा साथे बी बानी, जो एती आजके दिने जिऊँदे ए।” 4परमेशरे तेते पाह्ड़ो पाँदे आगी बीचा ते तुसा लोका साथे आमणे-सामणे गल्ला कित्तिया।#5:4 प्रेरित 7:38 5तेस बखते आऊँ यहोवे रा वचन सुनाणे खे तुसा रे ओर यहोवे रे बीचे खड़ेया रा रया। कऊँकि तुसे आगी रे डरो रे मारे पाह्ड़ो पाँदे नि चढ़े, तेबे यहोवे बोलेया,
6आऊँ यहोवा, तेरा परमेशर ए, जो ताखे मिस्र प्रदेशो ते गुलामिया रे कअरो ते जेती तुसे रओए थे तेथा ते निकयाल़ी की ल्याया, 7माखे छाडी की कोई ओर परमेशर करी की नि मानणा।
8तूँ आपू खे जो सर्गो रे ए या तरतिया पाँदे ए या तरतिया ते थाले ए या तरतिया रे पाणिए रे ए, केसी बी चीजा री मूर्ति खणी की नि बणाया। 9तैं तिना गे माथा नि टेकणा ओर ना ई तिना री पूजा करनी; कऊँकि आऊँ तेरा परमेशर यहोवा जल़न राखणे वाल़ा ईश्वर ए ओर जो मां साथे बैर राखोए तिना रे माठेया, पोतेया ओर पड़पोतेया खे पितरा री सजा देऊँआ। 10पर जो कोई मां साथे सदा प्यार राखोआ ओर मेरी आज्ञा खे मानोआ तिना री ह्जारा पीढ़िया पाँदे आऊँ दया करेया करूँआ।
11तैं आपणे परमेशर यहोवे रा नाओं बेकार नि लणा; कऊँकि जो यहोवे रा नाओं बेकार लओगा सेयो यहोवे निर्दोष नि ठराणे।#5:11 मत्ती 5:33
12तूँ रामो रे दिनो खे पवित्र मानणे खे याद राखेया, जेड़ी तेरे परमेशर यहोवा ताखे आज्ञा देई राखी। 13छे दिन तो तैं मईणत करी की आपणा सारा काम-काज करना;#5:13 लूक 13:14 14पर सातुआ दिन तेरे परमेशर यहोवे खे रामो रा दिन ए। तिदे ना तो तैं कोई काम-काज करना, ना तेरे पाऊ, ना तेरी मुन्नी, ना तेरे दास, ना तेरी दासी, ना तेरा बल़द, ना तेरा गह्दा, ना तेरे डांगर ओर ना कोई परदेशी जो तेरे समाजो रे ए, जेते कि तेरा दास ओर तेरी दासी बी तेरे जेड़ा केसी बी किस्मा रा काम नि करो।#5:14 मत्ती 12:2, लूक 23:56
15ये गल्ल याद राखणी कि मिस्र प्रदेशो रे तूँ आपू दास था ओर तेथो ते तेरा परमेशर यहोवा ताखे तागतबर आथ ओर बढ़ाई रिया बांयी रे जरीये निकयाल़ी की ल्याया; इजी बजअ ते तेरा परमेशर यहोवा ताखे रामो रा दिन मानणे री आज्ञा देओआ।
16तैं आपणे माये बाओ री इज्जत करनी ताकि जो प्रदेश तेरा परमेशर यहोवा ताखे देओआ, तेते प्रदेशो रे तूँ बऊत दिना तक जिऊँदा रई सके ओर तेरा पला ओ।#5:16 मत्ती 15:4, मरक 7:10, मरक 10:19, इफिसि 6:2-3
17तैं अत्या नि करनी।#5:17 मत्ती 5:21, याकूब 2:11
18तैं व्याभिचार नि करना।#5:18 मत्ती 5:27, याकूब 2:11, रोमी 7:7, रोमी 13:9
19तैं चोरी नि करनी।
20तैं केसी रे खलाफ चूठी गवाई नि देणी।#5:20 लूक 18:20
21केसी री लाड़िया रा लाल़च नि करना, ना केसी रे कअरो रा, ना तेसरे डोरूआ रा, ना तेसरे दास-दासिया रा, ना तेसरे बल़द या गह्दे रा, ना तेसरी केसी ओरी चीजा रा लाल़च करना।
22यो ई वचन यहोवे तेते पाह्ड़ो पाँदे आग, बादल़ ओर अन्दकूप न्हेरे रे बीचा ते तुसा री सारी मण्डल़िया खे आका पाई की बोले ओर इजी ते जादा ओर कुछ नि बोलेया। तिने सेयो दुँईं फटिया पाँदे लिखी की मांगे देईते।
परमेशरो रे तेजो ते लोका रा डरना
(निर्गमन 20:18-21)
23जेबे पाह्ड़ आगी साथे बल़ने लगी रा था ओर तुसे से आवाज आगी रे न्हेरे तुएँ बीचा ते आऊँदी ऊई सुणी, तेबे तुसे ओर तुसा रे गोत्रो बीचा ते खास-खास मर्द ओर तुसा रे बुजुर्ग मांगे आए।#5:23 इब्रानी 12:19 24ओर बोलणे लगे, “देखो, म्हारे परमेशर यहोवे आसा खे आपणा तेज ओर आपणा वैभव दखाया ओर आसे तेसरी आवाज आगी बीचा ते आऊँदी ऊई सुणी, आज आसे देखी ला कि हालाँकि परमेशर माणूंआ साथे गल्ला करोआ, तेबे बी माणूं जिऊँदा रओआ।#5:24 निर्ग. 19:19 25एबे आसे कऊँ मरूँ? कऊँकि इतणी जादा आगी साथे आसे स्वा ऊई जाणे ओर जे आसे आपणे परमेशर यहोवे री आवाज फेर सुणुगे, तेबे तो मरी ई जाणे।#5:25 इब्रानी 12:19 26कऊँकि सारे प्राणिया बीचे एड़ा कुण ए जो आसा जेड़ा जिऊँदा ओर आगी बीचा ते बोलदे ऊए परमेशरो री आवाज सुणी की जिऊँदा बचेया रा रओ?#5:26 बिध. 4:33 27इजी री खातर तूँ नेड़े जा ओर जो कुछ म्हारा परमेशर यहोवा बोलो तिजी खे सुणी लओ, तेबे जो कुछ से बोलो से आसा गे बताणा ओर आसा से सुणना ओर मानणा।”
परमेशरो रा मूसे साथे गल्ला करना
28जेबे तुसे मां साथे इना गल्ला खे बोलणे लगी रे थे तेबे यहोवे तुसा रिया गल्ला सुणिया; तेबे तिने माखे बोलेया, “इने लोके जो-जो गल्ला तांगे बोलिया मैं सुणिया, इने जो कुछ बोलेया ठीक ई बोलेया। 29पला ऊँदा कि इना रा मन सदा एड़ा ई बणेया रा रओ, ताकि सेयो मेरा डर मानदे ऊए मेरी सारिया आज्ञा पाँदे चलदे रओ, जेते कि तिना री ओर तिना रे वंशो री सदा पलाई ऊँदी रओ।” 30इजी री खातर तूँ तिना खे जाई की बोली दे, “आपणे-आपणे डेरेया खे वापस ऊई जाओ।” 31पर तूँ एथी मांगे खड़ेया रा रओ ओर मां सेयो सारिया आज्ञा, बिदिया ओर नियम जो ताखे इस्राएली लोका खे सिखाणे पड़ने, तांगे बोलणे ताकि सेयो तिना खे तेते प्रदेशो रे जेतेरा अक्क आऊँ तिना खे देणे वाल़ा ए, मानो।#5:31 गलाति 3:19 32इजी री खातर तुसे आपणे परमेशर यहोवे री आज्ञा रे मुताबिक करने रे चौकसी करेयो; ओर तेसरी कोई बी आज्ञा नि तोड़नी। 33जेते बाटा दे चलणे री आज्ञा तुसा रे परमेशर यहोवा तुसा खे देई राखी तेसा सारिया बाटा रिये चलदे रओ ताकि तुसे जिऊँदे रओ ओर तुसा रा पला ओ ओर जेते प्रदेशो रे तुसे मालक ऊणे तिदे तुसे जादा उम्रा तक बणे दे रओ।#5:33 लूक 1:6
Currently Selected:
बिधान 5: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
