दानिय्येल 7
7
चार जन्तुओ रा दर्शण
1दानिय्येल लिखोआ, बेबीलोन रे राजा बेलशस्सर रे राजो रे पईले सालो दे, जेबे आऊँ आपणे माँजे पाँदे सयी रा था, तेबे मैं एक सुफना देखेया। तेबे मैं से सुफना लिखेया ओर जो मैं देखेया से ये ए: 2दानिय्येले ये बोलेया, “मैं राती एक दर्शण देखेया। मैं ऊबे देखेया कि चऊँ कनारा ते तूफान चलणे लगेया। जेतेते भूमध्य सागर ईलणे लगी रा था।#7:2 प्रका. 7:1 3तेबे समुद्रो ते चार बड़े-बड़े जानवर, जो एकी दूजे ते लग थे, तेबुई निकल़ी की आए। 4पईला जन्तु शेरो जेड़ा था ओर तेसरे पंख उकाबो रे पंखा जेड़े थे। मेरे देखदे-देखदे ई तेसरे पंख पतींगी ले, ओर से थाले जमीना ते चकी की माणूंआ जेड़ा दोनो पैरा रे पारे खड़ा कित्तेया, ओर तेसखे माणूंआ रा दिल दित्तेया।” 5दूजा जन्तु आपणे पिछले पैरा पाँदे खड़ेया दा पालूओ जेड़ा दिशणे लगी रा था। तिने आपणे दाँदा बीचे तीन पसलिया पकड़िया दिया थिया, ओर मैं एक आवाज सुणी जो तेसते बोलणे लगी री थी, “जा, जितणा ऊई सको तितणा मास खा।” 6जेबे आऊँ देखणे लगी रा था, तो एक ओर जन्तु दिशणे लगेया। ये तीजा जन्तु एकी चीते जेड़ा दिशणे लगी रा था, पर एसरिया पीठी पाँदे पंछिये जेड़े चार पंख थे, ओर तेस जन्तुओ रे चार सिर थे ओर तेसखे माणूंए जेड़ा राज करने रा अक्क दित्तेया दा था। 7फेर जेबे आऊँ देखणे लगी रा था, तेबे मैं आपणे सुफने दे एक ओर चौथा जन्तु देखेया। ये एक खतरनाक ओर बऊत मजबूत था। तेसरे बड़े-बड़े लोए रे दाँद थे। ये चीजा खे खाई जाओ था ओर तिना खे चूर-चूर करी देयोआ था, ओर जो बची जाओआ, तिजी खे पैरा साथे केसी देयोआ। से पईलके सारे जन्तुआ ते लग था ओर तेसरे दस सींग थे। 8आऊँ तिना सींगा रे बारे दे सोचणे लगी रा था, कि तिना रा क्या मतलब ऊई सकोआ। तेबे मैं एक ओर छोटा सींग देखेया जो ओरी दसा सींगा बीचे ते निकल़ने लगी रा था। इने आपू खे जगा बनाणे खे तिना बीचा ते तीन सींग बारे काडीते। एस छोटे सींगो दे माणूंए जेड़िया आखी थिया। एसरा मूँ कमण्ड या ओछिया गल्ला करने वाल़ेया शब्दा ते परी रा था।
पुराणे रे दिनो रा दर्शण
9तेबे जेबे आऊँ देखणे लगी रा था तेबे मैं अन्तो रे क्या देखेया कि सिंहासन राखी राखे ओर तेबे कोई बऊत पुराणा बैठेया;#7:9 परमेशर जो सदा जिऊँदा ए तेसरे टाल्ले बर्फा जेड़े सफेद ओर सिरो रे बाल़ मुलायम ऊना जेड़े थे; तेसरे सिंहासन आगी जेड़ा ओर तिजी रे पहिये धधकदी आगी जेड़ी दिशो थे।#7:9 प्रका. 1:14 10जेती से बैठी रा था, तेथा ते आगी री एक नदी बह्ईणे लगी री, ह्जारो स्वर्गदूत तेसरी इच्छा पूरी करने खे त्यार खड़े रओ थे। ओर कई ह्जारो स्वर्गदूत तेसरी सेवा करने खे खड़े थे, फेर दरबारो दे न्यायी बैठे, किने कताबा#7:10 कताबा स्वर्गो री कताब जिदे माणूंआ रे अच्छे ओर बुरे कामा रे बारे दे लिखी राखेया ए। खोली की देखेया कि तिना दे क्या ए।#7:10 यिर्म. 17:1, पज. 56:8, मला. 3:16, प्रका. 20:11, 12 11फेर मैं देखेया कि से छोटा सींग कमण्डो रिया गल्ला करने ओर आपणी बड़ाई करने लगी रा था। जिंयाँ ई मैं देखेया से चौथा जन्तु मरीगा, ओर तेसरा शरीर आगी दे सेटी की नाश करिता। 12तेबे बाकी जन्तुआ रा राज करने रा अक्क वापस लई ला, पर सेयो कुछ बखतो तक जिऊँदे रणे दित्ते। 13मैं राती सुफने दे देखेया, कि माणूंए जेड़ा कुछ ए। से सर्गो रे बादल़ा ते किरेया दा मेरे नेड़े आऊणे लगी रा, ओर से तेस माणूंए गे गया जो सदा जिऊँदा था ओर से तेसरे सामणे ल्याया#7:13 प्रका. 14:14 मत्ती 26:64 14तेबे तेसखे एड़ा अक्क, महिमा ओर राज दित्तेया कि देश-देश, जाति-जाति ओर लग-लग पाषा बोलणे वाल़े सारे तेसरे वशो दे ओ; तेसरा राज सदा खे अटल़ ओर कदी बी नाश ना ऊणे वाल़ा ठईरेया।#7:14 प्रका. 11:15
दानिय्येलो रे जरीये दर्शणो रा मतलब बताणा
15तेबे मां दानिय्येलो रा मन बेचैन ऊईगा ओर जो कुछ मैं देखेया था तेस दर्शणो ते आऊँ कबराईगा। 16तेबे तिना सेवका बीचा ते जो सिंहासनो रे नेड़े खड़ी रे थे, एकी गे जाई की मैं तिना सारी गल्ला रा पेत पूछेया, तिने ये बोली की मांगे तिना गल्ला रा पेत दशेया, 17तिने बोलेया, “चार बड़े-बड़े जन्तुआ रा मतलब चार राजेया खे बताओआ।, सेयो राजा तरतिया पाँदे ऊणे। 18पर परमपरदान परमेशरो रे पवित्र लोका खे राज मिलणा ओर युगो-युगो तक तेस राज्य रे अधिकारी बणे दे रणे।”#7:18 दानि. 7:27 19तेबे मेरे मनो रे ये इच्छा ऊई कि तेस चौथे जन्तुओ रा पेत बी जाणी लूँ जो बाकी तीऊँ ते लग था। से बऊत खतरनाक ओर डराऊणा था। जेसरे दाँद लोए रे ओर पईने पीतल़ी रे पैर थे। से चीजा खे खाई देयोआ था ओर तिना रे टुकड़े-टुकड़े करी देयो था। ओर जो बची जाओ थे तिना खे पैरा थाले केसी देयो था। 20तेबे चौथे जन्तुए रे सिरो रे दस सींगा रा पेत ओर जेस नवें सींगो रे निकल़ने ते तीन सींग छूटी गे, मतलब जेस सींगो दे आखी ओर जोरे की कमण्डो रिया गल्ला करने वाल़ा मूँ ओर बाकी सबी सींगा ते खतरनाक था। तेसरा पेत जाणने री माखे इच्छा ऊई।#7:20 दानि. 7:8 21जेड़ा कि मैं देखेया, कि से सींग परमेशरो रे पवित्र लोका साथे लड़ाई करने लगी रा था ओर तिना खे अराई बी देयो था, 22जदुओ तक कि से सदा रा परमेशर, परमपरदान, आई कि आपणे पवित्र लोका रा न्याय नि करी लो। तेबे पवित्र लोका रिया तँईं राज्य पाँदे राज करने रा बखत आया।#7:22 मत्ती 19:28 23तिने बोलेया, “तेस चौथे जन्तुए रा मतलब, एक चौथा राजा ए, जो तरतिया पाँदे ऊई की बाकी सबी राजेया ते लग ऊणा, ओर सारी तरतिया रे लोक नाश करने ओर तिना रे शरीर चूर-चूर करी देणे।” 24तिना दस सींगा रा मतलब ए कि तिना दस राजेया तेस राज्य पाँदे राज करना। तिना ते बाद, एक ओर राजे राज करने आऊणा। से ओरी तीऊँ राजेया ते लग ऊणा। तेसखे तीऊँ राजेया पाँदे अक्क मिलणा, 25तेस परमपरदान परमेशरो रे खलाफ गल्ला बोलणिया ओर बखत ओर बिधान बदलणे री कोशिश करनी, परमेशरो रे लोक साढ़े तीऊँ काला तक तेसरे वशो दे ऊणे।#7:25 प्रका. 13:6, 7 26पर तेबे स्वर्गो दे न्यायी बैठणे ओर तिना तेसरा राज्य छुड़ाई की नाश करी देणा, एथो तक की तेसरा अन्त ई ऊई जाणा। 27तेबे राज ओर सामर्थ ओर तरतिया पाँदले राज री महिमा परमपरदान परमेशरो री प्रजा, मतलब तेसरे पवित्र लोका खे देई देणी, तेसरा राज सदा रा राज ए ओर सब राज करने वाल़े तेसरे वशो दे ऊणे ओर तिना तेसरी आज्ञा मानेया करनी।#7:27 प्रका. 11:15 28येई सब था जो मैं सुफने दे देखेया था, पर आऊँ दानिय्येल मनो दे बड़ा कबराईगा ओर डरीगा ओर मैं ये गल्ल आपणे मनो देई राखी।
Currently Selected:
दानिय्येल 7: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
