आमोस 4
4
सामरिया रिया जवाणसा
1ओ सामरिया री पाह्ड़िया पाँदे रणे वाल़ी जवाणसो, यहोवे रा सन्देश सुणो। तुसे गरीब लोका साथे बुरा बर्ताओ करोईया। तुसे जरूरतमंदा खे केसोईया। तुसे आपणे-आपणे लाड़ेया खे बोलोईया, “आसा खे कुछ पीणे खे ल्याओ!” पर तुसे पईले ते ई बाशानो रिया गायी जेड़िया मोटिया ए। 2परमेशर यहोवा आपणी पवित्रता री कसम खाई की बोलोआ, “देखो, से बखत आऊणा जेबे तुसा रे नाको दे नकेल पाई की तुसे लई जाणे। तुसा बीचा ते हर एकी खे कांडे दे फसी री मछलिया जेड़े कसीटणे। 3तुसा रे दुश्मणा तुसे तुसा रे शईरो री दवाला दे कोर करी की बारे खींजी लणे, ओर तिना तुसे शईरो ते बारे हेर्मोन काअटिया रिया तरफा खे सेटी देणे। ये जरूर ऊणा कऊँकि मैं यहोवे ये बोली राखेया ए।”
4बेतेल शईरो दे आई की मेरे खलाफ पाप करो ओर गिलगाल शईरो दे आई की बार-बार पाप करो, हर रोज प्यागा आपणी बलि पेंट चढ़ाओ। हर तीजे साले आपणी उपजा रा दसुआ इस्सा ल्याया करो। 5कुछ रोटी सजेड़े साथे पकाओ। इजी खे तन्यवादो री पेंटा रे रूपो दे फूको। आपणी इच्छा ते दित्ती री पेंटा रे बारे दे प्रचार करो। ये ई तुसा इस्राएलिया खे करना पसन्द ए, परमेशर यहोवे री येई बाणी ए। 6मैं तुसा रे सबी शईरा दे दाँदा री सफाई कराईती दी ए ओर तुसा रिया सबी जगा दे रोटिया री कमी करी राखी, तेबे बी तुसे मेरी तरफा खे फिरी की नि आए, परमेशरो री येई बाणी ए। 7जेबे बडाईया रे तीन मीन्ने रयी गे, तेबे मैं तुसा खे बर्खा नि कित्ती, मैं एकी शईरो दे पाणी बरसायी की दूजे दे नि बरसाया, एकी डोरूए दे पाणी बरसेया ओर दूजे डोरूए दे जिदे बरसेया नि, से सूकीगा।
8इजी री खातर दो-तीन शईरा रे लोक पाणी पीणे खे मारे-मारे फिरदे ऊए एक ई शईरो दे आए, पर रज्जे नि, तेबे बी तुसे मेरी तरफा खे नि फिरे, परमेशरो री येई बाणी ए। 9मैं तुसे लू ओर सूका पड़ने ते काये ओर जेबे तुसा रे बगीचे ओर अंगूरा रे बगीचे, दाऊगल़े ओर जैतूनो रे डाल़ बऊत ऊईगे, तेबे सेयो टिड्डिये खाई ते, तेबे बी तुसे मेरी तरफा खे फिरी की नि आए, परमेशरो री येई बाणी ए। 10मैं तुसा पाँदे बी बिपदा पेजिया, जेड़िया मैं मिस्र देशो पाँदे पेजिया थिया। मैं तुसा रे जानवर तलवारे की काये। मैं तुसा रे पाल़े दे कोड़े बी काईते। मैं तुसा रे डेरेया री बदबूआ ते तुसा रे नाक परी ते। इतणा ऊणे ते बाद बी तुसे मेरिया तरफा खे नि आए, परमेशरो री येई बाणी ए। 11मैं तुसा बीचा ते कई जणे एड़े नाश करीते, जिंयाँ परमेशरे सदोम ओर गमोरा रे लोक नाश कित्ते थे ओर तुसे आगी ते निकयाल़े रे लकड़ूआ जेड़े ठईरे, तेबे बी तुसे मेरी तरफा खे फिरी की नि आए, परमेशरो री येई बाणी ए। 12तो एबे ओ इस्राएलो रे लोको, आऊँ तुसा खे सजा देणे लगी रा। आपणे परमेशर मां सामणे खड़े ऊणे खे खड़े ऊई जाओ। 13देख, पाह्ड़ो खे बनाणे वाल़ा, अवा खे बनाणे वाल़ा ओर माणूंआ खे तेसरे मनो री सोच बताणे वाल़ा ओर जो प्रयासा ओर न्हेरे खे बनाणे वाल़ा ए, ओर जो तरतिया दे ऊच्ची जगा दे चलणे वाल़ा ए, तेसरा नाओं ई सेना रा यहोवा ए!
Currently Selected:
आमोस 4: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
