Lwiimbo lwa Solomoni 3
3
1Busiku boonse nkendede abulo,
ndalikuyeeya yooyo ngwenjanda,
ndali kumuyeeya pele ndimujaneyi.
2Ndakati, Eembuke, ndiime-ime mumunzi,
mumigwagwa amuzisambalilo, ndiyandaule yooyo ngwenjanda.
Aboobo ndakamuyandaula, pele tiindakamujana.
3Balindizi bakandijana ciindi nibakali kweendeenda mumunzi.
Ndakababuzya kuti, “Sena mwamubona ooyo ngwenjanda?”
4Mbundakabainda-inda buyo, nkujana ngooyu ngwenjanda.
Ndakamujatilila. Nsiindakamuleka kuti andisiye,
mane kusikila nindakamusisya kwesu,
ooko nkundakazyalilwa muzyuli.
5Amundisyomezye nobakaintu bamu Jelusalemu,
amukonkezye muzina lyanjeleele alyansya kuti
tamukoonyonganya luyando lwesu.
Lwiimbo lwatatu
Mukaintu
6Nguni ooyu uuza buza uuzwida munkanda uuli mbuli musumpuululu wabusi,
uununkilila mula, atununkilizyo toonse tuuzigwa abasambazi?
7Amulange! Basempwide Solomoni mucisempwido cakwe,
ulasindikilwa abasilumamba bali makumi aali cisambomwe, balemenede ba Baisilayeli.
8Boonse basyomekede mapanga.
Boonse balicibwene kulwana,
umwi aumwi usyomekede panga mukasolo,
balilibambilide nkondo iibuka masiku.
9Mwami Solomoni wakalipangila cisempwido,
wakacipanzya amapulanga aaku Lebanoni.
10Wakacipangila myeendo yansiliva,
tako lyaco lyakazilulwidwe angolida.
Cuuno caco cakali cacisombo,
mukati mwakasyingululwa kabotu-kabotu cabuuya abamakaintu baku Jelusalemu.
11Amuzwe, nobakaintu ba Ziyoni muzoobone mwami Solomoni,
kasamide musini, musini ooyo ngobakamusamika banyina mubuzuba mbwaakakwata,
mubuzuba oobo mbwaakali kusekelela.
Currently Selected:
Lwiimbo lwa Solomoni 3: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
