Baloma 6

Zyakuba abuumi muli Kilisito

1Lino twaambe buti? Sena inga tulati katubisya buyo kutegwa luse lwa Leza luvule kapati? 2Peepe! Ino swebo notufwide mukuti tatutobeli nzila yazinyonyoono inga twazumanana buti kukkala mukucita zibi? 3Sena tamuzi kuti swebo toonse twakaba umwi a Jesu Kilisito nitwakabbapatizigwa? Mulubbapatizo twakatambula zileleko zyalufu lwakwe. 4Aboobo cili mbuli kuti twakafwa akuzikkwa anguwe kubafu anguzu zyawisi, mbubonya oobo aswebo tweende mubuumi bupya.

5Naa twakaba umwi a Kilisito mulufu lwakwe, mbubonya oobo tuyooba anguwe mukubusigwa kwabafu mbuli mbwaakabuka walo. 6Tulizi kuti buntunsi bwesu bwakaloba naakakankaminwa aciingano kuti bukkale bwesu bubi bunyonyoonwe aboobo tutabi limbi bazike bazinyonyoono. 7Nkaambo muntu wafwa, waangunuka kunguzu zyazinyonyoono. 8Naa twakafwa a Kilisito tulasyoma kuti tuyooba abuumi antoomwe anguwe. 9Tulizi kuti Kilisito wakabuka kubafu alimwi tacifwi limbi pe. Lufu lucinyina nguzu kulinguwe. 10Wakafwida zinyonyoono lomwe buyo, eelyo zinyonyoono tazicijisi nguzu kulinguwe. Buumi mbwapona ubupa kuli Leza. 11Mbubonya oobo anywebo mulifwide kuzinyonyoono, pele mulapona kuli Leza muli Kilisito Jesu Mwami wesu.

12Nkaambo kaako mutazumizyi zinyonyoono kuti zyeendelezye mibili yanu iifwa, alimwi mutaccilili zisusi zyayo. 13Mutabelesyi cimwi cazizo zyanu kuzibi. Pele mulipe kuli Leza mbuli bantu bakazwa mulufu kuya mubuumi. Amubelesye zizo zyanu mukucitila Leza zyabululami. 14Kuzwa ono cinyonyoono tacili aanguzu kulindinywe, nkaambo ceendelezya buumi bwanu tuuli Mulawo pe, pele nduse lwa Leza lutaambiki.

Tuli babelesi ba Kilisito

15Ino twaambe buti? Sena tucite zinyonyoono, nkaambo tatuceendelezegwi a Mulawo pele aluse lwa Leza? Embo pe! 16Kuti walyaaba mbuli muzike kuli umwi, uleelede kumuswiilila. Naa muli bazike bazinyonyoono muyoofwa, pele naa mwabelekela Leza muyooba balulami. 17Ncobeni mwakali bazike bazinyonyoono, pele tulalumba Leza nkaambo mazuba aano mulaswiilila amoyo oonse njiisyo zyakasimpe nzimwakaiisigwa. 18Lino mwavunwa kuzwa muzinyonyoono mwaba batwanga babululami. 19Ndamupa cikozyanyo eeci kuti ambweni mbomuli ndinywe nimwatamvwa. Kaindi mwakalilipede lwanu mukucita zisofweede azibi zimwi zili boobo. Mbubonya oobo amulipe lino kuti mubelekele Leza akucita ziluleme zitondezya busalali bwanu.

20Nimwakacili bazike bazinyonyoono, tiimwakali kucita ziluleme. 21Ino lino mbulumbu nzi mbomwakajana nimwakali kucita zintu eezyo zimufwisya nsoni mazuba aano? Nkaambo mamanino aazeezi ndufu. 22Pele lino mbumwakavunwa kuzwa kuzinyonyoono, mubelekela Leza. Bulumbu bwanu mbusalali, eelyo mamanino mbuumi butamani. 23Bulumbu bwazinyonyoono ndufu, pele Leza ncapa buyo mbuumi butamani muli Kilisito Jesu Mwami wesu.

Currently Selected:

Baloma 6: Tonga96

Highlight

Copy