Ciyubunuzyo 5
5
Zyabbuku a Mwanaa mbelele
1Ndakabona bbuku mujanza lyalulyo lyayooyo uukkede acuuno cabwami. Bbuku eeli lyakalilembedwe mukati aanze, alimwi lyakalimatidwe muziga zili ciloba. 2Mpoonya ndakabona mungelo wanguzu wakakanana cakupozomoka akuti, “Nguni weelede kumatula ziga kuti avunune bbuku eeli?” 3Pele kwakanyina naba omwe kujulu, naa ansi nikuba kunsi aanyika wakali kukonzya kuvununa bbuku eeli akulanga zyakali mumo pe. 4Ndakalila kapati, nkaambo taakwe naba omwe wakeelede kuvununa bbuku eelyo nikuba kulilanga-langa mukati. 5Eelyo umwi wabapati wakandaambila kuti, “Utalili! Bona! Syuumbwa uuzwa kumusyobo wa Juda, walunyungu lwa Devedi wakazunda, aboobo walo ulakonzya kuvununa bbuku akumatula ziga zyalyo zili ciloba.”
6Lino ndakabona Mwanaa mbelele kaimvwi akati kacuuno azilenge zyone alimwi abapati. Mwanaa mbele wakali kulangika mbuli uujaidwe. Wakalijisi meja aali ciloba ameso aali ciloba, eezi zyakali myuuya ya Leza iili ciloba eeyo yakatumwa munyika yoonse. 7Mwanaa mbelele wakanyamuka watambula bbuku lyakali mujanza lyalulyo lyayooyo uukkede acuuno cabwami. 8Lino naakamana kubweza bbuku eelyo, zilenge zyone abapati bali makumi obilo abane bakavuntama kumbele lya Mwanaa mbelele ooyu. Omwe-omwe wabo wakajisi kalumbu amitiba yangolida iizwide tununkilizyo. Kwalo kuli nkokukomba kwabasalali. 9Bakali kwiimba lwiimbo lupya kabati,
“Nduwe weelede kubweza bbuku akumatula ziga.
Nkaambo nduwe wakajaidwe,
nkabela abulowa bwako wakanununa bantu
kuti babe bantu ba Leza kuzwa kumisyobo yoonse,
milaka yoonse, azisi zyoonse.
10Wakabacita kuti babe babwami,
abapaizi ba Leza wesu,
aboobo bayoolela ansi.”
11Alimwi ndakalanga, ndakabona zyuulu-zyuulu zitabaliki zyabangelo! Bakaliimvwi kabazingulukide cuuno cabwami, eelyo zilenge zyone abapati, 12bakali kwiimba, nkemvwide cakupozomoka kabati,
“Mwanaa mbelele ooyo wakajaidwe,
uleelede kutambula bwami, lubono, busongo, nguzu,
kulemekwa, bulemu, akutembaulwa!”
13Alimwi ndakamvwa zilenge zyoonse mujulu, munyika, kunsi aanyika, mulwizi, azintu zyoonse zili mumo kaziimba kaziti,
“Ooyo uukkede acuuno cabwami a Mwanaa mbelele,
batembaulwe, balemekwe, alimwi bapegwe bulemu anguzu mane kukabe kutamani!”
14Zilenge zyone zyakaingula kuti, “Akube boobo!” Mpoonya bapati bakavuntama bakomba.
Currently Selected:
Ciyubunuzyo 5: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
