Ciyubunuzyo 17

Zyamukaintu simamambe ulaampuwo

1Lino umwi wabangelo bali ciloba bakajisi mitiba iili ciloba wakaza kulindime akuti, “Boola ndikutondezye mbuli mukaintu simamambe ulaampuwo uulya mbwatisubulwe, munzi mupati uulya uuyakidwe munsi aamaanzi manji. 2Bami bamunyika bakacita bumambe anguwe, aboobo bantu bamunyika bakakolwa waini wabumambe bwakwe.”

3Mpawo Muuya Uusalala wakasika kulindime, eelyo mungelo ooyu wakanditola kunkanda. Ooko ndakaakubona mukaintu wakakkede amunyama uusalala pyu. Munyama ooyu wakajisi mazina aasampaula Leza aakalembedwe amubili wakwe woonse. Wakalijisi mitwe iili ciloba ameja aali kkumi. 4Mukaintu wakasamide zisani zyacisombo azisalala pyu, wakalibotya angolida atubwe tweebesi tuyandisi. Mujanza wakajisi nkomeki yangolida iizwide zisusi azimwi zisesemya zyabumambe bwakwe. 5Ankumo yakwe kwakalembedwe zina lyakuzaalikizya ndeeli, “Babuloni mupati uuzyala basimamambe boonse azisesemyo zyoonse zyaansi.” 6Mpoonya ndakabona kuti mukaintu wakakoledwe bulowa bwabasalali alimwi abulowa bwabaabo bakajaigwa akaambo kakusyomeka kuli Jesu.

Nindakamubona ndakagambwa kapati. 7Mpawo mungelo wakandibuzya kuti, “Ino ugambwa nzi? Mebo ndakwaambila zyamaseseke aamukaintu ooyu amunyama ngwatantide uujisi mitwe iili ciloba ameja aali kkumi. 8Uulya munyama ngoobona, ciindi cimwi wakali muumi, pele lino tali muumi. Ulaafwiifwi kuzwa mumulindi uutagoli kuti aye kukunyonyoonwa. Bantu bacipona ansi aano kwaambisya aabo bali amazina aatakalembwa mubbuku lyabuumi kuzwa kumalengelo aanyika, bayoogambwa baakubona munyama ooyu. Ciindi cimwi wakali muumi, pele lino tali muumi, nikuba boobo uyoolibonya alimwi.

9“Ciyandika aawa mbusongo akumvwisya. Mitwe iilya iili ciloba nzilundu zili ciloba aawo mpakkede mukaintu. 10Alimwi kuli bami bali ciloba, bosanwe bakafwa, omwe buyo nguucilela, ooyu umwi uciza, aboola uyoolela kwamazuba mace buyo. 11Munyama ooyu wakali muumi walo ngwindati lino tali muumi, ngowalusele, alimwi ngumwi wabali ciloba, nikuba boobo awalo uyoonyonyoonwa.

12“Meja aali kkumi ngookabona mbami bali kkumi. Aaba tabanatambula bwami pe, pele balatambula nguzu zyabwami kwakaindi kaniini buyo antoomwe amunyama. 13Aaba bali kkumi balijisi muzeezo omwe boonse, aboobo balapa munyama nguzu abwami bwabo. 14Bayoolwana Mwanaa mbelele, pele Mwanaa mbelele ooyu antoomwe abantu bakwe baitidwe, basalidwe, alimwi basyomeka bayoozunda, nkaambo ngo Mwami wabami a Mweendelezi wabeendelezi.”

15Mungelo ooyu alimwi wakandaambila kuti, “Maanzi aalya ngookabona, aawo mpakkede mukaintu sibumambe uulya mbantu bazisi, bamisyobo, amilaka iindene-indene. 16Meja aali kkumi ngookabona antomwe amunyama ziyoosulaika sibumambe. Ziyoobweza zyoonse nzyajisi, ziyoomusiya acintanda, alimwi ziyoolya mubili wakwe akumetenta mumulilo. 17Nkaambo Leza wakabikka muzeezo omwe mumyoyo yazyo wakuti zicite mbuli Leza mbwayanda kuti zicitike, nkaako zyakapa nguzu zyabo zyakulela mumaanza aamunyama uulya, mane kusikila nizyakacitika zyoone eezyo Leza nzyaakaamba.

18“Mukaintu uulya ngookabona munzi mupati uulela bami boonse baansi ano.”

Currently Selected:

Ciyubunuzyo 17: Tonga96

Highlight

Copy

Compare