Ciyubunuzyo 15

Zyabangelo amapenzi aamamanino

1Lino ndakalanga ndakabona acimbi cigambya mujulu, cakali cipati kapati. Ndakabona bangelo bali ciloba amapenzi aali ciloba. Aaya ngaamamanino, nkaambo bukali bwa Leza mpobumanina ali yaaya.

2Alimwi ndakabona cintu cilangika mbuli lwizi lubalangala, civweledwe mulilo. Ndakabona abaabo bakazunda munyama, mutuni wakwe, acisimbo cazina lyakwe, kabaimvwi kumbali aalwizi lubalangala balijisi atulumbu Leza ntwaakabapa. 3Bakali kwiimba nyimbo ya Mozesi, mubelesi wa Leza alwiimbo lwa Mwanaa mbelele bakati,

“O Mwami Leza Singuzuzyoonse,

milimo yako mipati alimwi ilagambya.

Nzila zyako zililuleme, alimwi zilisinizizye.

Nduwe Mwami wamisyobo yoonse.

4Ino nguni uutakuyoowi akulemeka zina lyako, O Mwami?

Nkaambo yebo olikke nduwe Uusalala.

Misyobo yoonse iyooyoboloka kuti ikukombe,

nkaambo milimo yako iiluleme, bantu boonse baliibwene.”

5Musule aceeci, ndakalanga, ndakabona ŋanda ya Leza mujulu kiijulidwe, eelyo ndakabona atente lyacizuminano mulinjiyo. 6Bangelo bakajisi mapenzi aali ciloba bakazwa muŋanda ya Leza, bakalisamide zisani zyandeketela zibotu, azyamba zyabo bakalyaangide ntambo zyangolida. 7Mpawo cimwi cazilenge zyone cakapa bangelo aaba bali ciloba mitiba yangolida iili ciloba iizwide bukali bwa Leza, ooyo uuli muumi kwalyoonse alyoonse. 8Ŋanda ya Leza yakazula busi buzwa kubulemu bwa Leza alimwi akunguzu zyakwe. Taakwe naba omwe wakakonzya kunjila muŋanda ya Leza mane kusikila mapenzi aaya aali ciloba aakaletwa abangelo bali cibba naakamana.

Currently Selected:

Ciyubunuzyo 15: Tonga96

Highlight

Copy

Compare