Intembauzyo 97
97
1Mwami Leza nguulela, nyika iitangale, nkomwe azyoonse zyalwizi zisekelele.
2Makumbi amudima uusiya mbi zilimuzingulukide, takwe lusalululo,
ulalela cakululama mubwami bwakwe.
3Mulilo uleenda kumbele lyakwe, ulasyukutya mumabazu oonse aabo bamulwana.
4Ndabo zyakwe zimunikila nyika, nyika yabona boobo ilakankama.
5Zilundu zileenzemuka mbuli bunzuka kumbele lya Mwami Leza,
kumbele lya Mwami wanyika yoonse.
6Julu lyaambilizya bululami bwakwe, bantu boonse balabubona bulemu bwakwe.
7Boonse bakomba zibeze bausigwa nsoni,
bausigwa nsoni aabo balikankaizya mumituni.
Baleza boonse balamukomba Mwami Leza.
8Bantu bamu Ziyoni balamvwa akusekelela,
bantu baminzi yacisi ca Juda balatangala,
balatangala nkaambo kambeta zya Mwami Leza.
9Nkaambo yebo, O Mwami Leza, nduwe Sijulu wamajulu,
munyika yoonse ulatembaulwa kwiinda baleza boonse.
10Aabo bamuyandisya akusulaika bubi, aabo basyomeka kulinguwe,
Mwami Leza ulababamba, ulabavuna kuzwa kubantu babi.
11Mumuni wakwe umunikila baluleme, nguupa kuti baluleme mumyoyo batangale.
12Nywebo nobalulami, amusekelele amutembaule zina lyakwe lisalala.
Currently Selected:
Intembauzyo 97: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
