Intembauzyo 86
86
Lwiimbo lwa Devedi
1Kondimvwa, O Mwami Leza undivune, ndimucete, ndibulide.
2Kobamba buumi bwangu, ndilipede kulinduwe, nduwe Leza wangu,
futula mubelesi wako uusyomeka.
3Kondeengelela, O Mwami, nduwe ngwelilila buzuba boonse.
4Tangazya mubelesi wako, moyo wangu, O Mwami, usukeme nduwe.
5Yebo, O Mwami, ulisilubomba, ulalekelela, aabo boonse bakulilila ulabayandisya.
6Komvwa kukomba kwangu, O Mwami Leza, swiilila nkwelilila lweengelelo.
7Njookwiita mubuzuba bwamapenzi aangu, eelyo uyoondivuna.
8Akati kabaambwa kuti mbaaleza, taakwe ulaamilimo iinga yeelana ayako.
9Bamisyobo yoonse bayooboola kuzookukomba, O Mwami Leza,
bayoolemeka zina lyako nkaambo nduwe ookabalenga.
10Ulacita zintu zipati zigambya, nkaambo uli mupati alimwi ndonduwe Leza olikke.
11Ndiiisye nzila yako, O Mwami Leza, kuti nkeende mukasimpe kako.
Ndipa moyo uukuyandisisya, kuti ndemeke zina lyako.
12Ndakutembaula, O Mwami Leza wangu, amoyo wangu woonse,
ndinoolumbaizya zina lyako lyoonse.
13Luyando lwako lutazungaani ndupati kulindime,
wakandivuna kuzwa kwacivumwe.
14Bandilwana basilupyopyongano, O Leza, cikamu cabantu basilunya
ciyanda kundijaya, basilunya aabo batakulemeki.
15Pele yebo, O Mwami, uli Leza weetelela, siluse, uutafwambi kunyema,
uujisi luyando lutazungaani, uusyomeka.
16Kondiceba undeengelele, pa nguzu kumubelesi wako, ndivune,
ndemwanaa mubelesi wako, mukaintu uusyomeka.
17Nditondezye zibotu, kuti basinkondoma babone bause,
nkaambo yebo, O Mwami Leza, wakandigwasya, wakanduumbulizya.
Currently Selected:
Intembauzyo 86: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
