Intembauzyo 80
80
Kumweendelezi wanyimbo. Aimbye bwiimbwa nyimbo ya “Mpana zyacizuminano.” Lwiimbo lwa Asafu.
1Yebo, omweendelezi wa Isilayeli kotuswiilila, yebo, ooenzya Jakobo
mbuli butanga tuswiilile.
libonye, yebo ookkede akati kabakelebu, libonye kuziinga zya Efulemu, Benjamini a Manase.
2Nyamuka munguzu zyako, boola uzootuvune.
3O Leza, tubukulusye, tumunikile zileleko kuti tufutulwe.
4O Mwami Leza Singuzuzyoonse,
ino unookalede kusikila lili, kotatambuli kukomba kwabantu bako?
5Bantu bako wabasanizya misozi, banywa camisozi bantu bako.
6Watusampuzya kuli mbotubambene limwi, basinkondoma balatuseka.
7O Mwami Leza Singuzuzyoonse, tubukulusye, tumunikile zileleko kuti tufutulwe.
8Wakaleta musaansa kuzwa ku Ijipiti, wakatanda misyobo akuusyanga.
9Wakuubambila busena, wasimpa miyanda, wayandalala nyika yoonse.
10Zilundu zyakavumbwa acimvule cawo, milombe yakavumbwa amitabi yamusaansa ooyo.
11Wakatandabika mitabi yawo kusikila kulwizi,
lulelema lwawo lwakasika kumulonga wa Yufuletisi.
12Nkaambo nzi ncoomwaya lubaya lwawo kuti boonse bainda,
boonse bainda munzila kabacela nsaansa zyawo.
13Bankuntula bamuzisaka baluuluma, tunyama twamusokwe tuluulya.
14O Leza Singuzuzyoonse, boola kulindiswe alimwi,
langa kuzwa kujulu ubone bantu bako.
15Ubone musamu ngookasyanga ajanza lyako lyalulyo,
mutabi ngookabambila omwini.
16Basinkondonyoko bagonka musaansa wako buutenta,
baloba bantu bako nkaambo ulibakalalide.
17Bakwabilile bantu bako mbookasala, musyobo ooyo ngookapa nguzu mpati.
18Ocita oobo tatukakufutatili limbi, tubukulusye katukutembaula.
19O Leza Singuzuzyoonse, tubukulusye, tumunikile zileleko kuti tufutulwe.
Currently Selected:
Intembauzyo 80: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
