Intembauzyo 79
79
Lwiimbo lwa Asafu
1Misyobo yasaala lukono lwako, O Leza,
ŋanda yako iisalala biisofwaazya, munzi wa Jelusalemu waba citantaala.
2Mitumba yababelesi bako biipa bayuni bamuluuwo,
mibili yabasalali bako biisanizya banyama baansi.
3Batila bulowa mbuli maanzi kuzinguluka Jelusalemu,
taakwe aucikozya kuzikka bafu.
4Twaba cisesyo kuli mbotubambene limwi,
tuli masampu kuli baabo batweengelede.
5Ino uyooleka lili, O Mwami Leza? Sena ucinootunyemenede lyoonse?
Ino uyooleka lili kutunyemena? Bukali bwako bulapya mbuli mulilo.
6Nyemena misyobo eeyo iitakuzi, zisi eezyo zitakombi zina lyako.
7Zisi eezyo zinyonyoona Jakobo, eezyo zisaala cisi cakwe.
8Utatubedi aankoto akaambo kazinyonyoono,
zinyonyoono zyabasikale besu, twabula mbotucita, tweengelele kufwambaana.
9O Leza mufutuli wesu, tugwasye,
tuvune akaambo kabulemu bwazina lyako,
lekelela zinyonyoono zyesu akaambo kazina lyako.
10Ani bamasi baambila nzi kuti,
“Ulikuli Leza wabo?” Katulibwenene, isubule misyobo eeyi kuti izibe,
izibe kuti waipilusizya bubi, bubi bwakutila bulowa bwababelesi bako.
11Komvwa kutongela kwabaange, bavune aabo basinganyizidwe munguzu zyako.
12Aaba mbotubambene limwi babweedezezye bubi,
mukuti balakusampaula basubule ziindi zili ciloba, basubule O Mwami.
13Ndendilyo swebo tobana bako,
tombelele zyabutanga bwako notunookulumba lyoonse, lyoonse katunootembaula zina lyako.
Currently Selected:
Intembauzyo 79: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
