Intembauzyo 77
77
Kumweendelezi wanyimbo. Aimbye bwiimbwa nyimbo ya Jedutuni. Lwiimbo lwa Asafu
1Ndakalilila Leza kuti andigwasye, ndakamulilila Leza kuti andivune.
2Nindakali mumapenzi ndakayandaula Mwami,
busiku boonse ndakatambika maanza aangu mukukomba.
3Ndakatongela, nindakaibaluka Leza, moyo wangu wakawizuka, ndakatungumana.
4Wakacita kuti mbe aacilabila, mukupenga kwangu ndakacilwa koona.
5Ndakayeeya mazuba aakaindi, ndakayeeya myaka yakale-kale.
6Nkeyeeya kapati masiku, ndakatungumana, ndalyaambauzya ndati,
7“Sena taciyoobotelwi, taciyoobotelwi mulindiswe alimwi?
8Sena tatibambe cisyomezyo cakwe, kuti cikkalilile akutamani?
9Sena Leza taceengeleli? Sena taceeteli akaambo kakunyema?”
10Aawo ndakati, “Cindicisya moyo ncakuti, ‘Singuzuzyoonse waleka,
waleka kucita mbwaakali kucita kaindi.’”
11Zyamilimo yako, O Mwami Leza, njooziibaluka, Iiyi, zyamaleele aako aakaindi njooziyeeya.
12Mumoyo wangu ntelaika milimo yako yoonse, akuyeeya nzyanguzu nzyookacita.
13Zilasalala, nzila zyako, O Leza. Nguleza nzi mupati mbuli Leza wesu?
14Nduwe Leza uucita maleele, ulatondezya nguzu zyako akati kabantu.
15Nduwe ookanununa bantu bako ajanza lyako lya nguzu,
ajanza lyako lya nguzu okanununa lunyungu lwa Jakobo a Josefa.
16Maanzi naakakubona, O Leza, naakakubona akayoowa, maanzi malamfu akakankama.
17Makumbi akalosya maanzi, mizumo yakamvwigwa kujulu,
ndabo zyakali kwiilingana mbuli mivwi.
18Mukambizi mwakamvwigwa muzumo wako, lyakamweka ndabo yako munyika,
nyika yakatenkaana akuzungaana.
19Nzila yako yakainda mulwizi, nzila yako yakainda mumaanzi malamfu,
nkaako matende aako taakaboneka.
20Wakasolweda bantu bako mbuli mbelele, mbuli mbelele kabalangwa a Mozesi alimwi a Aloni.
Currently Selected:
Intembauzyo 77: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
