Intembauzyo 74
74
Lwa Asafu. Masikili
1Ino otutakatila nzi akutamani, O Leza? Nkaambo nzi ncookalalila mbelele zyabutanga bwako?
2Yeeya bantu aaba mbookaula kale-kale, musyobo ooyo ngookanununa
kuti lube lukono lwako, yeeya cilundu ca Ziyoni oomo mookakkede.
3Nkoo, endeenda ubone mbubakapwayaula, oobo mbubakanyonyoona cikombelo,
cikombelo cisalala ca Leza basinkondoma mbubaacinyonyoona.
4Bakulwana balapozomoka muŋanda yako, babikka ndembela ooko kutondezya kuzunda.
5Bali mbuli baalumi bajisi tweembe, balibambilide kutema cisaka.
6Bakapwayaula zibezedwe zyoonse zya ŋanda yako, bakazipwaya atweembe ansando zyabo.
7Bakatenta ŋanda yako iisalala mane yawa, bakasofwaazya busena bwazina lyako.
8Bakalyaambauzya mumoyo bati, “Tubanyonyweede limwi.”
9Taakwe maleele ngotucibona, takucikwe amusinsimi pe.
Taakwe naba omwe wesu uuzi, uuzi kuti eeci cilatola ciindi cilamfu buti.
10O Leza, Ino basinkondonyoko banoosampaula kusikila lili?
Sena bakulwana kabatukana zina lyako lyoonse?
11Ino tobaumi, ubalekela nzi? Baume ajanza lyako lyalulyo,
ligwisye akaango kako ubanyonyoone andilyo.
12Pele Leza ngomwami wangu kuzwa kaindi, munyika nduwe ootuvuna.
13Nduwe ookapwayaula mitwe yacipangaliko camumaanzi,
nduwe wakaandaanya lwizi anguzu zyako.
14Wakapwasyaula mitwe yamuzoka wamumaanzi, wasanizya zikkala munkanda.
15Wakasinkula tusensa atulonga nduwe, nduwe wakayuminizya milonga mipati.
16Sikati amasiku, nzizyako, nduwe wakabikka zuba amwezi.
17Minyinza yanyika yoonse nduwe wakiibikka. Mainza amupeyo nduwe wakazibikka.
18Bona basinkondonyoko mbobakusampaula, O Mwami Leza,
bantu bafuba-fuba mbobakutukana.
19Utaabi buumi bwaŋombe yako kubanyama bamusokwe, utalubi kukwabilila
bantu bako bapenzegwa lyoonse.
20Yeeya cizuminano cako, nkaambo munyika muzwide lupyopyongano.
21Badyaminidwe utabausyi nsoni, batembaule zina lyako bacete ababulide.
22Nyamuka, lyaambilile, O Leza, yeeya mbuli bafuba-fuba mbobakusampaula buzuba boonse.
23Utabalangilili buyo basinkondonyoko aabo bakuzanyaukila,
bakulwana bapyopyonganya lyoonse.
Currently Selected:
Intembauzyo 74: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
