Intembauzyo 73
73
BBUKU LYATATU
(Intembauzyo 73—89)
Lwiimbo lwa Asafu
1Kwaamba masimpe Leza mmubotu ku Baisilayeli, aabo balondokede mumoyo.
2Pele kwaamba zyandime, ndakatiwe, ndakatiwe aasyoonto nindakatezemuka.
3Ndakanyonokela basicinguni, ndakabona kuzwidilila kwababi.
4Balo tabaciswi-ciswi, bajisi mibili mibotu balilimvwide.
5Tabajisi mapenzi manji mbuli bamwi, tabapengi bupenga bamwi.
6Kulisumpula nkakawenge kabo, manyongwe ngobalivumbya.
7Muzwa zibi mumyoyo yabo mibi, nzyobayeeya nzibi zyalo-zyalo.
8Baambya meno, bakonga bantu mucinguni cabo, bakanza kubadyaminina.
9Babisyaanya Leza wakujulu, boola cisi amilaka yabo.
10Bantu ba Leza abalo balainka kuli mbabo, balainka kuyookkuta nzyobaamba.
11Baamba kuti, “Ino Leza inga waziba buti? Sena Sijulu ulijisi luzibo?”
12Mbobabede basizibi oobo, balaliiba akujana lubono lunji lyoonse.
13Masimpe, nikuba kuti ndakabatamika moyo akusamba mumaanza,
kusamba kutondezya kuti nnyina mulandu, pele zyoonse eezi nzyabuyo.
14Buzuba boonse ndakali kupenzegwa, cifumo-fumo lyoonse ndakali kusubulwa.
15Nindakati, “Mboobu mbwetaambe,” nindakabisya musela wabana bako.
16Nindakasola kuti mmvwisye zintu eezi, kuzimvwisya ncobeni cakandikatazya kapati.
17Aawo nindakanjila cikombelo cisalala ca Leza, nindakabona mamanino aabo.
18Kwaamba masimpe ubabikka abutezi, ulabawisya akubanyonyoona.
19Bayoofwambaana kunyonyoonwa, mukuyoowa bayoomana do.
20Yebo, onyamuka O Mwami Leza, baba mbuli ciloto muntu asinsimuka,
ulabasampaula akubalanga mbuli ciloto buyo.
21Moyo wangu nuwakauside, muuya wangu kuulutide,
22nsiindakajisi maanu ndakali mufuba-fuba, ndakali buyo mbuli munyama kuli nduwe.
23Nikuba boobo ndaanduwe lyoonse, ulindijisilizi kujanza lyako lyalulyo.
24Nduwe oondeenzya kondilailila, uyoonditola kubulemu bwako.
25Ani nguni ngwejisi kujulu, tee nduwe buyo olikke? Mukuti ulaandime,
taakwe nceyanda ansi aano.
26Mubili amoyo wangu zyandilekelezya, Leza nenguzu zyamoyo wangu,
nguundipa ziyandika zyoonse.
27Boonse aabo batantamukide bayooboola, ulabanyonyoona boonse batasyomeki kuli nduwe.
28Mebo ndabotelwa nkaambo ndaafwiifwi anduwe,
ndazumina kuti Leza ngamayubilo aangu,
njoolungulula zyamilimo yakwe yoonse.
Currently Selected:
Intembauzyo 73: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
