Intembauzyo 37
37
Lwa Devedi
1Utalipenzyi akaambo kababi, bacita zibi utababedi aabbivwe.
2Balafwambaana kupusama mbuli bwizu, balanyana-nyana mbuli tusyango.
3Kosyoma mu Mwami Leza noticite zibotu, notikonzye kukkala munyika cakuliiba.
4Mu Mwami Leza kobotelwa, ziyanda moyo wako uyookupa.
5Ku Mwami Leza ulipe, uyookucitila zibotu osyoma muli nguwe.
6Uyoomwesya bululami bwako, mbubumweka mumuni wakubucedo,
mbuli sikati mbobuyoobala bululami bwako.
7Konga kolibatamika kumbele lya Mwami Leza,
utapengi bantu bazwidilila munzila zyabo,
bamanizya kucita milimo mibi.
8Lijate, leka bukali, utanyemi, utalikatazyi nkaambo inga cakuletela bubi.
9Bayoonyonyoonwa babi, bayookona nyika aabo balindila Mwami Leza.
10Kwainda kaindi kaniini buyo, babi tabacinooliwo,
tabakajaniki nikuba kuti ukabalangaule.
11Babombede myoyo bayookona nyika, bayookkala muluumuno akukupuka.
12Babi bakanza baluleme, cabukali babalumina ntwino.
13Ulabaseka babi Mwami Leza.
Nkaambo ulizi kuti, bulasika buzuba mbobayoosubulwa.
14Basizibi basomona mapanga akukwela buta,
kuyanda kuyasa bacete bapengede, aabo beenda munzila ziluzi babajaye.
15Mapanga aabo ayoobbwabula myoyo yabo beni, mata aabo ayootyoka.
16Cita cintu cibotu ciluleme nociceya, kwiinda kucita bubi bwabasizibi banji.
17Nobaba aanguzu buti basizibi bayoonyonyoonwa, Mwami Leza ukwabilila baabo baluleme.
18Mazuba aabantu banyina kampenda ulaazi Mwami Leza,
lukono lwabo lunooliko kwalyoonse alyoonse.
19Tabakawizuki muciindi camapenzi, bayoolya cakulilekela muciindi canzala.
20Basizibi bayooloba, basinkondonyina Leza bayoonyana-nyana
mbuli maluba, bayooyangalala akuloba mbuli busi.
21Basizibi bakweleta tabapilusyi pe, baluleme balapa cabwaabi.
22Bayookona nyika aabo balelekwa a Mwami Leza, aabo bamusinganya bayoofwidilila.
23Mwami Leza ulabotelwa amuntu ulaabweende busololelwa anguwe.
24Nikuba kuti alebwe inga tawi pe, nkaambo janza lya Mwami Leza mwini ndelimujatilide.
25Ndakali mwana mpaawa sunu ndacembaala,
pele nsina bona balulami mbaakalekelezya Leza
nikuba kubona bana babo kabalombelela cakulya.
26Balaleta lyoonse akwaaba amaanza obilo, bana babo banoojisi cileleko.
27Cita zibotu, leka bubi, ocita oobo uyookkala koliibide lyoonse.
28Nkaambo baluleme Mwami Leza mbayanda, basyomeka kuli nguwe taaku nayoobalekelezya.
Unoobakwabilila lyoonse, pele lunyungu lwabasizibi uyoolunyonyoona loonse.
29Bayookona nyika mbabaabo baluleme,
bayookkala mulinjiyo lyoonse alyoonse.
30Mululami waamba cabusongo amulomo wakwe,
ziluleme zyalo nzyuuamba mulaka wakwe.
31Mumoyo wakwe muuli mulawo wa Leza. Kunyina naleya pe.
32Basizibi bayubilila baluleme, bayanda kubajaya.
33Takooyoobaaba kuli mbabo Mwami Leza pe,
takabalekelezyi ciindi nobabetekwa,
takabalekelezyi kuti bapegwe cisubulo.
34Kobamba nzila zya Mwami Leza akulangila muli nguwe,
walo uyookulemeka akukukonya nyika,
unooyoolibwenene ciindi basizibi baakusubulwa.
35Ndakabona sizibi ulaalunya kalisumpula,
kalisumpula mbuli mulombe waku Lebanoni.
36Nindakainda lwabili, ndakajana kuti taciwo,
nindakamulangaula nsiindaamubona pe.
37Langisisya muntu uutakwe kampenda, bonesya muntu uuluzi,
uyoojana kuti siluumuno nguujana coolwe kumamanino.
38Basizibi uyoobanyonyoona, kunyonyooka ngamamanino aabo.
39Uufutula baluleme ngu Mwami Leza,
ngonguwe cilikwabilizyo cabo caciindi camapenzi.
40Mwami Leza nguubagwasya akubavuna,
ulabavuna kuzwa kuli basizibi, ulabafutula nkaambo bayubila muli nguwe.
Currently Selected:
Intembauzyo 37: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
