Intembauzyo 35
35
Lwa Devedi
1Aabo bandikazya O Mwami Leza, ubakazye ayebo,
aabo bandilwana ubalwane.
2Bweza ntobo azyakulwanya zimwi, nyamuka uzoondigwasye.
3Belesya sumo amuumba, kuli baabo banditandaanya,
ndipa camba cakuti, “Ndilakufutula.”
4Bagunwe, bause nsoni aabo bayanda kundijaya,
bapiluke kabatyompedwe aabo bayanda kundinyonyoona.
5Bapepululwe amuuwo mbuli bungu, abatande mungelo wa Mwami Leza.
6Ibe yamudima nzila yabo kiitezemuka,
abatandaanye mungelo wa Mwami Leza.
7Kakunyina ancindacita banditeya kakole, bandisida dindi.
8Kabatalibambilide, banyonyoonwe, kabace kakole nkibakanditeede,
banyonyooke, bawide mudindi ndibakasya beni.
9Uyookondwa mu Mwami Leza moyo wangu,
mulufutuko lwakwe mweyoobotelwa.
10Cakumaninina njooamba kuti, “Uuli mbulinduwe, O Mwami Leza nguni?
kuzwa kuli basintanze ulabavuna aabo banyina nguzu,
ulabavuna bacete babulide nguzu kuzwa kuli baabo babalwana.”
11Nkobali bakamboni babeji bayumu myoyo,
makani ngetazi aasyoonto ngobanditamikizya.
12Muciindi cabubotu, bandiletela bubi,
akaambo kaako ndoomfokelwa.
13Ciindi nibakacisidwe mebo ndakasama masaka,
ndakakotamika mutwe akukomba, ndakalibombya akuliimya kulya.
14Mbuli uulila mwanookwabo naa mweenzinyina mbundakabede,
mbuli uulila banyina mbwindakalisukata.
15Nindakalebwa balo bakatalika kusekelela,
nketalibambilide beenzu bakabungana akundilwana,
bakali kundivwiya kabataleki pe.
16Mbubucita bakunze mbubakali kundisampaula,
cabukali bakali kundilumina ntwino.
17Ino unoolangilide kuyoosikila lili O Mwami Leza? Kuzwa kubukali
bwabo kondivuna, kuzwa kuli basyuumbwa aaba vuna buumi bwangu.
18Lino akati kambungano mpati njookulumba,
akati kamakamu aabantu njookutembaula.
19Batandiyandi aabo basinkondoma batandiseki, kaatakwe aciliwo,
kakunyina kaambo bandisulide buyo, bandifunyila meso cakusabula.
20Kwiina nobaamba caluumuno. Aabo banyina lwaambawida munyika, balabatamikizya twaambo.
21Bakandisampaula kabati, “Eebuya, eebuya, twalibonena tobeni.”
22Utaumuni buyo O Mwami Leza, nkaambo omwini ulizibwene eezi,
akaka utanditantamuki O Mwami wangu.
23Nkoo, nyamuka, unyamuke undivune, bakazye, O Leza, O Mwami wangu.
24Mubululami bwako O Mwami Leza ndaambilizya, ndaambilizya kuti nnyina kaambo,
cita kuti batandiseki.
25Bataambi kuti, “Eebuya, nceeci ncitwali kuyanda.”
Nikuba kwaamba kuti, “Ngooyo bwamweelela, twamucita.”
26Bausigwe nsoni aabo babotelwa amapenzi aangu,
bazingwe, bagunwe akuusigwa nsoni aabo boonse balidunda.
27Abakondwe akusekelela aabo babotelwa mubululami bwangu,
lyoonse abaambe kuti, “Mwami Leza mmupati, uupa kuti mubelesi wakwe alikkalilile.”
28Zyabululami bwako mulaka wangu uyoozyaamba, buzuba abuzuba ndinookutembaula.
Currently Selected:
Intembauzyo 35: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
