Intembauzyo 119
119
Alefu
1Aabo balimunzila iiluzi mbabalelekedwe,
aabo mbabalelekedwe nkaambo batobela mulawo wa Mwami Leza.
2Aabo babamba mbeta zyakwe balilelekedwe,
aabo balilelekedwe nkaambo amoyo woonse balamuyandaula.
3Aabo balo tababisyi, ani babisye buti kabali beenda buyo munzila zyakwe?
4Aaelede kutobelwa malailile aako, aayo malailile ngookapa.
5Aako malailile inga cabota kuti ntobele ngawo,
akutaleya munzila zyangu.
6Akaambo kakuti njeeya milawo yako yoonse, ani inga ndafwa buti nsoni?
7Mbwindaiya zyambeta zyako ziluleme, amoyo wangu uuluzi njookutembaula.
8Amoyo ooyu uyoondiiisya milawo yako, akutandilekelezya naaceya.
Beti
9Ani mukubusi inga wasalazya buti nzila yakwe? Ccita buyo mumajwi aako.
10Ndikusukeme amoyo wangu woonse, utandileki kuti ntyole milawo yako.
11Ndaamba majwi aako mumoyo wangu, kucita kuti intakubisizyi.
12Kotembaulwa O Mwami Leza,
ndiiisye malailile aako.
13Ndakanana amilomo yangu milawo, milawo yoonse iizwa kulinduwe.
14Ndasekelela mukutobela mbeta zyako,
mbubonya mbuli muvubi mbwasekelela lubono lunji.
15Njootelaika malailile, akuyeeyesya zya nzila nzyako.
16Ndakondwa mumalailile aako, nsikoolubizya majwi aako.
Gimeli
17Kondibamba kabotu ndemubelesi wako kuti nkepona,
ndendilyo nekonzya kuswiilila majwi aako.
18Jalula meso aangu, kuti mmbone zintu zigambya zili mumulawo wako.
19Ndimweenzu ansi aano, utiisisi kuzwa kulindime milawo yako.
20Muuya wangu ulilengukide, ulilengukide akaambo kakuyandisisya milawo yako ziindi zyoonse.
21Ulatapatila aabo balisumpula, basinganyizigwe aabo batatobeli milawo yako.
22Kondigwisya masampu akunduubula nkobanduubula, nkaambo mbeta zyako ndazibamba.
23Nikuba kuti bami balabungana akundibejelezya,
mebo ndemubelesi wako ndicinootelaika malailile aako buyo.
24Mbotelwa buyo mumbeta zyako, mbeta zyako nzezindilailila.
Daleti
25Muuya wangu ulilede mbandii mulusuko, ndibukulusye kweendelana amajwi aako.
26Nindakaamba zyanzila zyangu, yebo wakandivuwa.
Kondiiisya milimo yako.
27Ndiiisye zyaamba malailile aako, netikonzye kutelaika zyamilimo yako iigambya.
28Muuya wangu walenguka akaambo kakuusa, ndiyumye kweendelana amajwi aako.
29Kondilesya kutobela nzila zyabubi, kwiindila mumulawo wako kondibeda aaluse.
30Ndakasala kutobela zyabwini, ndabamba milawo yako.
31Nkakatila kumbeta zyako O Mwami Leza, utanduusyi nsoni.
32Njenda munzila yamilawo yako, nkaambo nduwe oocita kuti nkemvwisya zintu.
He
33O Mwami Leza ndiiisye mbweelede kutobela malailile aako,
nenjooabamba mane kusikila kumamanino.
34Ndipa maanu aakuti nkemvwisya, nenjoobamba mulawo wako,
akuuswiilila amoyo woonse.
35Ndisolweda kuti ncilile milawo yako, mulinjiyo mwekondwa.
36Njiiisya moyo wangu kuti kuuyandisya mbeta zyako, kutali kuyandisya lubono pe.
37Ndilesya kuti intagaminini zintu zyabuyo, ndibukulusye kweendelana amajwi aako.
38Zuzukizya cisyomyo cako kumubelesi wako, kuti bantu bakuyoowe.
39Ndigwisye masampu aandiyoosya aaya, nkaambo milawo yako mibotu.
40Bona, mbwesukamina malailile aako, ndiponye akundibukulusya mubululami bwako.
Wawu
41Ndiyande, O Mwami Leza, aluyando lwako lutazungaani, undifutule mbubuli mbookasyomezya.
42Aawo njoobavuwa bandisampaula, njoobavuwa nkaambo nnsyoma majwi aako.
43Utandikasyi kwaamba majwi aako aakasimpe, mukuti nnsyoma milawo yako.
44Njoobamba mulawo wako lyoonse, kusikila kukabe kutamani.
45Njooenda nkendaangunukide, nkaambo mbamba milawo yako.
46Njookanana zyambeta zyako kumbele lya bami, nsikafwi nsoni pe.
47Ndakondwa mumilawo yako alimwi ndiiyanda.
48Ndiibamba akwiiyanda milawo yako, ndaatelaika malailile aako.
Zayini
49Koyeeya majwi ngookaambila mubelesi wako, majwi aayo aandipa camba.
50Cintu cindipa kutangala mumapenzi aangu ncakuti,
cisyomezyo cako cilandipa buumi bupya.
51Bantu batakusyomi balandisampaula kapati,
pele mebo nsisowi mulawo wako.
52Ndiiyeeya milawo, milawo yako yakale-kale O Mwami Leza iinduumbulizya.
53Ndilutide akaambo kabasizinyonyoono, basizinyonyoono bakasiya mulawo wako.
54Malailile aako aba nenyimbo zyangu, nyimbo zyangu kuli koonse nkwindaunka.
55Inga masiku njeeya zina lyako O Mwami Leza, ndinoobamba mulawo wako.
56Ncecita lyoonse, lyoonse nkubamba malailile aako.
Heti
57Mwami Leza ncecaabilo cangu, ndasyomezya kuti ndinooswiilila majwi aako.
58Ndakukumbila amoyo omwe, mbubonya mbuli mbookasyomezya, kondibeda aaluse.
59Nzya nzila zyako nzyeyeeya, ndinootobela mbeta zyako.
60Ndafwambaana kuswiilila milawo yako, nsisyasyali pe.
61Nikuba kuti babi bandaange, bandaange makole nsikooluba mulawo wako.
62Bwaitingana busiku ndabuka kuti ndikulumbe,
ndikulumbe mukukomba nkaambo kamilawo yako iiluleme.
63Boonse bakulemeka mbeenzuma, mbeenzuma boonse aabo babamba malailile aako.
64Nyika izwide luyando lwako, O Mwami Leza, nkoo ndiiisye malailile aako.
Teti
65Umucitila zibotu mubelesi wako, umucitila zibotu kweendelana amajwi aako, O Mwami Leza.
66Ndipe maanu aluzibo lwakubeteka, nkaambo nsyoma milawo yako.
67Nketana njila mumapenzi ndakali sweekede, pele lino nswiilila majwi aako.
68Yebo uli mubotu, nzyocita nzibotu, ndiiisye malailile aako.
69Nikuba kuti basikasampu-sampu banditamikizya zyakubeja,
pele mebo nsicibamba malailile aako amoyo omwe.
70Bantu aaba mbabaabo batamvwisyi, pele mebo nkondwa mumilawo yako.
71Cakabota nkwindakanjila mumapenzi, cakabota nkaambo ndakaiya malailile aako.
72Mulawo ngookapa mmubotu, mmubotu kwiinda zyuulu zyansiliva niiba ngolida.
Yodi
73Maanza aako ngaakandilenga, ngaakandibumba, ndipe busongo kuti nkonzye kwiisya milawo yako.
74Abasekelele aabo bakuyoowa bandibona, nkaambo majwi aako ngesyoma.
75O Mwami Leza, ndizi kuti milawo yako ililuleme,
okandisubula kweendelana akusyomeka kwako.
76Luyando lwako lutazungaani ndolunduumbulizya,
kweendelana ambookasyomezya kumubelesi wako.
77Kondeengelela kuti nkecipona, nkaambo mulawo wako ulandikondelezya.
78Basikasampu-sampu abausigwe nsoni,
nkaambo balandibisyaanya kakunyina akaambo,
pele mebo ndicinootelaika malailile aako.
79Ababoole kulindime aabo bakuyoowa, kutegwa mbaiisye mbeta zyako.
80Moyo wangu uubambe malailile aako,
waabambe cakubula kampenda kutegwa intausigwi nsoni.
Kafu
81Moyo wangu ulisukeme, ulindila lufutuko lwako, cindipa bulangizi majwi aako.
82Meso aangu oomfoka kulangila ncookasyomezya. Nkaako ndabuzya, “Ino uzoondigwasya lili?”
83Nikuba kuti ndi mbuli nkomo yawaini, ndimubusi pele inga nsilubi malailile aako pe.
84Ino ndemubelesi wako ndindile kwaciindi cilamfu cili buti?
Aabo bandipenzya uyoobasubula lili?
85Basikasampu-sampu bandisida malindi, eeci taceendelani amulawo wako.
86Njakasimpe milawo yako yoonse, ndigwasye nkaambo balandipenzya kakutakwe akaambo.
87Bayanda kuti nndobe munyika, pele nsisiyi malailile aako pe.
88Muluyando lwako ndikwabilile, kutegwa ntobele mbeta zyako.
Lamedi
89Taamani majwi aako, O Mwami Leza, alikkalilide lyoonse kujulu.
90Ulasyomeka kwamazyalani oonse,
nyika yakaimikwa anduwe, nkaako ilikkede akutamani.
91Milawo yako ilikkalilide lyoonse, nkaako zintu zyoonse zilakubelekela.
92Nikwatali kuti mulawo wako nguundikondelezya,
nikwalikunga ndakaloba kale mumapenzi aangu.
93Malailile aako nsikooyooaluba pe, mulingawo mondipeda buumi.
94Ndivune nkaambo ndiwako, alimwi mmbamba malailile aako.
95Babi bayubilila kuti bandinyonyoone, pele mebo njeeya buyo mbeta zyako.
96Ndabona kuti zintu zyoonse zibotu zilaamagolelo, milawo yako inyina magolelo pe.
Memu
97Nduuyandisya kapati mulawo wako, buzuba boonse ngwetelaika.
98Milawo yako njiindicenjezya kwiinda basinkondoma, nkaambo ili mumoyo wangu.
99Camaanu ndamvwisya zintu kwiinda bamayi bangu boonse, nkaambo ntelaika mbeta zyako.
100Zintu ndazimvwisya kwiinda bapati, nkaambo malailile aako ndaabamba.
101Nsiendi munzila mbi iili yoonse, nsiendi mulinzizyo mukuti mbambe kabotu majwi aako.
102Nsiileki milawo yako, nkaambo yebo omwini nduwe ookandiiisya.
103Nzibotu zisyomezyo zyako, zilandilweelela kwiinda buci.
104Ndajana luzibo nkaambo kamalailile aako, nzila mbi iili yoonse ndiisulide.
Nunu
105Majwi aako ndelambe lyazituta zyangu, ngaamunikila nzila yangu.
106Ndakakonkezya alimwi akusinizya, kusinizya kuti njootobela milawo yako iiluleme.
107Ndapenga cabonwa, ndipe buumi, O Mwami Leza, undipe buumi kweendelana amajwi aako.
108Kukutembaula nkwekutembaula akutambulike, akutambulike kuli nduwe,
O Mwami Leza, alimwi ndiiisye milawo yako.
109Nikuba kuti buumi bwangu buli muntenda lyoonse, pele mulawo wako nsiulubi.
110Bami banditeya kakole, nikuba boobo malailile aako nsiasowi pe.
111Mbeta zyako nkokukona kwangu akutamani. Nzezitangazya moyo wangu.
112Moyo wangu ngupede kukubamba malailile aako, kwaabamba mane kuyoosikila kumamanino.
Sameki
113Balaamyoyo mibi ndibasulide, pele mebo njanda mulawo wako.
114Mayubilo antobo yangu nduwe, majwi aako ngaandipa bulangizi.
115Nywebo nomucita zibi amunditantamuke, amunditantamuke mbambe milawo ya Leza wangu.
116Ndikwabilile mbubonya mbuli mbookasyomezya, ndiponye kuti intabi aansoni mukulangila kwangu.
117Ndikwabilile undifutule, kutegwa mbambe malailile aako lyoonse.
118Aabo batatobeli malailile aako ulabakaka, ucita kuti bucenjezu bwabo bube bwabuyo.
119Boonse basizibi bali buyo mbuli makwisyilili kuli nduwe, nkaako mebo njandisya mbeta zyako.
120Akaambo kakuyoowa nduwe, ndakankama, ndakankama nkaambo njoowa milawo yako.
Ayini
121Mebo ncita ciluleme, eeco ciluzi, nkaako utandisiili baabo bandidyaminina.
122Syomezya kuti ulandigwasya ndemubelesi wako, basikasampu-sampu utabalekeleli kuti bandidyaminine.
123Ndalema kulangila kuti uzoondifutule,
ndangilila kuyoobona liyoocitika cisyomezyo cako ncookaamba, ciya ncookapanga ciluleme.
124Ndicitile buyandika mebo ndemubelesi wako,
muluyando lwako, ndiiisye kuti nzibe malailile aako.
125Ndipe busongo mebo ndemubelesi wako, busongo bwakuti nzibe milawo yako.
126Cita cintu cimwi, O Mwami Leza, ciindi casika, mbaaba bantu batyola mulawo wako.
127Mebo njandisya milawo yako kwiinda ngolida, iiyi, ndiiyandisya kwiinda ngolida iini-ini.
128Njeeya malailile aako mabotu, nkaako nzila mbi iili yoonse ndiisulide.
Pe
129Zilagambya mbeta zyako, nkaako mebo ndazibamba.
130Kupandulula majwi aako nkokupa maanu, kulapa maanu kwaapandulula kuti bantu buyo baamvwisye.
131Ndafwekemba, ndaasama, nkaambo nsukeme kucita milawo yako.
132Nkoo ndicebe undeengelele, undeengelele mbubonya mbuli mbookacita kulibaabo bakuyanda.
133Kondeenzya kweendelana amajwi aako, cibi citabi ncecindeendelezya.
134Kuzwa kuli baabo badyaminina, ndinunune, nkaambo neti bambe malailile aako.
135Nkoo ndileleke ambebo ndemubelesi wako, undileleke akundiiisya malailile aako.
136Bona mbwelila, misozi njeeyi ileenda, ndalila nkaambo bantu tababambi mulawo wako.
Sade
137O Mwami Leza, nduwe ooluleme, akwalo kubeteka kwako kuliluzi.
138Mbeta eezyo nzyookapanga zililuleme, zililuleme alimwi zilisinizizye.
139Busungu bwangu bwandimana mubili, bwandimana mubili nkaambo basinkondoma bavoolozya majwi aako.
140Nzyosyomezya nzyakasimpe, nkaako mebo ndemubelesi wako ndaziyanda.
141Nikuba kuti ndimusyoonto, balandinyansya,
pele mebo nsilubi malailile aako.
142Bululami bwako tabumani, awalo mulawo wako ngwakasimpe.
143Kwandisikila mapenzi amause, pele nikuba boobo milawo yako icindikondelezya.
144Mbeta zyako zinooluzi kukabe kutamani, ndipe busongo bwakumvwisya kuti nkecipona.
Kofu
145Kondivuwa, O Mwami Leza, nkaambo ndakwiita amoyo wangu woonse, nenkonzya kuyoobamba malailile aako.
146Ndoongolola kulinduwe undivune, netikonzye kubamba mbeta zyako.
147Busiku bwaitingana ndabuka kuti nkumbile lugwasyo, cindipa bulangizi majwi aako.
148Busiku boonse inga mbaacilabila, mbaacilabila nkaambo inga ntelaika majwi aako.
149Akaambo kaluyando lwako lutazungaani, O Mwami swiilila jwi lyangu,
ubukulusye buumi bwangu kweendelana amilawo yako.
150Aabo bakanza kundicita zintu zibi balaafwiifwi,
balaafwiifwi buyo kulindime, pele kumulawo wako bali kulaale.
151Pele yebo, O Mwami Leza, inga ulaafwiifwi, ayalo milawo yako yoonse njakasimpe.
152Kaindi-kaindi, mbeta zyako nzizyakandipa luzibo,
nduwe ookazibikka kuti zikkalilile akutamani.
Lesyi
153Ngaaya mapenzi aangu abone, ndivune, kayi nsiindaluba mulawo wako.
154Kaambo kangu kakwabilile undivune, undipe buumi mbubonya mbuli mbookasyomezya.
155Basizibi tabakonzyi kufutulwa. Inga bafutulwa buti kabatabambi malailile aako.
156Uleengelela kapati, O Mwami Leza, undipe buumi kweendelana amulawo wako.
157Mbanji bandilwana, bandipenzya, pele mbeta zyako inga nsizisiyi pe.
158Bati inga, batasyomi ndabalanga balandisesemya, batandisesemyi buti kayi tababambi majwi aako.
159Aalo malailile aako ndaayanda, muluyando lwako lutazungaani, O Mwami Leza, kondikwabilila.
160Majwi aako oonse ngakasimpe, milawo yako yoonse ililuleme tiimani pe.
Sini a Syini
161Baleli balandipenzya nketakwe akaambo, moyo wangu uyoowa buyo majwi aako.
162Cisyomezyo ncopa cilandikonda, cilandikonda mbuli muntu wajana lubono lunji.
163Zyakubeja zilandisesemya alimwi ndizisulide, nceyanda buyo mulawo wako.
164Nziindi zili ciloba nzyekutembaula buzuba abuzuba, nkutembaula boobo nkaambo kamilawo yako iiluleme.
165Kuli luumuno lupati kulibaabo bayandisya mulawo wako, tabakonzyi kufumpulwa acintu niciba buti.
166Ndasyoma kuti ulandifutula, O Mwami Leza, nkaambo ntobela milawo yako.
167Mbeta zyako ndazibamba, nkaambo ndaziyandisya kapati.
168Ndaabamba malailile ambeta zyako, nkaambo nduwe oozi nzila zyangu zyoonse.
Tawu
169Kulila kwangu akusike kuli nduwe, O Mwami Leza, ndipe busongo bwakumvwisya zintu,
bwakuti nkemvwisya zintu kweendelana amajwi aako.
170Nkumbila kuti kulilauka kwangu noolikunga okumvwa, ndivune kweendelana ambookasyomezya.
171Milomo yangu iikutembaule, alimwi ndiiisye malailile aako.
172Nyimba buyo nyimbo zyaamba zyamilawo yako, kayi milawo yako yoonse ililuleme.
173Janza lyako lilibambilide kuti lindigwasye, lilandigwasya nkaambo ndasala malailile aako.
174Nsukeme buyo kulindila ciindi ncoyoondifutula, O Mwami Leza, mumulawo wako mwekondwa.
175Ino noocita kuti nkecipona nkaambo njanda kukutembaula, milawo yako iindigwasye.
176Ndaba mbuli mbelele iisweekede, ndaleya, ndiyandaule mebo ndemubelesi wako, nkaambo milawo yako nsiilubide pe.
Currently Selected:
Intembauzyo 119: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
