Intembauzyo 118
118
1Amumulumbe Mwami Leza nkaambo mmubotu,
luyando lwakwe lutazungaani ndwalyoonse alyoonse.
2Baisilayeli abaambe kuti,
“Luyando lwakwe lutazungaani ndwalyoonse alyoonse.”
3Baluzubo lwa Aloni abaambe kuti,
“Luyando lwakwe lutazungaani ndwalyoonse alyoonse.”
4Nyoonse nomuyoowa Leza amwaambe kuti,
“Luyando lwakwe lutazungaani ndwalyoonse alyoonse.”
5Nindakapenga ndakaita Mwami Leza, wakandivuwa, wakandaangununa.
6Kunyina nceyoowa nkaambo Mwami Leza ulaandime,
ani muntu inga wandicita nzi?
7Mwami Leza nguundigwasya nkaambo ulaandime,
ndaakubazunda basinkondoma njoolisumpula.
8Ncibotu kuyubila mu Mwami Leza, kwiinda kusyoma muntu buyo.
9Ncibotu kuyubila mu Mwami Leza, kwiinda kusyoma bami.
10Bakalindizingulukide bamasi boonse,
pele muzina lya Mwami Leza ndakabanyonyoona.
11Bakalindizingulukide kuzwa kumabazu oonse, bakalindizingulukide
ncobeni, pele muzina lya Leza ndakabanyonyoona.
12Bakalindibumbilide mbuli nzuki,
pele cakufwambaana bakazimaana mbuli mulilo wamamvwa.
Muzina lya Mwami Leza ndakabanyonyoona.
13Bakanditonkela munsi ndakati we, pele Mwami Leza wakandigwasya.
14Mwami Leza uundipa nguzu, ngonguwe ngweimbila nkaambo nguundifutula.
15Nkoo swiilila mbobapozomoka cakutangala mumaanda, balapozomoka nkaambo kakuzunda balati,
“Janza lyalulyo lya Mwami Leza lyazunda canguzu.
16Janza lyalulyo lya Mwami Leza lyazwidilila, janza lyalulyo lya Mwami Leza lyazunda canguzu.”
17Ndicinoopona, nsikoofwa pe,
ndicinoopona kusikila nkaambilizye zeezyo Mwami Leza nzyaakatucitila.
18Mwami Leza wakandisubula kapati,
pele taakwe naakandilekela kuti mmfwe.
19Nkoo amundijalwide milyango yaŋanda ya Leza,
mwiijalule kuti njile mubusena busalala. Njile kuti ndumbe Mwami Leza.
20Ngooyu mulyango wa Mwami Leza, mpaawa aakonzya kunjilila baluleme.
21Ndakulumba nkaambo nduwe ookandivuna, nkaambo nduwe ookandifutula.
22Ibbwe lyakakakide bayaki, lyakaba ndebbwe liyandisi lyaacooko.
23Eezi zyakacitwa aa Mwami Leza, ncenciceeco ncozigambya kapati.
24Mboobu buzuba mbwaakalenga Mwami Leza, mulimbubo atusekelele akukondwa.
25Kotufutula O Mwami Leza, O Mwami Leza kotupa coolwe, tuzundile.
26Ulilelekedwe ooyo uuboola muzina lya Mwami Leza,
tulamuleleka kuzwa muŋanda ya Mwami Leza.
27Mwami Leza ngo Leza uutumunikila, cakusekelela,
kamujisi atusanzu amuzinguluke cipaililo.
28Nduwe Leza wangu, ndiyookutembaula,
nduwe Leza wangu, ndiyookulumbaizya.
29Amumulumbe Mwami Leza nkaambo mmubotu,
luyando lwakwe lutazungaani ndwalyoonse alyoonse.
Currently Selected:
Intembauzyo 118: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
