Intembauzyo 109
109
Kumweendelezi wa nyimbo. Lwiimbo lwa Devedi.
1Nduwe Leza ngwetembaula, utaumuni buyo.
2Mbaaba bantu babi basilweeno bandilwana,
baamba buyo zyakundibejelezya.
3Bandaamba zintu zibyaabi, balandilwana eentakwe akaambo.
4Nikuba kuti ndabayanda, balo balandibejelezya,
nibacita boobo mebo ndabakombela boonse.
5Mubusena bwabubotu bandipilusizya bubi,
mubusena bwakundiyanda balandisulaika.
6Ino noobikka muntu mubi kuti abeteke basinkondoma,
ee, kuti sinkondonyina waba nguumupa mulandu.
7Abetekwa ajaninwe mulandu, kuti baambe kuti,
walubila mukukomba kwakwe mwini.
8Mazuba aakwe atwentane, muntu uumbi atole busololi bwakwe.
9Bana bakwe babe bamucaala, mukaintu wakwe abe mukamufu.
10Bana bakwe kabaide kwiingaila akulombelela,
bagwisigwe mumunzi wabo uusalala.
11Ooyo ngwaakakweletela amunyange zyoonse nzyajisi,
bazinyonyoone nzyaakabelekela bazwamasi.
12Kutabi muntu naba omwe uumufwida luzyalo,
nikuba kubabedaa luzyalo bana bakwe bamucaala.
13Lunyungu lwakwe lumaninine, kutakabi auzwela muzyalani liboola.
14Akaka, Mwami Leza, atalubi zibi zyabasikale bakwe,
acalo cinyonyoono cabanyina citazimaanyizigwi.
15Mwami Leza kaziyeeya zinyonyoono zyabo lyoonse,
kuti balo batakayeeyegwi limbi munyika.
16Nkaambo taakwe naakafwida muntu naba omwe luzyalo,
wakapenzya bacete, babulide abatyompedwe mane kusikila limwi bafwa.
17Wakali kuyandisya kusinganya, kusinganya kwakwe akumupilukila,
taakali kuyanda kuleleka awalo atalelekwi.
18Cakaba ciyanza cakwe kusinganya, cakali buyo mbuli mbwasama cisani,
lusinganyo lumuwide mbuli mvula, lube mbuli mafuta aanjila amuzifuwa zyakwe moonse.
19Lusinganyo oolu lumuzambe mbuli mulembo,
lube mbuli lutambo lwaangidwe kwalyoonse alyoonse.
20Eeyi iibe nempindu iizwa ku Mwami kuli baabo bandibejelezya,
iizwa ku Mwami kuli baabo bandaamba bubi.
21Pele yebo, O Mwami Leza wangu,
ndicitila bweelede nkaambo kazina lyako, ndifutule,
akaambo kabubotu bwaluyando lwako lutazungaani.
22Ndimucete, ndibulide, nkaako moyo wangu ulicisidwe kapati.
23Njabuzimaana mbuli cimvule cakumazuba, ndatapaulwa mbuli cikwikwi.
24Nkweliimya kulya mumazwi mwatontola, ndakankama,
mubili wangu wakotela wanyana.
25Ndaba cisampuzyo kuli baabo banditamikizya,
aabo bandibona bapukusa mitwe.
26O Mwami Leza wangu, kondigwasya,
ndifutule kwiindila muluyando lwako.
27Bazibe kuti nduwe omwini ookacicita eeci,
kuti nduwe ookacicita eeci, O Mwami Leza.
28Basinganye pele mebo undileleke, bandibukila bausigwe nsoni,
pele mebo ndemubelesi wako, nnsekelele.
29Bandipa mulandu bause, nsoni zibajate mbuli ngubo.
30Njoolumbaizya Leza, njoomutembaula akati kababuleya.
31Kujanza lyalulyo lyaubulide nkoimvwi,
kuti umuvune kuli baabo bamubetekela kuti ajaigwe.
Currently Selected:
Intembauzyo 109: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
