Tusimpi 8
8
Busongo bulaita
1Tee kayi busongo bulaita?
Tee kayi maanu aakumvwisya zintu aloompolola?
2Bulaima atala aatulundu kumbali aanzila nkoziswaanganina,
3kumbali aamilyango yamunzi,
kumanjililo buloompolola bulati,
4“Ndiita ndinywe nobantu,
ndoompolweda muntu uuli woonse.
5Nywebo nobafuba-fuba amujane maanu nywebo nobafuba-fuba amumvwisye zintu.”
6Amuswiilile nkaambo ndiyanda kumwaambila zintu zibotu kapati,
ndiyanda kumwaambila zintu ziluleme.
7Mebo ndaamba buyo zintu zyakasimpe,
nsyaambi zintu zindisesemya.
8Majwi aangu oonse aliluleme,
taapilingene taali mabi pe.
9Kuli yooyo uumvwisya zintu zyoonse uliluleme,
uunyina kampenda kuli baabo bali aluzibo.
10Tambula majwi aangu mucilawo cansiliva,
aluzibo mucilawo cangolida,
11nkaambo busongo mbubotu kwiinda tubwe tweebesi,
taakwe nociba comwe cazintu nzyoyanda ciyoobwiinda.
12Mebo ndebusongo ndikkala antoomwe abamaanu,
ndijisi luzibo abupampu.
13Kulemeka Mwami Leza nkusulaika bubi,
ndasulaika kulisumpula akantu-kantu,
kutalilemeka amajwi aapilinganya.
14Ndijisi lulayo akwiisya kubotu,
ndakonzya kumvwisya zintu akuba anguzu.
15Bamami balalela kwiindila mulindime,
baleli balapanga milawo iiluleme.
16Beendelezi baleendelezya,
abami boonse balalela munyika kwiindila mulindime.
17Ndayanda aabo bandiyanda,
aabo bandilangaula balandijana.
18Buvubi abulemu zili kulindime,
ndijisi mbono zikkalilila ndizwidilide.
19Micelo yangu mibotu kwiinda ngolida iini-ini,
cizwa mulindime cilainda nsiliva mbotu kapati.
20Ndeenda munzila yabululami,
iiluzi iitonkomene.
21Kandiyabuvubya baabo bandiyanda,
akucita kuti ziyobwedo zyabo zizule.
22“Mwami Leza nguwakandilenga mebo kumatalikilo aamilimo yakwe,
ndime wakusaanguna kumilimo yakwe yakale-kale.”
23Ndakalengwa kale-kale eelyo,
kuzwa kumatalikilo, nyika kiitanabawo.
24Ndakazyalwa lwaanje kalutanabawo,
kakutanaba tusensa twamaanzi.
25Ndakazyalwa zilundu atulundu kazitanaba waawo mpozibede sunu,
26katana lenga nyika, myuunda,
nibuba bulongo buli boonse anyika.
27Ndakaliwo aawo naakabikka julu mubusena bwalyo,
naakalenga munyinza atala lyalwizi,
28naakabikka makumbi atala,
akubikka tusensa twalwizi kabotu-kabotu,
29naakabikkila lwizi munyinza walo,
kuti maanzi ataindilili atasotoki mulawo wakwe,
anaakabikka ntalisyo zyanyika.
30Mebo ndakali mufuzi wakakkede munsi lyakwe,
ndakali kukondwa buzuba abuzuba,
kandisekelela lyoonse kumbele lyakwe,
31ndakali kukondwa munyika yoonse njaakalenga
akubotelwa mubantu bakwe boonse.
32“Nkaako lino nobana bangu,
amundiswiilile,
balilelekedwe aabo babamba nzila zyangu.
33Amuswiilile kulaya kwangu,
musongwaale, mutakuvoolozyi pe.
34Ulilelekedwe muntu uundiswiilila,
uulanga-langa buzuba a buzuba amilyango yangu,
ulindilila azikunguzyo.
35Kufumbwa uundijana ujana buumi,
nkabela Mwami Leza ulamufwida luzyalo.
36Pele kufumbwa uutandijani ulalicisa lwakwe mwini,
boonse bandisulaika bayanda lufu.”
Currently Selected:
Tusimpi 8: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
