Tusimpi 5

Umucenjelele muvuule

1Mwanaangu, teya matwi aako kubusongo bwangu, koswiilila kulaya kwamajwi aangu, 2kuti umvwisye zintu kuti milomo yako kiiamba zyaluzibo. 3Milomo yamukaintu muvuule ili mbuli tuci, alimwi kukanana kwakwe kulabombeka kwiinda mafuta. 4Pele kumamanino ulalula mbuli mululwe, ulabosya mbuli panga likwengedwe koonse-koonse. 5Maulu aakwe atola kulufu, ntaamo zyakwe zitola kucuumbwe. 6Taakwe ambwalimvwa anzila yabuumi, kweenda kwakwe nkwakubbabbalika, pele walo tazi.

7Lino nobana bangu, amundiswiilile, mutaleyi kulizeezi nzendimwaambila. 8Amumutantamuke mukaintu uuli boobu, mutasweni aafwiifwi aŋanda yakwe, 9inga mwaba nomuubuka, inga mwaba nomufwida mumaanza aabasilunya. 10Kwamana bazwamasi mbabayoolya mbono zyanu, milimo yanu iyoovubya bamwi. 11Kumamanino aabuumi bwanu muyootongela, mwaakutyoka misana, nguzu zyamumanina. 12Muyooti, “Maawe! ndakakaka kwaambilwa, moyo wangu wakasampaula lulayo.” 13Tiindakaswiilila bamayi bangu, nikuba kuswiilila basikundilaya. 14Ono ndiyanda kunyonyooka, akati kambungano yoonse.

15Nywa maanzi aazwa mucitelekezyo cako, maanzi aakunka kuzwa mumukalo wako. 16Sena ncibotu kuti maanzi aako amwaike mumigwagwa, abe tulonga mumabbuwa? 17Aabe aako olikke, atabi aabasinyenda. 18Kasensa kako kalelekwe, kotangala amukaintu wabukubusi bwako. 19Abe mbuli mbaambi iiyandika yeebeka, luyando lwakwe lukutolele moyo, weelede kulamwa anguwe lyoonse. 20Mwanaangu, sena ncibotu kuti muvuule akutolele moyo? Ino nkaambo nzi ncoelede kukumbatana amukamuntu? 21Mwami Leza ulabona nzila zyamuntu, ulalanga-langa munzila zyakwe zyoonse. 22Milandu yasizibi ilamuca, ulajatwa atukole twazibi zyakwe mwini. 23Ulafwa akaambo kakukaka kulaigwa ulasweeka akaambo kabufuba-fuba bwakwe butaambiki.

Currently Selected:

Tusimpi 5: Tonga96

Highlight

Copy