Tusimpi 4

Busongo ncintu cipati

1Nobana bangu, amuswiilile kulaya kwauso, muteye matwi kuti kamumvwisya zintu. 2Mebo ndamupa malailile mabotu, nkaako mutasiyi kwiisya kwangu. 3Nkecili mwana muŋanda mwataata, nkecili musyoonto kandicili endikke buyo, 4taata wakandiiisya wakati, “Moyo wako ubambe majwi oonse ngendikwaambila, ubambe malailile aangu kuti upone. 5Koba musongo, koba simaanu, utalubi majwi aangu nikuba kwaasiya. 6Utasowi busongo, buyookukwabilila, ubuyandisye, buyookubamba. 7Busongo ncintu cipati, nkaako bujane, bujane nkaambo buyookupa kumvwisya zintu. 8Ubulemeke, buyookusumpula, ubukakatile buyookuletela bulemu. 9Buyookubikka musini mubotu amutwe wako. Buyookupa musini wabulemu.”

10Mwanaangu, swiilila utambule ncendikwaambila, ndendilyo noyooongola. 11Ndakutondezya nzila yabusongo, akukweenzya munzila ziluzi. 12Waakweenda tokooyoolebwa pe, waakuzuza tokooyoolifumpula. 13Kokakatila kumalailile, utaaleki waabambe kabotu, nkaambo mbobuumi bwako. 14Utalyati munzila zyabasizibi, nikuba kweenda munzila zyabantu babi. 15Kozileya, uteendi mulinzizyo, zileke ugame nkoya buyo. 16Balo tabooni ccita basaanguna kucita cibi, balaba azilabila mane kusikila bawisye umwi. 17Balalya cinkwa ncobajana mububi, balanywa waini ngobanyanga bantu.

18Pele nzila yabaluleme ili mbuli mumuni wakubucedo, uungwengwemuka mane kusikila zuba libale. 19Nzila yabasizibi ili mbuli mudima mulemu, tabazi cibafumpula pe.

20Mwanaangu, koswiilila ncendikwaambila, komvwisisisya majwi aangu. 21Atazwi mulinduwe, majwi aaya mulinduwe, abambe mumoyo wako. 22Nkaambo mbuumi kumuntu waajana, alaponya mubili wamuntu woonse. 23Kwiinda zyoonse eezi, bamba moyo wako nkaambo nkekasensa kabuumi. 24Utaambi majwi aataluleme naaba asyoonto, utakanani majwi mabi. 25Meso aako kaalangide buyo kumbele, utanoocebauki. 26Kotelaika kweenda kwamaulu aako koenda munzila zili kabotu. 27Utanooleyauki, lesya maulu aako kububi.

Currently Selected:

Tusimpi 4: Tonga96

Highlight

Copy