Tusimpi 17
17
1Ncibotu kulya mukusu muyumu aluumuno
kwiinda kuya kuŋanda iizwide mapobwe kwamana kakuli nkondo.
2Mubelesi musongo ulalela mwana mufuba-fuba,
awalo uyootambula lukono mbuli umwi wabana bokwabo.
3Cuumpilo ncansiliva,
ceengelo ncangolida,
pele Mwami Leza nguusunka moyo.
4Muntu sizibi ulaswiilila zyaamba milimo mibi,
mubeji ulaswiilila mulaka waamba zyaluciso.
5Ooyo uutwangila bacete ulasampaula Mulengi wabo,
kufumbwa ooyo uubotelwa mapenzi naabasikila takalekwi buyo uyoosubulwa.
6Bazyukulu ngomusini wabacembeede,
bulemu bwabana mbazyali babo.
7Kukanana kubotu takweeleli mufuba-fuba ma,
cilainda kubija kuti muleli kabeja!
8Sinkamulomo lili mbuli musamu mubotu kuli yooyo uulicita,
kufumbwa nkwagama, ulazwidilila.
9Ooyo uulekelela mulandu ulayandaula luyando,
pele ooyo uubikkilila makani ulamwaya bulongwe.
10Muntu uumvwisya zintu alaililwa ulaswiilila,
kwiinda kuuma mufuba-fuba ziindi zili mwaanda.
11Cili kumoyo wamuntu mubi mbuzangi bwalo,
umwi walupati-pati mukali uyootumwa kuti akamulwane.
12Ncibotu kuswaangana amunyama wabutambo wajatilwa bana,
kwiinda kuswaangana amufuba-fuba kazilaika.
13kuti naa muntu wapilusya bubi mubusena bwabubotu,
bubi tabukazwi mumukwasyi wakwe.
14Kuvumbuka kwankondo kuli mbuli kuupaula kwacitangaziba,
koumuna nkondo noitanabuka.
15Kuleka muntu uuli aamulandu,
akupa mulandu kumuntu uunyina kaambo zyoonse zilasesemya ku Mwami Leza.
16Nikuba kuti mufuba-fuba kajisi mali akuula busongo,
cigwasya nzi kumuntu uutakwe maanu?
17Mulongwe ulayanda mweenzinyina ciindi coonse,
pele munyina uzyalilwa kugwasya muziindi zyamapenzi.
18Muntu uutakwe maanu ulaba cijatilizyo,
akuzumina kucitila mweenzinyina oobo.
19Ooyo uuyandisya kuzwangana ulayanda cinyonyoono,
ooyo uulampya lukwakwa lwakwe,
uyanda kunyonyooka.
20Muntu uli aamoyo uupilingene tazwidilili,
ooyo uuli aamulaka uucenga ulalinjizya mumapenzi.
21Mwana mufuba-fuba ujazya wisi nsoni,
muntu uuzyala ciyanga tabotelwi.
22Moyo walumwemwe musamu mubotu uuponya,
pele kuusa kwamoyo kutontozya mumafuwa.
23Muntu sizibi ulatambula sinkamulomo mukusisikizya kuti apilinganye lubeta.
24Muntu uumvwisya zintu ulabikka moyo wakwe kubusongo,
pele meso aamufuba-fuba ali kumagolelo aanyika.
25Mwana mufuba-fuba ujazya wisi nsoni,
aabo bakamuzyala balabijilwa kapati.
26Tacili cibotu kubbadelesya muntu uunyina mulandu,
akwalo kuuma bantu balemenede taciluzi.
27Muntu musongo ulabelesya majwi aamaanu,
muntu uubatamika moyo mmusongo.
28Naba muntu mufuba-fuba ulayeeyegwa kuti mmusongo kuti naa kali muumuzi,
ulaambwa kuti ulamvwisya zintu kuti naa kalijata.
Currently Selected:
Tusimpi 17: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
