Tusimpi 15
15
1Kwiingula kubotu kulalesya bukali,
pele kukalauka nkokunyemya.
2Mulaka wamusongo ulaamba zyaluzibo,
pele milomo yamufuba-fuba ilaambaula zyabuyanga.
3Meso aa Mwami Leza ali koonse-koonse,
alalanga boonse basizibi ababotu.
4Mulaka uusitikide uli mbuli musamu wabuumi,
pele mulaka waamba zyakubeja ulapenzya moyo.
5Mufuba-fuba ulasampaula kulaya kwawisi,
pele ooyo uuswiilila kukalalilwa utondezya kuti ulaamaanu.
6Muŋanda yamuntu uululeme muli lubono lunji,
pele mpindu yabasizibi ibaletela buyo mapenzi.
7Milomo yabasongo itola luzibo koonse-koonse,
pele myoyo yabafuba-fuba tiili boobo pe.
8Mwami Leza ulasesemwa cipaizyo cabasizibi,
pele kukomba kwamuntu uululeme kulamubotezya.
9Mwami Leza ulasesemwa nzila zyabasizibi,
pele ulabayanda aabo batobela ziluleme.
10Ooyo uuleya munzila ulindila cisubulo cipati,
ooyo uusulaika kulaigwa ulafwa.
11Lufu alunyonyooko zyoonse zili bukwazi kumbele lya Mwami Leza,
ino mbubuti myoyo yabantu!
12Sikasampu-sampu ulakaka kukalalilwa,
tazumini kulaya kwamusongo.
13Moyo uukondedwe ulatondezya busyu bwalumwemwe,
pele kuusa kwamoyo kuletela buumba.
14Moyo wamuntu uumvwisya zintu ulayandaula luzibo,
pele mulomo wamufuba-fuba ugamine zyabufuba-fuba zyalo.
15Mazuba oonse aamuntu uupenzegwa mmabi,
pele moyo walumwemwe ulakondwa lyoonse.
16Ncibotu kuba akantu nokaceya kolemeka Mwami Leza
kwiinda kuba alubono lunji kojisi mapenzi.
17Ncibotu kulya cisyu mani kuti uukupa kajisi luyando
kwiinda kulya nyama yaŋombe yamafuta uukupa kakuzondede.
18Muntu mukali ulabusya nkondo,
pele muntu uusitikide ulaumuzya kukazyanya.
19Nzila yamutolo ilizwide mamvwa,
pele nzila yamuntu uululeme ili mbuli mugwagwa mubotu.
20Mwana musongo ucita kuti wisi kabotelwa,
pele muntu mufuba-fuba ulasampaula banyina.
21Bufuba-fuba bulabotezya muntu uutakwe maanu,
pele muntu uumvwisya zintu uleenda munzila iiluzi.
22Mizeezo tiizwidilili kwanoonyina kulaililwa kubotu,
pele kuti kwavula balailila bakufula maanu.
23Kwiingula kubotu kucita kuti muntu abotelwe,
majwi aaambwa ciindi ceelede manono!
24Inzila yabuumi ilabasumpula basongo,
kuti batakayi kucikkalilo cabafu.
25Mwami Leza ulaola ŋanda yamuntu uulisumpula,
pele ulakwabilila munyinza wamukamufu.
26Mwami Leza ulasesemwa miyeeyo yabasizibi,
pele miyeeyo yabasalala mumyoyo ilamubotezya.
27Ooyo uuyandisya mpindu mubusyaacivulemwangu ulapenzya mukwasyi wakwe,
pele ooyo uusula masinkamulomo ulapona kabotu.
28Moyo wamuntu uululeme ulayeeya bweelede kwiingula,
pele mulomo wasizibi ulayapula zibi.
29Mwami Leza uli kulaale abasizibi,
pele ulamvwa kukomba kwamuntu uululeme.
30Kuseka-seka kubotelezya moyo,
makani mabotu akkazika camba.
31Ooyo uuswiilila kukalalilwa ulapona,
uyookkala antoomwe abasongo.
32Ooyo uukaka kulaigwa ulalisampaula mwini,
pele ooyo uuswiilila kuti alulamikwe unoomvwisya zintu.
33Kulemeka Mwami Leza nkokwiisya muntu kuba musongo,
kulibombya nkokuletela bulemu.
Currently Selected:
Tusimpi 15: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
