Tusimpi 14
14
1Mukaintu musongo ulabamba mukwasyi wakwe,
pele mufuba-fuba ulamwaya anzyacita mwini.
2Ooyo weenda cakululama ulalemeka Mwami Leza,
pele ooyo weenda cakupilingana ulasampaula.
3Kwaamba kwamufuba-fuba kulamuumya musako kusule,
pele milomo yabasongo ilakwabilila.
4Kutakwe basune kunyina maila,
pele zilyo zinji zilaligwa kwiindila munguzu zyabasune banguzu.
5Kamboni waamba zyabwini tacengi,
pele kamboni uubeja ngunaluumpa.
6Muntu sikasampu-sampu ulalisongwaazya kakuli busongo tabujisi,
pele luzibo lulalileta kumuntu uumvwisya zintu.
7Tantamuka muntu mufuba-fuba,
nkaambo tokonzyi kujana majwi aaluzibo.
8Maanu aamuntu musongo nkuziba mbweelede kweenda,
pele bufuba-fuba bwabaungule nducengo.
9Leza ulasampaula basizibi,
pele baluleme ulabafwida luzyalo.
10Moyo uuli woonse ulizi macise aawo,
taakwe muntu uumbi uukonzya kusekelela anguwo.
11Ŋanda yamuntu sizibi iyoonyonyoonwa,
pele ŋanda yamuntu uululeme iyooima nji.
12Kuli nzila ilangika kuti ililuzi kumuntu,
pele kumamanino itola kulufu.
13Nikuba mukuseka moyo ulausa,
eelyo kumamanino ula penzegwa.
14Muntu uutaluleme uyoobweedezelwa micelo yanzila zyakwe zibi,
pele muntu uululeme uyookkuta micelo yamilimo yakwe mibotu.
15Muntu mufuba-fuba ulazumina zintu zili zyoonse,
pele muntu uucenjede ulayeeya mbwaenda.
16Muntu musongo ulalemeka Mwami Leza akuleka cibi,
pele mufuba-fuba ulalisumpula unyina makani.
17Muntu uufwambaana kunyema ulacita zintu zyabufuba-fuba,
awalo muntu mumpelenge ulasulaikwa.
18Muungule ulatambula bufuba-fuba,
pele bacenjede balasamikwa luzibo mbuli musini.
19Bantu bacita zibi balakotamina bantu babotu,
basizibi balacita oobo kumilyango yabaluleme.
20Mucete tayandwi nikuba kuli yooyo ngobabambene limwi,
pele muvubi ulijisi beenzinyina banji.
21Ooyo uusampaula ngobabambene limwi ulabisya,
pele ulilelekedwe ooyo uufwida luzyalo babulide.
22Sena aaba bakanza zintu zibi tabasweekede?
Pele aabo bayeeya zibotu balajana luyando akusyomeka.
23Milimo yoonse miyumu ipa mpindu,
pele kwiide kukanana buyo kuletela bucete.
24Musini wabasongo mbusongo bwabo,
pele bufuba-fuba ngomusini waziyanga.
25Kamboni waamba zyabwini ulavuna buumi,
pele kamboni waamba zyakubeja ngusikwaaba.
26Ooyo uulemeka Mwami Leza ulijisi mayubilo,
bana bakwe bayootijila nkuko.
27Kulemeka Mwami Leza nkakasensa kabuumi,
nkakanyona muntu kuzwa kutukole twalufu.
28Mubantu banji mwami mwajana bulemu,
pele kuti kakunyina bantu mbalela,
bwami bwakwe bulanyonyooka.
29Muntu uutafwambaani kunyema musongo kapati,
pele muntu uufwambaana kunyema ulalitondezya bufuba-fuba bwakwe.
30Moyo uusitikide uleta buumi kumubili,
pele bbivwe lilabozya mafuwa.
31Ooyo uudyaminina bacete ulasampaula Mulengi wabo,
pele kufumbwa ooyo uufwida luzyalo babulide ulemeka Leza.
32Sizibi ulanyonyoonwa akaambo kazibi zyakwe,
pele balulami balijene cilivunino nimuba mulufu lwabo.
33Busongo buli mumoyo wamuntu uumvwisya zintu,
pele tabuzizilwe akati kabafuba-fuba.
34Bululami busumpula cisi coonse,
pele cinyonyoono ncecisampuzya kubantu bamusyobo uuli woonse.
35Mubelesi uucita zintu zyoonse cabusongo ulabotezya kumwami,
pele mwami ulanyemena uuli woonse uucita zintu zifwisya nsoni.
Currently Selected:
Tusimpi 14: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
