Myeelwe 28
28
Zipaizyo zyamazuba oonse
(Kulonga 29.38-46)
1Lino Mwami Leza wakaambila Mozesi kuti 2alailile Baisilayeli kuti, “Muziindi zyeelede amundipe zipaizyo zyazyakulya, zitentwe kuti zibe bweema bubotelezya kulindime.
3“Eezi nzezipaizyo zyakutenta zyeelede kupegwa buzuba abuzuba, tugutu tobilo twamwaka omwe tutakwe kampenda. 4Mupaizye kagutu kakusaanguna ciindi cacifumo-fumo nkabela kabili kulubundu-bundu, 5antoomwe acituuzyo camaila ansangwa yabusu bunante bukandidwe amafuta aaoliva aazula nsazi. 6Eeci ncecipaizyo calyoonse cakatalikila kucilundu ca Sinai kuti cibe cacipaizyo citentwa cabweema bubotelezya ku Mwami Leza. 7Ape antoomwe acituuzyo cacakunywa cawaini iizula kapali. Amucitile mubusena busalalisya kumbele lya Mwami Leza. 8Kagutu kamwi mukapaizye kulubundu-bundu mbubonya mbumwapaizizye cifumo-fumo, cibe cipaizyo citentwa cabweema bubotelezya ku Mwami Leza.”
Cipaizyo ca Buzuba bwa Sabata
9Lino mubuzuba bwa Sabata amupaizye tugutu tobilo twamwaka omwe tutakwe kampenda, antoomwe azituuzyo zyacakunywa acakulya camaila abusu bunante buzula katumba bukandidwe amafuta. 10Eeci ncecipaizyo cakutenta sabata asabata atala aazipaizyo zyabuzuba abuzuba.
Cipaizyo cabuzuba butaanzi bwamwezi
11Muleelede kupa zipaizyo zyakutenta ku Mwami Leza buzuba bwakkala mwezi umwi aumwi. Mutole tupoho tobilo, mugutu omwe, atugutu tuli ciloba twamwaka omwe, zyoonse kazitakwe kampenda. 12Akapoho komwe-komwe ape cituuzyo camaila abusu bunante buzula ntumba bukandidwe amafuta. Amugutu ape cituuzyo camaila abusu bunante buzula katumba bukandidwe amafuta. 13Akagutu komwe-komwe ape cituuzyo camaila abusu buzula nsangwa. Eezi zyoonse zibe cipaizyo cakutenta cabweema bubotelezya ku Mwami Leza. 14Akapoho komwe-komwe ape cituuzyo cawaini uuzula nongo. Amugutu omwe-omwe ape cituuzyo cawaini uuizula kapali. Eeci ncecipaizyo cakutenta camwezi amwezi mumwaka oonse. 15Atala aazipaizyo eezi apaizye ku Mwami Leza asijembwe omwe kuti abe cipaizyo cacinyonyoono.
Zyapobwe Lyakwiindilila
(Bapaizi 23.5-14)
16Pobwe Lyakwiindilila lya Mwami Leza lileelede kubambwa mubuzuba bwakkumi aane bwamwezi mutaanzi. 17Mubuzuba bwakkumi aasanu bwamwezi ooyu kuyooba pobwe, liyootola mazuba aali ciloba. Bantu banoolya buyo zinkwa zitakwe mimena. 18Lino mubuzuba butaanzi muswaangane mbuli mbungano iisalala, mukombe tamweelede kubeleka pe. 19Amukape cipaizyo citentwa ku Mwami Leza catupoho tobilo, mugutu omwe, atubelele tuli ciloba tuli aamwaka omwe tutakwe kampenda. 20Antoomwe akapoho komwe-komwe ape cituuzyo camaila abusu bunante buzula ntumba bukandidwe amafuta. Amugutu omwe-omwe ape katumba, 21akabelele komwe-komwe ape nsangwa. 22Antoomwe azipaizyo eezi, apaizye asijembwe omwe kuti abe cipaizyo cakukombelezezya zinyonyoono zyanu. 23Amukape eezi atala azipaizyo zyabuzuba abuzuba. 24Munzila njiyonya kwamazuba aali ciloba, mupaizye ku Mwami Leza cipaizyo cacakulya, cibe bweema bubotelezya ku Mwami Leza. Eezi zibe atala azyabuzuba abuzuba zyazitentwa azyazyakunywa. 25Lino mubuzuba bwaciloba muswaangane, mbuli mbungano iisalala mukombe, tamweelede kubeleka pe.
Cipaizyo cabutebuzi
(Bapaizi 23.15-22)
26Lino mubuzuba butaanzi bwapobwe lyabutebuzi mwaakutuuzya ku Mwami Leza maila mapya, muswaangane mbuli mbungano iisalala, tamweelede kubeleka pe. 27Amupe cipaizyo cakutenta catupoho tobilo, amugutu omwe, atubelele tuli ciloba twamwaka omwe, zibe bweema bubotelezya ku Mwami Leza. 28Antoomwe akapoho komwe-komwe ape cituuzyo camaila abusu bunante buzula nsangwa bukandidwe amafuta. Amugutu omwe-omwe ape katumba. 29Akabelele komwe-komwe ape nsangwa. 30Antoomwe azipaizyo eezi apaizye asijembwe wakukombelezezya zinyonyoono zyanu. 31Atala azipaizyo eezi amupe azipaizyo zyacakunywa azyakutenta alimwi azyamaila. Banyama boonse aaba kabatakwe kampenda pe.
Currently Selected:
Myeelwe 28: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
