Myeelwe 27
27
Bana basimbi ba Zelofehadi
1Lino Zelofehadi mwanaa Hefee, mwanaa Giliyadi, mwanaa Makii mwanaa Manase, mwanaa Josefa wakazyala bana basimbi aaba: Mala, Nowa, Hogila, Milika a Tiliza. 2Bana aaba bakaza kutente lyakuswaanganina nkubakazooima kumbele lya Mozesi a Eliyazaa mupaizi, ooko basololi abantu boonse bakati, 3“Taata wakafwida munkanda, alimwi taakali munkamu ya Kola, eeyo yakazangila Mwami Leza. Walo wakafwida cinyonyoono cakwe mwini. Naakafwa taakasiya bana balombe. 4Sena zina lyakwe lyazimingana nkaambo taakasiya bana balombe? Amutupe caabilo akati kanzubo zyataata.”
5Lino Mozesi wakatola makani aabo ku Mwami Leza. 6Nkabela Mwami Leza wakamwaambila kuti, 7“Eeco bana ba Zelofehadi ncobakumbila cililuleme. Kobapa caabilo akati kanzubo zyawisi. Amubalekele lukono lwawisi. 8Alimwi ambila Baisilayeli kuti naa mwaalumi wafwa katajisi mwana mulombe, bana basimbi baleelede kutola lukono lwakwe. 9Kuti naa kanyina mwana musimbi, bana bokwabo baalumi baleelede kukona lubono. 10Kuti naa wisi tajisi bana bokwabo, kufumbwa wacikowela ulakonzya kukona lubono. 11Eeci ciyooba nceciyanza mu Isilayeli, mbubonya mbuli kukona lubono. Eeci ciyooba nceciyanza mu Isilayeli, mbubonya mbuli Mwami Leza mbwaakalailila Mozesi.”
Josyuwa mbwaakasalwa kutola busena bwa Mozesi
(Ciibalusyo 31.1-8)
12Lino Mwami Leza wakaambila Mozesi kuti, “Koya atala lyacilundu ca Abalimu, ukabone nyika njetipe Baisilayeli. 13Wamana kwiibona ulafwa, mbubonya mbwaakafwa mupati wako Aloni, 14nkaambo nywebo nyobilo mwakandizangila munkanda ya Zini. Ciindi bantu nobakanditongookela ku Meliba tiimwakatondezya bulemu bwangu kulimbabo.” Meliba nkasensa kali ku Kadesyi munkanda ya Zini.
15Lino Mozesi wakakomba kuti, 16“O Mwami Leza, uupa buumi kubantu boonse, ndakomba kuti noosala mwaalumi uukonzya kusolweda bantu, 17kwaambisya ciindi cankondo, kutegwa bantu ba Mwami Leza batabi mbuli mbelele zitakwe mweembezi.”
18Eelyo Mwami Leza wakaambila Mozesi kuti, “Tola Josyuwa mwanaa Nuni, mwaalumi uuli aamuuya, ubikke maanza amutwe wakwe. 19Umwiimike kumbele lya Eliyazaa mupaizi abantu boonse, umunjizye mumulimo ooko. 20Umulekele kuti aendelezye bantu mbuli nduwe, ndendilyo Baisilayeli boonse nobatimuswiilile. 21Unoolaililwa a Eliyazaa mupaizi, unoomubuzizya a Ulimu alimwi a Tumimu ku Mwami Leza.”
22Lino Mozesi wakacita mbuli mbwaakalaililwa a Mwami Leza. Wakaimika Josyuwa kumbele lya Eliyazaa mupaizi abantu boonse. 23Eelyo Mozesi wakabikka maanza amutwe wa Josyuwa, wamulailila mbubonya mbuli Mwami Leza mbwaakamulailila.
Currently Selected:
Myeelwe 27: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
