Myeelwe 21
21
Kuzundwa kwa Bakenani
1Lino mwami wa Bakenani waku Aladi wakali kukkala cisi nkocili kumusanza. Naakamvwa kuti Baisilayeli bainda kunzila yaku Atalimu, wakabavumpa akutola bamwi babo. 2Baisilayeli bakakonkezya ku Mwami Leza kuti, “Kuti naa tukabazunde bantu aaba, tulanyonyweeda limwi minzi yabo.” 3Aboobo Mwami Leza wakamvwa kulilauka kwa Baisilayeli, nkaako wakaaba Bakenani. Baisilayeli bakabanyonyweeda limwi aminzi yabo, nkankakaako ooko ncokwiitwa kuti Hooma.
Nzoka yamukuba
4Lino kucilundu ca Hoo Baisilayeli bakatola mugwagwa uuya ku Lwizi Lusalala kuti bazinguluke cisi ca Edomu. Pele munzila bantu bakatyompwa, 5bakatalika kutongooka Mwami Leza a Mozesi akuti, “Ani ncookatuletela kuzwa ku Ijipiti nkuti tuzoofwide munkanda? Kayi kunyina cakulya naaba maanzi. Atwalo twakulya ootu tunyina ambotubede twatucima!”
6Mwami Leza wakabatumina nzoka nkali, zyakabaluma Baisilayeli, bantu banji bakafwa. 7Babone boobo bantu bakaboola kuli Mozesi akwaamba kuti, “Twakabisya nitwakatongooka Mwami Leza anduwe. Akaka tukombele ku Mwami Leza kuti agwisye nzoka eezi.” Nkaako Mozesi wakabakombela bantu.
8Lino Mwami Leza wakaambila Mozesi kuti abambe nzoka yamukuba aibikke acisamu kuti kufumbwa muntu walumwa, ailanga apone. 9Mpoonya Mozesi wakabamba nzoka yamukuba akwiibikka acisamu, kufumbwa wakalumwa akwiilanga wakapona.
Lweendo lwakuya ku Mowabu
10Lino Baisilayeli bakeenda akuyooyaka zivuka ku Oboti. 11Bazwe ooko bakaakuyakila kumatongo a Abilamu munkanda kujwe aacisi ca Bamowabu. 12Bazwe kooko bakaakuyakila kukkuti lya Zeledi. 13Alimwi bakalonga akuyooyakila mutala lyamulonga wa Anoni kunkanda yakalangene acisi ca Baamoli, nkaambo Anoni ngowakali ngomunyinza waakati ka Bamowabu a Baamoli. 14Nkankakaako ncokulembedwe mubbuku lya nkondo kuti, “Wehebu wamu Sufa, mumakkuti aa Anoni, 15kunselelo yamakkuti aamunzi wa Ayi, mane kusikila kumunyinza wa Mowabu.”
16Lino nibakazwa ooko bakasika ku Beya kumukalo ooko Mwami Leza nkwaakaambila Mozesi kuti, “Bunganya bantu, ndibape maanzi.” 17Ciindi eeco Baisilayeli bakaimba lwiimbo oolu,
18“Zwisya maanzi, omukalo!
Tulaingula, tulaimba zyamukalo wakasya bamami,
wakafumbwa abasololi, babelesya nkoli beenzya nkoli amisako.”
Lino kuzwa kooko bakaya ku Matana. 19Bazwe ku Matana bakaya ku Nahaliyeli, kuzwa ku Nahaliyeli bakaya ku Bamoti, kuzwa ku Bamoti, bakaya kukkuti lya Mowabu munsi lyacilundu ca Pisiga, cilangene ankanda.
Kuzundwa kwamwami Sihoni amwami Ogi
(Ciibalusyo 2.26—3.11)
20Lino Baisilayeli bakatuma bantu kumwami Sihoni wa Baamoli akwaamba kuti, 21“Amutuzumizye twiinde munyika yanu. Swebo niziba ŋombe zyesu tatukooyooleya mumyuunda yanu niiba yamisaansa, alimwi tatukooyoonywa maanzi aamumikalo yanu pe. 22Tunoogeme buyo mugwagwa mupati kusikila tukapole munyika yanu.”
23Pele mwami Sihoni wakakaka kuti Baisilayeli bainde munyika yakwe. Mpawo wakabunganya mpi yakwe bakainka kunkanda kuyoolwana Baisilayeli. Naakasika ku Jahazi wakalwana Baisilayeli. 24Pele Baisilayeli bakazunda, mpoonya bakatola nyika yabo kuzwida kumulonga wa Anoni kusikila ku Jabboki kumunyinza wa Baamoni, ooyo wakayakilidwe. 25Mbombuboobu Baisilayeli mbobakazunda minzi ya Baamoli kubikkilizya a Hesyiboni atunzi tumwi toonse twakazingulukide. 26Hesyiboni wakali ngomunzi mupati mwakali kukkala mwami Sihoni wa Baamoli, ooyo wakalwana amwami mutaanzi wa Bamowabu akutola nyika yakwe yoonse mane kusikila kumulonga wa Anoni.
27Nkankakaako kaambyo ncokati,
“Kamuza ku Hesyiboni, tuuyakulule.
Munzi ooyo wa Sihoni tuuboozye.
28Mulilo wakayaka ku Hesyiboni,
wavwilima kuzwa kumunzi wa Sihoni.
Wakasyukutya munzi wa Aa ku Mowabu,
waakusika kumalundu aa Anoni.
29Maawe kulindinywe, nobaku Mowabu!
Mwafwa nobakombi ba Kemosyi!
Wamulekelezya mutuntulike nobaalumi,
bakaintu baangwe, kuli Sihoni mwami wa Baamoli.
30Pele lino twabazunda Baamoli,
twabanyonyoona kuzwa ku Hesyiboni kuyoosikila ku Diboni,
twabapwayaula kuyoosikila ku Nofa mane do ku Mediba.”
31Mbombuboobu Baisilayeli mbubakakkala munyika ya Baamoli.
32Lino Mozesi naakamana kutuma basikutwela ku Jazee, Baisilayeli bakatola zivuka zya Baamoli akubatanda.
33Lino Baisilayeli bakanyona, nkabela bakatola mugwagwa uuya ku Basyani, mpawo mwami Ogi wakooko wakeenda ampi yakwe kuzoobalwana ku Edileyi. 34Nkabela Mwami Leza wakaambila Mozesi kuti, “Mutabayoowi pe, ndilamupa nguzu zyakubazunda, mutole nyika yakwe yoonse. Mubacite mbuli mbumwakacita Sihoni mwami wa Baamoli bakkala ku Hesyiboni.”
35Nkaako Baisilayeli bakajaya Ogi, bana bakwe, abantu bakwe boonse. Taakwe wakasyaala mumunzi pe, eelyo bakatola nyika yabo yoonse.
Currently Selected:
Myeelwe 21: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
